Eremiya 5 bob
1 – Erusalim ko'shelerin aylanın', A'tirapına qarap, an'lan', Qala maydanlarınan izlen'. Eger a'dalatlı ha'm haqıyqattı izlegen bir adam tapsan'ız, Onda Men bul qalanın' gu'nasınan o'temen.
2 Olar: «Tiri Jaratqan İye haqı ant ishemiz», – dese de, Negizinde, ishken antı jalg'an.
3 – Jaratqan İye, Senin' na'zerin' haqıyqatqa tigilgen emes pe? Olardı urdın', biraq olar azarın sezbedi, Olardı joq qılmaqshı boldın', biraq sabaq alıwdan bas tarttı. Olar betlerin jartastan da qattı qılıp, İzge qaytıwdı qa'lemedi.
4 Men ishimnen: «Bul adamlar g'a'rip ha'm aqılsız, Olar Jaratqan İyenin' jolın, O'z Qudayının' Nızamın bilmeydi.
5 Endi men abıraylı adamlarg'a barıp, Olar menen so'ylesemen. Olar Jaratqan İyenin' jolın, O'z Qudayının' Nızamın biledi», – dep oyladım. Biraq olardın' ha'mmesi de Qudayının' moyıntırıg'ın sındırıp, Kisenlerin u'zip taslag'an eken.
6 Sonlıqtan tog'aydan shıqqan arıslan olardı tilkimlep, Sho'ldegi qasqır olardı g'ajıp taslaydı. Qaplan qalaları janında buqqıda jatıp, Qaladan shıqqan ha'r bir adamdı tilkim-tilkim qıladı. Sebebi olardın' qılmısı u'lken, Opasızlıg'ı sansız.
7 – Seni qalay keshiremen? Balaların' Meni taslap ketip, Quday bolmag'an butlarg'a ant ishti. Men olardı toydırdım. Olar bolsa, qıyanet etip, Toplanısıp, buzıqlardın' u'ylerine ketti.
8 Olar ku'yge kelgen ayg'ırlar kibi, Ha'r biri qon'sısının' hayalına kisneydi.
9 Bular ushın Men olardı so'zsiz jazalamayman ba? – deydi Jaratqan İye. – Usınday bir milletten o'sh almayın ba?
10 Ju'zimzarlarına kirip, olardı wayran qılın', Biraq pu'tkilley joq qılman'. Ju'zim shaqalarının' kereksizlerin julıp taslan', Endi olar Mag'an, Jaratqan İyege tiyisli emes.
11 İzrail ha'm Yahuda xalıqları, Mag'an pu'tkilley qıyanet etti, – deydi Jaratqan İye.
12 Xalıq Jaratqan İye haqqında jalg'an so'ylep, bılay deydi: «Ol hesh na'rse qılmaydı, Basımızg'a apatshılıq tu'speydi, Bizler qılısh ta, ashlıq ta ko'rmeymiz.
13 Payg'ambarlar samalg'a megzer, Olarda Jaratqan İyenin' so'zi joq. Aytqanları olardın' o'zlerinin' basına tu'ssin».
14 Sonlıqtan A'lemnin' Qudayı Jaratqan İye bılay deydi: – Xalıq bul so'zlerdi aytqanı ushın, O'z so'zlerimdi senin' awzın'da jalınday qılaman. Bul xalıqtı otın qılaman, Ot olardı jandırıp joq qıladı.
15 Ha'y, İzrail xalqı, – deydi Jaratqan İye, – Sizlerdin' u'stin'izge, Uzaq jerden bir milletti alıp kelemen. Ol ku'shli ha'm a'yyemgi xalıq bolıp, Sol adamlardın' tilin sen bilmeysen', So'zine de tu'sinbeysen'.
16 Olardın' oq jayları ashıq qa'birge megzer, Adamlarının' ha'mmesi batır jawıngerler.
17 Olar senin' zu'ra'a'tin'di ha'm nanın'dı jep taslap, Ul-qızların'ızdı jalmap jutadı. Mayda ha'm iri malların'ızdı, Ju'zim ha'm a'njirlerin'izdi jeydi. Sizler isengen qorg'anlı qalaların'ızdı, Qılısh penen wayran qıladı.
18 Ha'tte, sol ku'nleri de, – deydi Jaratqan İye, – sizlerdi pu'tkilley joq qılmayman.
19 Xalıq sennen: «Nege Qudayımız Jaratqan İye bizlerge bul na'rselerdi isledi?» – dep sorasa, olarg'a bılay dep juwap ber: «Sizler Onı ta'rk etip, o'z jerin'izde basqa qudaylarg'a xızmet ettin'iz. Endi sizler o'zlerin'izge tiyisli bolmag'an jerde basqalarg'a solay xızmet etesiz».
20 – Yaqıptın' xalqına jar salıp, Yahudada ja'riyalan':
21 Ha'y, ko'zi bolsa da, ko'rmegen, Qulag'ı bolsa da, esitpegen, Nadan ha'm biyparasat xalıq, Qulaq salın'!
22 Mennen qorqpaysız ba? – deydi Jaratqan İye. – Menin' aldımda qaltıramaysız ba? Men qumdı ten'izge shegara, Ma'n'gi o'tip bolmaytug'ın bo'get qıldım. Tolqınlar tassa da, u'stine shıg'a almaydı, Shuwlasa da, onnan asıp kete almaydı.
23 Biraq bul xalıq o'jet ha'm qozg'alan'shı. Olar azg'ırılıp, o'z jolına qaytıp ketti.
24 Olar ju'regine tu'yip: «Gu'zgi ha'm ba'ha'rgi jawındı o'z waqtında jawdıratug'ın, Jıyın-terim ushın belgilengen ha'pteni saqlap kelgen, Qudayımız Jaratqan İyeden qorqayıq», – demeydi.
25 Ayıpların'ız sizlerdi usı jaqsı na'rselerden uzaqlastırdı, Gu'naların'ız bereketten mahrum etti.
26 Xalqımnın' arasında jawız adamlar bar, Olar qus awlag'anday buqqıda jatıp, Duzaq qurıp, adamlardı tutadı.
27 Tordın' qusqa tolg'anınday, Olardın' u'yleri de jalg'ang'a tolı. Sonlıqtan olar ku'sheyip, bayıdı,
28 Semirip, jıltıradı. Olardın' jawız islerinin' shegarası joq. Jetimnin' dawa-arzın a'dalatlı qaramaydı, İsti onın' paydasına sheshpeydi, Jarlının' huqıqın da qorg'amaydı.
29 Bular ushın Men onı jazalamayın ba? – deydi Jaratqan İye. – Bunday milletten o'sh almayın ba?
30 Sol jerde qorqınıshlı ha'm tan' qalarlıq na'rse bolmaqta:
31 Payg'ambarlar jalg'an payg'ambarshılıq qılmaqta, Ruwxaniyler o'zlerinin' qa'lewi boyınsha basqarmaqta. Menin' xalqıma bul unamaqta. Biraq bulardın' aqırı kelgende ne qılasız?
