Eremiya 49 bob
1 Jaratqan İye ammonlar haqqında bılay deydi: – İzraildın' ulları joq pa? Onın' miyrasxorı joq pa? Onda ne ushın Moloxqa tabınatug'ınlar, Gad urıwının' jerin iyelep, Xalqı Gadtın' qalalarında jasap atır?
2 Sonlıqtan sonday ku'nler keledi, – deydi Jaratqan İye, – Ammonlardın' bas qalası Rabbag'a qarsı, Urıs dabılın qaqtıraman. Ol u'yilgen topıraqqa aylanadı, o'rteledi. Sonda İzrail o'zlerinen tartıp alıng'anlardı iyeleydi, – deydi Jaratqan İye. –
3 Zar jıla, Xeshbon! O'ytkeni Ay qalası qırıp taslandı. Rabba hayalları pa'riyad etin'! Aza kiyimin kiyip, o'kirip jılan'! Atızlarda gezip ju'rin'! O'ytkeni ruwxaniyleri ha'm ha'meldarları menen, Molox su'rgin qılınadı.
4 Oypatlıqların' menen nege maqtanasan'? Oypatlıqların' nabıt boladı. Biyopa qız, g'a'ziynelerin'e isenip: «Mag'an kim hu'jim ete aladı?» – dedin'.
5 Men o'zim sag'an ha'mme ta'repten, Qorqınısh jiberemen, – deydi A'lemnin' İyesi, Jaratqan İye. – Sizler quwılıp, tarap qashasız, Qashqınlardı hesh kim qayta jıynamaydı.
6 Biraq bunnan keyin, Men ammonlardın', Burıng'ı abadanshılıg'ın qaytarıp beremen, – deydi Jaratqan İye.
7 Edom tuwralı A'lemnin' Jaratqan İyesi bılay deydi: – Temanda endi danalıq joq pa? Danalarda ma'sla'ha't qalmadı ma? Olardın' danalıg'ı g'ayıp boldı ma?
8 Dedan turg'ınları! Artın'ızg'a qaramay, qashıp, U'n'girlerge jasırının'. Men Esawdı jazalag'anımda, Basına apatshılıq jawdıraman.
9 Bag'ın'da ju'zim tergenler, Bir neshe solqım ju'zim qaldırmas pa edi? Tu'nde u'yge tu'sken urı, Keregin urlamas pa edi?
10 Biraq Esawdı tır jalan'ash qılaman, Sırlı jerlerin a'shkara qılaman, Ol jasırına almaydı. Onın' urpaqları, Ag'ayin ha'm qon'sıları joq qılınadı, O'zi de joq boladı.
11 Hesh kim: «Jetimlerin'izdi qaldırın', Olardın' janın saqlayman. Jesirlerin'iz de mag'an u'mit baylasın», – dey almaydı.
12 Jaratqan İye bılay deydi: – Jaza kesesinen ishiwi kerek bolmag'anlar da, Onnan ishkende, sen jazasız qalasan' ba? Yaq, jazasız qalmaysan', A'lbette, onnan ishesen'.
13 O'z atım menen ant ishemen, – deydi Jaratqan İye, – Bosra qorqınıshqa, ku'lkige, Sho'lge ha'm g'arg'ısqa duwshar boladı. Onın' barlıq qalaları ma'n'gi bosap qaladı.
14 Men Jaratqan İyeden bir xabar esittim, Milletler arasına jarshı jollandı: «Bir jerge jıynalıp, og'an qarsı shıg'ın', Ayaqqa turıp, sawashqa atlanın'!»
15 Men seni milletler arasında arzımas, Adamlar arasında jek ko'rinshi qılaman.
16 Qa'weterge tu'siwin' ha'm ta'kabbir ju'regin', Seni aldadı. Ha'y, jartastın' jarıg'ında jasaytug'ın, To'belerdin' biyik shoqqıların iyelegen! Bu'rkit kibi uyan'dı ba'lent qursan' da, Seni ol jerden tu'siremen, – deydi Jaratqan İye. –
17 Edom qorqınıshlı ko'riniske aylanadı. Ol jerden o'tken ha'r bir adamnın' ju'regi suwlap, Apatshılıqları sebepli onı tabalaydı.
18 Sodom menen Gomora ha'm olardın' a'tirapındag'ı qalalardın', Jer menen jeksen bolg'anı sıyaqlı, – deydi Jaratqan İye, – Edomda da birde bir adam jasamaydı, Tiri jan qalmaydı.
19 Men İordan boyındag'ı qalın' tog'aydan, Jap-jasıl jaylawg'a shıqqan arıslan sıyaqlı, Edom xalqın ol jerden asıg'ıs aydap shıg'aman. Men olarg'a patsha beremen, biraq ol olardı qorg'ay ala ma? Sebebi Mag'an ten' keletug'ın kim bar? Mennen kim esap talap qıla aladı? Qaysı patsha Mag'an qarsı tura aladı?
20 Sonlıqtan Jaratqan İyenin' Edomg'a qarsı du'zgen jobasın tın'lan'! Teman turg'ınları ushın niyetlegen maqsetin esitin': «Haqıyqatında, su'riwdegi en' kishkenesi de su'yrep ketiledi, Olar sebepli jaylawları bosap qaladı.
21 Olardın' qulag'an dawısınan, Jer ju'zi la'rzege keledi. Qıshqırısqan dawısları, Qamıs ten'izine deyin esitiledi.
22 A'ne, dushpan bu'rkit kibi joqarı ushıp, Qanatların Bosranın' u'stine jaydı. Sol ku'ni Edom a'skerlerinin' ju'regi, Tolg'atqan hayaldın' ju'regindey boladı».
23 Damask tuwralı payg'ambarshılıq: «Xamat ha'm Arpad uyatqa qaldı, Qorqınıshlı xabardı esitip, qattı mun'aydı. Ruwxı tu'sip, Tolqın ko'terilgen ten'izdey basılmaydı.
24 Damask ha'lsirep, qasha jo'neldi, Onı qorqınısh biylep aldı. Tolg'aq tutqan hayalday, Onı azap ha'm da'rt tuttı.
25 Quwanıshım ma'kanı bolg'an, Bul dan'qlı qala qalayınsha taslap ketildi?
26 Onın' jas jigitleri ko'shelerde o'ledi, Barlıq a'skerleri sol ku'ni qaza tabadı, – deydi, A'lemnin' Jaratqan İyesi. –
27 Damask diywallarına ot qoyaman, Ben-Hadad qorg'an qalasın o'rt jalmaydı».
28 Babiloniya patshası Nabuxodonosor basıp alg'an Kedar ha'm Xasor patshalıqları tuwralı Jaratqan İye bılay deydi: – Barıp, Kedarg'a hu'jim qılın', Shıg'ıstag'ı xalıqlardı joq qılın'!
29 Olardın' shatırları menen su'riwleri tartıp alınadı, Perdeleri, buyımları, tu'yeleri talan-taraj qılınadı, Adamlar way-waylap: «Qa'wip do'nbekte», – dep baqırısadı.
30 Xasor turg'ınları! Qashın'lar, Uzaqlarg'a ketin'ler, U'n'girlerge jasırının'lar! – deydi Jaratqan İye. – Sebebi Babiloniya patshası Nabuxodonosor, Sizler ushın qarar qabıl etti, Sizlerge qarsı joba du'zdi.
31 1Barın', tınısh ha'm qa'wipsiz jasap atırg'an, Xalıqqa hu'jim etin', – deydi Jaratqan İye. – Olardın' da'rwazaları da, ta'mbileri de joq, Olar jeke jasaydı.
32 Olardın' tu'yeleri oljalanıp, Ko'p malları qolg'a alınadı. Tulımshaqların kestirip ju'retug'ın bul adamlardı, To'rt ta'repke tarqatıp jiberemen, Ha'r ta'repten olarg'a apat jiberemen, – deydi Jaratqan İye. –
33 Xasor ma'n'gige qan'ırap, Sag'allar ma'kanına aylanadı. Ol jerde birde bir adam jasamaydı, Tiri jan qalmaydı.
34 Yahuda patshası Sedekiyanın' patshalıg'ının' baslarında Eremiya payg'ambarg'a Elam haqqında so'z tu'sti.
35 A'lemnin' Jaratqan İyesi bılay dedi: – Elamnın' qu'diretinin' negizi bolg'an, Sadag'ın sındıraman,
36 Aspannın' to'rt ta'repinen jiberilgen samal menen, Elamdı to'rt ta'repke tarqatıp jiberemen. Elamnan su'rgin etilgenlerdin', Ayaq baspag'an jurtı qalmaydı.
37 Ayaq baspag'an jurtı qalmaydı+. 37Elamdı dushpanlarının', Janına qas bolg'anlardın' aldında albırataman. Men lawlag'an g'a'zebimdi, U'stine apat qılıp jawdıraman, – deydi Jaratqan İye. – Olardı pu'tkilley joq qılmag'ansha, İzine qılısh salaman.
38 Men taxtımdı Elamg'a ornatıp, Onın' patshasın ha'm ha'meldarların joq qılaman, – deydi Jaratqan İye. –
39 Biraq aqırg'ı ku'nlerde Elamg'a, Abadanshılıg'ın qaytarıp beremen, – deydi Jaratqan İye.
