Eremiya 51 bob
1 Jaratqan İye bılay deydi: – Men Babiloniyanı ha'm Leb-Qamay, yag'nıy Babilon turg'ınların, Nabıt qılatug'ın dawıl turg'ızaman.
2 Babilong'a jat jerlilerdi jiberemen. Onı biydayday suwırıp, elin bosatıp taslaydı. Apatshılıq ku'ni og'an ja'n-jaqtan hu'jim qıladı.
3 Sarıjayshılarının' sarıjayın tartsın, Sawıtların kiyip tayar tursın. Babilonnın' jasların ayaman', Onın' la'shkerlerin tolıq qırıp taslan'.
4 Qaza tapqanlar kaldeylerdin' elinde, O'ltirilgenler ko'shelerde jatadı.
5 İzrail ha'm Yahuda eli, İzraildın' Muxaddesi aldında, Gu'nag'a batqan bolsa da, Qudayı A'lemnin' Jaratqan İyesi, Olardı ta'rk etpedi.
6 Babilonlılar arasınan qashın', Ha'r kim o'z janın qutqarsın. Onın' qılmısı sebepli nabıt bolman'. Sebebi Jaratqan İye Babilonnan o'sh almaqta, Qılmısına jarasa jaza bermekte.
7 Babilon Jaratqan İyenin' qolında, Pu'tkil du'nyanı ma's qılg'an, Altın kese sıyaqlı edi. Milletler onın' sharabınan iship, Aqılınan azdı.
8 Babilon qulap, shıl-pa'rshe boldı. Ol ushın jılan', Jarasına ma'lha'm jag'ın', Ba'lkim, jazılıp qalar!
9 Biz Babilong'a shıpa bermekshi boldıq, Ol shıpa tappadı. Onı taslap, ha'mme o'z watanımızg'a keteyik. Og'an shıg'arılg'an hu'kim ko'klerge jetti, Bultlarg'a deyin ko'terildi.
10 Jaratqan İye bizdi aqladı, Barıp, Qudayımız Jaratqan İyenin' islerin, Sionda ja'riya qılayıq.
11 Oqlardı ushqırlap, oq qaltalardı toltırın'. Jaratqan İye Midiya patshalarının' ruwxın qozg'adı. Niyeti Babilondı joq qılıw edi. Usılay, Jaratqan İye O'zinin' o'shin, İbadatxanasının' o'shin aladı.
12 Babilon diywallarına qarsı bayraq ko'terin', Baqlawshılardı ku'sheytin', gu'zetshiler qoyın', Buqqılardı tayarlan'. Jaratqan İye maqsetlerin a'melge asıradı, Babilon turg'ınlarına aytqanların orınlaydı.
13 Mol suwlar boyında, Bay g'a'ziynege iye bolg'an xalıq! Senin' aqırın' jetti, A'jelin' keldi.
14 A'lemnin' Jaratqan İyesi O'z atı menen ant ishti: «Seni top-top shegirtkedey bolg'an, A'skerlerge toltıraman. Olar jen'is dawrıg'ın saladı».
15 Ol O'z qu'direti menen jerdi jarattı, Danalıg'ı menen du'nyanı qurdı, Aqılı menen ko'klerdi jaydı.
16 Ol gu'rkiregende ko'ktegi suwlar shuwlaydı, Ol jerdin' to'rt ta'repinen bultlardı ko'teredi, Jawın jawdırıw ushın shaqmaq shaqtırıp, Saqlap qoyg'an jerinen samal estiredi.
17 Ha'r bir adam aqmaq ha'm bilimsiz, Ha'r bir zerger soqqan butları sebepli uyatqa qaladı. Olardın' mu'sinleri qoldan sog'ılg'an, olarda jan joq.
18 Olar paydasız, masqarapazdın' isi, Jazalag'an waqıtta-aq joq boladı.
19 Biraq Yaqıptın' Qudayı olarg'a uqsamaydı, Ol pu'tkil barlıqtı jaratqan Quday. İzrail Onın' miyras urıwı, Onın' atı – A'lemnin' Jaratqan İyesi.
20 Babilon, sen Menin' shoqmarım edin', Sen arqalı milletlerdi qırıp, Patshalıqlardı wayran qıldım.
21 Sen arqalı atlar menen ondag'ı shabandozlardı, Sawash arbaları menen arbakeshlerdi qırdım.
22 Sen arqalı erkekler menen hayallardı, G'arrılar menen jaslardı, Jigitler menen qızlardı qırdım.
23 Sen arqalı shopandı ha'm onın' su'riwin, Diyxandı ha'm onın' jer aydaytug'ın o'gizin, Hu'kimdarları menen ha'meldarların qırdım.
24 Babilonnın' ha'm pu'tkil kaldeylerdin', Sionda islegen barlıq jawızlıqların, Sizlerdin' ko'z aldın'ızda o'zlerine qaytaraman, – deydi Jaratqan İye. –
25 Ha'y, wayran etiwshi taw, Pu'tkil du'nyanı qıyratqan taw! Men sag'an qarsıman! – deydi Jaratqan İye. – Qolımdı sozıp, Seni jartastan qulatıp, Janıp ketken tawg'a aylandıraman.
26 Sennen mu'yeshke qoyılatug'ın tas ta, Tiykar tas ta alınbaydı. Ma'n'gige qan'ırap qalasan', – deydi Jaratqan İye. –
27 Sol jerde bayraq ko'terip, Milletler arasında ka'rnay shalın', Milletlerdi Babilong'a qarsı urısqa tayarlan'. Ararat, Minniy ha'm Ashkenaz patshalıqların, Babilong'a qarsı toplan'. Og'an qarsı sa'rka'rda tayınlap, Atlardı shegirtkedey u'stine bastırın'.
28 Babilong'a qarsı urısıwg'a milletlerdi, Midiya patshaların, onın' hu'kimdarları menen ha'meldarların, Olardın' qol astındag'ı barlıq ellerdi tayarlan'.
29 Jer titirep, qaltıramaqta. O'ytkeni Babilondı adamsız sho'lge aylandırıw haqqındag'ı, Jaratqan İyenin' niyeti a'melge aspaqta.
30 Babilon batırları sawashtan waz keship, O'z qorg'anlarında otır. Ku'shi ketip, hayalday bolıp qalg'an. Olardın' jayları o'rtelip, Qapı ilgishleri sındırıldı.
31 Shabarman izinen shabarman, Xabarshı izinen xabarshı kelip, Babiloniya patshasına mına xabardı bildirdi: «Qala ha'mme ta'repten basıp alındı,
32 Da'rya o'tkelleri qolg'a alındı, Qamıslı batpaqlar o'rteldi, A'skerlerdi qorqınısh biyledi».
33 İzraildın' Qudayı A'lemnin' Jaratqan İyesi bılay deydi: Orım waqtında qırman qalay aydalatug'ın bolsa, Qız Babilon da solay qılınadı. Tez arada sol waqıt keledi.
34 «Babiloniya patshası Nabuxodonosor, Meni jalmap, albırattı, Bos ıdısqa aylandırıp qoydı. Aydarhaday jutıp, Qarnın la'zzetli zatlarıma toltırdı, Keyin qusıp tasladı.
35 Bizlerge ha'm jerleslerimizge islengen zorlıq, Babilonnın' basına tu'ssin, – deydi Sion turg'ınları. To'gilgen qanımızdın' qunı, Kaldeylerden talap etilsin», – deydi Erusalim.
36 Sonlıqtan Jaratqan İye bılay deydi: Men senin' isin'di jaqlap, Senin' ushın o'sh alaman. Ten'izin qurg'atıp, Suw bulaqların qurıtamanBabilon tas u'yindisine, Sag'allar ma'kanına aylanadı. Qorqınıshlı ko'riniske aylanıp, Ku'lkige qaladı. Ol jerde hesh kim jasamaydı..
37 Babilon tas u'yindisine, Sag'allar ma'kanına aylanadı. Qorqınıshlı ko'riniske aylanıp, Ku'lkige qaladı.Ol jerde hesh kim jasamaydı.
38 Babilon xalqı arıslanday aqıradı, Arıslan balasınday qan'sılaydı.
39 Sonda, ishteyi ashılg'anda, Men olarg'a zıyapat qurıp beremen. Shadlanıp, ma'n'gilik uyqıg'a ketip, Hesh waqıt oyanbasın dep, Olardı ma's qılaman, – deydi Jaratqan İye. –
40 Olardı toqlı, qoshqar ha'm serke kibi, Soyıwg'a alıp baraman.
41 Wah, Sheshax basıp alındı! Pu'tkil du'nyanın' saltanatı qolg'a alındı! Wah, milletler arasında Babilon qorqınıshlı ko'riniske aylandı!
42 Babilondı ten'iz qaplap, Tuwlag'an tolqınları onı bastıradı.
43 Onın' qalaları qan'ırap, Quw dalag'a, sho'lge aylanadı, Hesh kim jasamaytug'ın, Adam balası ol arqalı o'tpeytug'ın jer bolıp qaladı.
44 Babilon qudayı Beldi jazalap, Jutqanların qustıraman. Endi milletler og'an kelmeytug'ın boladı, Babilon diywalları qulaydı.
45 Xalqım Menin'! Olardın' arasınan shıg'ıp, Jaratqan İyenin' lawlag'an g'a'zebinen, Janın'ızdı saqlap qalın'.
46 Elde tarqalg'an mısh-mıshlardan, Ju'regin'iz artqa tartıp, qorqpasın. Bıyıl bir ga'p tarqalsa, Kelesi jılı basqası tarqaladı. Eldegi zorabanlıq, Patshalar arasındag'ı urıs haqqında, Mısh-mıshlar tarqaladı.
47 Sonday ku'nler kiyatır, Men Babilonnın' butların jazalayman. Pu'tkil u'lke uyatqa qalıp, O'li deneleri onın' ortasında jayrap jatadı.
48 Arqadan joq qılıwshı, Babilong'a hu'jim etkende, Aspan, jer ha'm ondag'ılardın' ha'mmesi, Babilonnın' jag'dayına shadlanıp, qıshqırısadı, – deydi Jaratqan İye. –
49 İzraillılardı qırg'anı, Jer ju'zindegi basqa xalıqlardı da qırg'anı ushın, Babilon qulaydı.
50 Qılıshtan qutılg'anlar irkilmey, ketin'! Uzaq jerlerde Jaratqan İyeni eske alın', Erusalimdi ju'rekte saqlan'.
51 Bizler keyis esitkende, uyaldıq, Shet elliler Jaratqan İyenin' İbadatxanasının', Muxaddes jerlerine kirgende, Ju'zi qara boldıq!
52 Sonday ku'nler keledi, – deydi Jaratqan İye. – Men Babilonnın' butların jazalayman. Pu'tkil jer boylap, Jaradarlardın' pa'riyadı esitiledi.
53 Ha'tte, Babilon ko'klerge ko'terilse de, Ba'lent qorg'anların bekkem qılsa da, Men og'an qırg'ın keltiriwshini jiberemen, – deydi Jaratqan İye.
54 Babilonnan ahıw-nala sesleri, Kaldeylerdin' jerinen ullı qırg'ın sesti esitiledi.
55 Jaratqan İye Babilondı opat etip, Ullı shawqımın basıp tındıradı. Dushpanları mol suwlardın' tolqınınday shuwlap, Dawısları jan'lap turadı.
56 Qırg'ın keltiriwshi Babilong'a keledi. A'skerleri tutqıng'a alınıp, Oq jayları sındırıladı. Jaratqan İye – o'sh alıwshı Quday, Ol isine say tolıq qaytaradı.
57 Men Babilonnın' basshıların, danıshpanların, Hu'kimdarların, ha'meldarların ha'm a'skerlerin ma's qılaman. Olar oyanbaytug'ın ma'n'gilik uyqıg'a ketedi, – deydi, Atı A'lemnin' Jaratqan İyesi bolg'an Patsha.
58 A'lemnin' Jaratqan İyesi bılay deydi: Babilonnın' qalın' diywalları jer menen jeksen boladı, Ba'lent da'rwazaları jag'ıp jiberiledi. Xalıqlardın' miyneti biyhudag'a ketedi, Milletlerdin' miyneti otqa jemtik boladı.
59 Yahuda patshası Sedekiyanın' patshalıg'ının' to'rtinshi jılı, patshanın' jol saparların uyımlastırıwshı wa'ziri Maxseyanın' aqlıg'ı, Neriyanın' ulı Seraya Sedekiya menen birge Babilong'a keterinde, payg'ambar Eremiya Serayag'a usı tapsırmanı berdi.
60 Eremiya Babilonnın' basına tu'setug'ın barlıq apatshılıqlardı, Babilong'a tiyisli barlıq so'zlerdi bir orama qag'azg'a jazıp qoyg'an edi.
61 Eremiya Serayag'a bılay dedi: – Babilong'a barg'anın'da, bul so'zlerdi dawıslap oqıp ber.
62 Keyin bılay dep duwa et: «Jaratqan İye, bul orınnın' joq etiletug'ını, onda insan da, haywan da jasamaytug'ını, onın' ma'n'gige qan'ırap jatatug'ını tuwralı O'zin' ayttın'».
63 Orama qag'azdı oqıp bolıp, og'an tas baylap, Evfrat da'ryasına atıp jiber.
64 Keyin bılay dep ayt: «Babilon da usılay suwg'a sho'gedi. Ol Men jawdıratug'ın apatshılıqtan, endi hesh qashan ayaqqa tura almaydı. Onın' ha'mme turg'ınları nabıt boladı». Usının' menen, Eremiyanın' so'zi juwmag'ına jetedi.
