Eremiya 52 bob
1 Sedekiya jigirma bir jasında patsha bolıp, Erusalimde on bir jıl patshalıq etti. Onın' anası libnalı Eremiyanın' qızı Xamutal edi.
2 Sedekiya da Ehoyakimge uqsap, Jaratqan İyenin' na'zerinde jaman bolg'an islerdi isledi.
3 Jaratqan İye Erusalim menen Yahudag'a g'a'zeplengeni ushın, olardı O'z da'rgayınan quwıp jiberdi. Sedekiya Babiloniya patshasına qarsı bas ko'terdi.
4 Sedekiyanın' patshalıg'ının' tog'ızınshı jılının' onınshı ayının' onınshı ku'ni Babiloniya patshası Nabuxodonosor pu'tkil ordası menen Erusalimge kelip, onın' qarsısına ornalastı. Qalanın' aylanasına topıraq u'ydi.
5 Solay etip, Sedekiyanın' patshalıg'ının' on birinshi jılına deyin, qala qamalda boldı.
6 Sol jılg'ı to'rtinshi aydın' tog'ızınshı ku'ni qalada ashlıqtın' ha'wij alg'anı sonshelli, u'lke xalqı bir tislem nang'a zar boldı.
7 Sol waqıtta qala diywalı quladı. Kaldeyler qalanı aylana qorshap turg'an bolsa da, barlıq a'skerler tu'nde patshanın' bag'ının' janındag'ı, eki diywal arasındag'ı da'rwaza arqalı shıg'ıp, İordan tegisligine qaray qashıp ketti.
8 Kaldey la'shkerleri patshanı quwıp, Erixo tegisliginde izinen jetip aldı. Pu'tkil a'skerleri Sedekiyanı taslap qashıp ketti.
9 Kaldeyler Sedekiyanı tutqıng'a alıp, Xamat u'lkesinin' Ribla qalasında bolg'an Babiloniya patshası Nabuxodonosorg'a alıp bardı. Sol jerde patsha Sedekiyanın' u'stinen hu'kim shıg'ardı.
10 Babiloniya patshası Riblada Sedekiyanın' ulların ko'z aldında bawızlattı. Ja'ne de, ol Yahudanın' barlıq ha'meldarların da bawızlattı.
11 Bunnan keyin, Sedekiyanın' ko'zlerin oydırdı, onı qola shınjır menen baylatıp, Babilong'a alıp ketti. Onı o'limine deyin zindanda saqladı.
12 Babiloniya patshası Nabuxodonosordın' patshalıg'ının' on tog'ızınshı jılının' besinshi ayının' onınshı ku'ni patshanın' saqshılarının' baslıg'ı ha'm Babiloniya patshasının' ha'meldarı Nabuzaradan Erusalimge keldi.
13 Ol Jaratqan İyenin' İbadatxanasın, patshanın' sarayın ha'm Erusalimdegi u'ylerdin' ha'mmesin ha'm pu'tkil za'wlim jaylardı o'rtedi.
14 Patshanın' saqshılarının' baslıg'ı menen kelgen kaldey a'skerleri Erusalimdi qorshap turg'an barlıq diywallardı qulattı.
15 Patshanın' saqshılarının' baslıg'ı Nabuzaradan xalıqtın' ka'mbag'alların, qalada aman qalg'anların, Babiloniya patshası ta'repke o'tkenlerdi ha'm tiri qalg'an o'nermentshilerdi su'rgin qılıp, alıp ketti.
16 Tek bag'shılıq ha'm diyxanshılıq penen shug'ıllansın dep, jarlılardan ayırımların sol jerde qaldırdı.
17 Kaldeyler Jaratqan İyenin' İbadatxanasındag'ı qola su'tinlerdi, tu'beldiriklerdi, qola ha'wizdi bo'leklep, qolalardı Babilong'a alıp ketti.
18 Olar İbadatxana xızmeti ushın qollanılatug'ın shoq salınatug'ın ıdıslardı, ku'l alatug'ın belshelerdi, pilik keskishlerdi, qan sebetug'ın tabaqlardı, tostag'anlardı ha'm barlıq qola buyımlardı alıp ketti.
19 Patshanın' saqshılarının' baslıg'ı la'genlerdi, shoq salınatug'ın ıdıslardı, qan sebetug'ın tabaqlardı, ku'l salınatug'ın ıdıslardı, shıra qoyg'ıshlardı, tostag'anlardı ha'm tabaqlardı – altınnan islengen zatlardı, gu'misten islengen zatlardı alıp ketti.
20 Patsha Sulaymannın' Jaratqan İyenin' İbadatxanası ushın isletken eki su'tini, bir ha'wizi ha'm ha'wiz astındag'ı on eki qola o'giz ushın sarp etilgen qolanı o'lshew mu'mkin bolmadı.
21 Ha'r bir su'tinnin' biyikligi on segiz shıg'anaq, domalaq aylanası on eki shıg'anaq, qalın'lıg'ı to'rt eli bolıp, ishi bos edi.
22 Su'tinnin' to'besinde qola to'belik bar edi. Onın' biyikligi bes shıg'anaq bolıp, aynalasındag'ı tor ha'm anar a'sheko'yler de qoladan islengen edi. Ekinshi su'tin de anar a'sheko'yler menen bezelgen edi.
23 Ha'r ta'repte toqsan altı anar, tordın' u'stindegisi menen ha'mmesi bolıp ju'z anar bar edi.
24 Patshanın' saqshılarının' baslıg'ı bas ruwxaniy Serayanı, ekinshi da'rejeli ruwxaniy Sefaniyanı ha'm lawazımlı ruwxaniylerden u'shewin tutqıng'a aldı.
25 Ja'ne de, ol qalada qalg'an a'skerlerge a'skerbası etip qoyılg'an bir sa'rka'rdanı, qaladan tabılg'an patshanın' jeti wa'zirin, u'lke xalqın a'skeriy dizimge alıwshı baslıqtın' xatkerin ha'm el turg'ınlarının' alpıs adamın tutqıng'a aldı.
26 Saqshılar baslıg'ı Nabuzaradan olardı Ribladag'ı Babiloniya patshası Nabuxodonosorg'a alıp bardı.
27 Babiloniya patshası olardı Xamat jerinin' Ribla qalasında o'ltirdi. Yahuda xalqı o'z jerinen su'rgin qılındı.
28 Nabuxodonosor su'rgin qılıp alıp kelgen xalıqtın' sanı mınaday: patshalıg'ının' jetinshi jılında u'sh mın' jigirma u'sh yahudiydi,
29 patshalıg'ının' on segizinshi jılında Erusalim turg'ınlarınan segiz ju'z otız eki adamdı,
30 jigirma u'shinshi jılı bolsa saqshılar baslıg'ı Nabuzaradan jeti ju'z qırıq bes adamdı su'rgin etip alıp keldi. Su'rgin etilgenler ja'mi to'rt mın' altı ju'z adam edi.
31 Yahuda patshası Ehoyakin su'rgin qılıng'anının' otız jetinshi jılı Babilong'a Ewil-Merodax patsha boldı. Ol sol jıldın' on ekinshi ayının' jigirma besinshi ku'ni Yahuda patshası Ehoyakinge jaqsılıq qılıp, onı tutqınlıqtan azat etti.
32 Ol Ehoyakin menen jıllı so'ylesti ha'm onı o'zi menen birge bolg'an basqa patshalardan u'stin qoydı.
33 Ehoyakin qamaqtag'ı kiyimlerin o'zgertti ha'm o'mirinin' aqırına deyin patsha dasturxanınan awqatlandı.
34 Onın' ku'ndelikli kerek-jarag'ı o'mir boyı, o'limine deyin, ha'r ku'ni patsha ta'repinen berildi.
