Eremiya 46 bob
1 Eremiya payg'ambarg'a milletler haqqında Jaratqan İyeden so'z tu'sti.
2 Mısır tuwralı xabar: Yahuda patshası İoshiya ulı Ehoyakimnin' patshalıg'ının' to'rtinshi jılında Babiloniya patshası Nabuxodonosor Evfrat da'ryasının' jag'asındag'ı Karkemishte Mısır patshası faraon Nexonın' ordasın qırg'ıng'a ushırattı.
3 «Qalqanlardı tayarlap, sawashqa kirisin'!
4 Atların'ızdı ertlep, atlarg'a minin'! Duwlıg'an'ızdı kiyip, sapqa dizilin'! Nayzalardı egep, sawıtlardı kiyin'!
5 Men ne ko'rip turman? Olar qorqıp, sheginip atır, Jawıngerleri jen'ilip, Artına qaramay, qashıp baratır. Ha'r ta'repten qorqınısh biylep alg'an,– deydi Jaratqan İye. –
6 Ju'yrik qashıp qutıla almas, Batır qashıp kete almas. Arqada, Evfrat da'ryası boyında, Olar su'rnigip, jıg'ıladı.
7 Nil kibi tasıp, Suwları burqasınlag'an da'ryaday bolg'an kim?
8 Nil kibi tasıp, Suwları burqasınlag'an da'ryaday bolg'an bul – Mısır. Ol: „Tasıp, du'nya ju'zin qaplayman, Qalanı turg'ınları menen joq qılaman“, – deydi.
9 Ha'y, atlar, alg'a basın'! Ha'y, arbalar, jel bolıp ushın'! Ma'rt jawıngerler hu'jimge o'tsin: Xabashstan a'skerleri, Put qalqanshıları, Sheber sarıjayshı Lud a'skerleri.
10 Bul ku'n A'lemnin' Jaratqan İyesi bolg'an İyenin' ku'ni. Bul ku'n Onın' dushpanlarınan o'sh alınatug'ın to'lem ku'ni. Qılısh toyg'ansha, Qang'a sho'li qang'ansha jalmaydı. Evfrat da'ryasının' arqasındag'ı jerlerde, A'lemnin' Jaratqan İyesi bolg'an İye ushın qurbanlıq boladı.
11 Ha'y, pa'k qız Mısır, Giladqa barıp, ma'lha'm al. Qansha da'ri ishsen' de, biypayda, Senin' da'rtin'e dawa joq.
12 Shermendeligin'di milletler esitti, Jer beti pa'riyadın'a toldı. A'sker a'skerge du'gisip, Ekewi de jerge quladı».
13 Babiloniya patshası Nabuxodonosordın' urısıw ushın Mısır eline keletug'ını tuwralı Eremiya payg'ambarg'a Jaratqan İye mına so'zdi ayttı:
14 «Mısırda ja'riyalan', Migdolda jar salın', Nofta ha'm Taxpanxeste esittirip, bılay den': „Turıp, tayarlanın', Qılısh do'geregin'izdegilerdi qırıp taslaydı“.
15 Ne ushın qudayın' Apis qashtı? Bug'an' ne ushın ayaqta tura almadı? Sebebi Jaratqan İye onı jer menen jeksen etti.
16 Ol jıg'ılg'anlardı ko'beytti, Olar bir-birinin' u'stine jıg'ılıp atırıp: „Bol tez, zalımnın' qılıshınan qashıp, O'z xalqımızg'a, tuwılg'an ma'kanımızg'a qaytayıq!“ – deydi.
17 Ol jerde bolsa: „Mısır patshası faraon tek maqtanshaq, Ol pursattı qoldan shıg'ardı“, – deydi.
18 Atı A'lemnin' Jaratqan İyesi bolg'an Patsha bılay deydi: „O'z tiriligim haqı ant ishemen: Tawlar arasında Tabor tawı qanday bolsa, Ten'iz jag'asındag'ı Karmel tawı qanday bolsa, Sizlerge kiyatırg'an dushpan da sonday.
19 Ha'y, qız Mısırdın' turg'ınları! Tu'yinshigin'izdi tu'yip, su'rginge tayarlanın'. Nof wayran bolıp, Kimsesiz hu'wlep qaladı.
20 Mısır ju'da' sulıw qashar, Biraq arqanın' sonaları japırılıp og'an ushıp keledi.
21 Onın' jallanba a'skerleri, Baqqı tanaday bolsa da, Sheginip, birlikte izge qashadı, Olardın' jerinde tura almaydı. Sebebi olardın' apatshılıqqa ushıraytug'ın ku'ni, Jazalanatug'ın waqtı jetip keldi.
22 Dushpannın' ku'shli ordası jaqınlag'an sayın, Mısır jılanday ısıldaydı. Otın shabatug'ın adamlarday, Dushpan baltalar menen keledi.
23 Tıg'ız tog'ayday bolsa da, Onı shawıp taslaydı, – deydi Jaratqan İye. – Olar shegirtkelerden de ko'p, Esapsız, san-sanaqsız.
24 Qız Mısır shermende bolıp, Arqa xalqının' qolına beriledi“».
25 İzraildın' Qudayı A'lemnin' Jaratqan İyesi bılay deydi: – Men No qalasının' qudayı Amondı, faraondı, Mısır menen onın' qudayların, patshaların ha'm faraong'a u'mit baylag'anlardı jazalayman.
26 Olardı olardın' janında qastı bolg'an Babiloniya patshası Nabuxodonosordın' ha'm onın' qullarının' qolına beremen. Bunnan keyin, Mısırda burıng'ıday ja'ne xalıq jasaydı, – deydi Jaratqan İye.
27 Qulım Yaqıp, sen qorqpa! İzrail, qa'weterlenbe! Men seni uzaq ellerden, Urpaqların'dı su'rgin etilgen jerlerinen qutqaraman. Yaqıp qaytıp kelip, Tınısh ha'm biyqa'ter o'mir su'redi, Hesh kim onı qorqıtpaydı.
28 Qorqpa, qulım Yaqıp! Men senin' menen birgemen, – deydi Jaratqan İye. – Seni O'zim aralarına jibergen, Milletlerdin' ha'mmesin joq qılaman. Biraq seni joq qılmayman, Tek a'dalatlı tu'rde jaza beremen, Jazasız qaldırmayman.
