Eremiya 6 bob
1 – Ha'y, Benyamin xalqı, janın'ızdı qutqarıw ushın, Erusalimnen qashıp ketin'! Teqoada ka'rnay shalın'! Beyt-Hakkeremde ot jag'ıp, belgi berin'! Arqadan apatshılıq, ullı qırg'ın ko'rinbekte.
2 Sulıw ha'm na'zik qızdı, Qız Siondı joq qılaman.
3 Shopanlar su'riwi menen og'an kelip, Do'geregine shatırların tigedi. Ha'r kim u'lesine tiygen jerde su'riwin jayadı.
4 «Erusalimge qarsı urısqa tayarlanın'! Turın'lar, ku'ndiz hu'jimge shıg'ayıq! Way-buw, ku'n batıwg'a meyil beripti, Kesh tu'sip, ko'len'keler uzayıptı.
5 Turın'lar, tu'nde hu'jim jasap, Onın' qorg'anların qıyratayıq!»
6 A'lemnin' Jaratqan İyesi bılay deydi: – Tereklerin kesin', Erusalimge minetug'ın topıraq u'yin'. Bul qala jazalanadı, Onda zorlıq-zombılıqtan basqa hesh na'rse joq.
7 Bulaqtan suw shıg'a bergenindey, Bul qalada da jawızlıq solay shıg'a beredi. Onnan zorlıq ha'm zulımlıqtın' dawısı esitilip tur, Kesellik ha'm jaralardı ko'rip turman.
8 Erusalim, eskertiwime qulaq sal, Bolmasa, sennen ju'z buraman. Seni qan'ıratıp, Adam jasamaytug'ın jerge aylandıraman.
9 A'lemnin' Jaratqan İyesi bılay deydi: – Ju'zimnin' son'g'ı solqımına deyin terilgenindey, Dushpanlar İzraildı aman qalg'anlarınan jurday qıladı. Sonlıqtan ju'zim teriwshi sıyaqlı, Qolın'dı iske salıp shaqalardı qayta ko'rip shıq.
10 – Men kimge aytıp, kimdi qa'wipten saqlayın? Kim mag'an qulaq asadı? Olardın' qulaqları jabıq, esitpeydi. Jaratqan İyenin' so'zi olarg'a shermendeliktey tu'yiledi, Onnan ra'ha'tlenbeydi.
11 Sol sebepli men Jaratqan İyenin' g'a'zebine toldım, Qa'ha'rimdi basa almayman. – Bul g'a'zepti ko'shedegi balalardın', Jıynalıp turg'an jigitlerdin' u'stine to'k. Ol erkek ha'm hayallarg'a jawadı, Qartayg'anlar ha'm ku'ni jaqınlasqanlar da onnan qutıla almaydı+.
12 Olardın' u'yleri, atızları ha'm hayalları, Basqalarg'a beriledi. Sebebi Men bul jerdin' turg'ınlarına qarsı qolımdı ko'teremen, – deydi Jaratqan İye. –
13 Kishkenesinen u'lkenine shekem, Haram du'nya tabıwg'a ha'wes, Payg'ambarlarınan ruwxaniylerine shekem, Ha'mmesi hiyle menen is tutadı.
14 Tınıshlıq bolmasa da: «Tınıshlıq, tınıshlıq», – dep, Xalqımnın' qa'wipli jarasın ju'zeki emleydi.
15 İslegen jerkenishli isleri ushın olar uyaldı ma? Yaq, hesh te uyalmadı, Qızarıw ne ekenin de bilmedi. Sonlıqtan olar da qulag'anlar menen qulaydı, Jazalag'anımda, jer menen jeksen boladı, – deydi Jaratqan İye.
16 Jaratqan İye bılay deydi: – Da'rbent jollarda turıp, qaran', A'yyemgi soqpaqlar haqqında sorap, Jaqsı joldın' qay jerde ekenin u'yrenin'. Onnan ju'rin', janın'ız ra'ha't tabadı. Biraq sizler: «Onnan ju'rmeymiz», – dedin'iz+.
17 Men sizlerdin' u'stin'izden gu'zetshi qoyıp: «Ka'rnaydın' dawısına qulaq salın'», – dedim. Biraq sizler: «Tın'lamaymız», – dedin'iz.
18 Sonın' ushın, milletler, qulaq salın', Qarap turg'anlar, olardın' basına neler tu'setug'ının bilin'.
19 Tın'la, jer ju'zi! Bul xalıqtın' basına apatshılıq jawdıraman, Bul olardın' jaman niyetlerinin' miywesi boladı. Olar Menin' so'zlerime qulaq aspadı, Nızamımdı qabıl etpedi.
20 Ne ushın Mag'an Shebadan xosh iyisli tu'tetki, Uzaq ellerden xosh iyisli qamıs alıp kelinedi? Jandırılatug'ın qurbanlıqların'ızdı qabıl etpeymen, Sizlerdin' qurbanlıqların'ız Mag'an unamaydı.
21 Sonlıqtan Jaratqan İye bılay deydi: – Bul xalıqtın' aldına su'rnigetug'ın tas qoyaman, A'keler balaları menen birge su'rnigip jıg'ıladı, Qon'sılar dosları menen birge nabıt boladı.
22 Jaratqan İye bılay deydi: – Mine, arqadan bir xalıq kiyatır, Du'nyanın' shetinen bir ullı millet ayaqqa turmaqta.
23 Olar oq jay ha'm semser menen qurallang'an, O'zleri de zalım ha'm rehimsiz. Atlarg'a minip shawg'an sesti, Ten'iz sıyaqlı shuwıldaydı. Qız Sion! Sag'an hu'jim qılıw ushın, Olar bir adamday sap tartıp kiyatır.
24 – Olar haqqındag'ı bul xabardı esitip, Qollarımızda da'rman qalmadı. Tolg'aq tutqan hayalday, Shanshıw ha'm azap biylep aldı.
25 Atızlarg'a shıqpan', jollarda ju'rmen'! Dushpannın' qolında qılısh bar, A'tiraptı qorqınısh orap alg'an.
26 Ha'y, menin' xalqım! Aza kiyimin kiyip, ku'lge otır. Jalg'ız perzent ushın aza tutqanday, Ashshı-ashshı ko'z jas to'k. Sebebi u'stimizge tosattan nabıt qılıwshı keledi.
27 – Men seni xalqım arasına, Temirdi sınag'anday etip, Xalqımdı sınaw ushın qoydım. Sen olardı baqlap, jollarına baha beresen'.
28 Olardın' ha'mmesi bag'ınbaytug'ın qozg'alan'shı, O'sekshi adamlar. Olar qola ha'm temirdey qattı, Ba'ri joldan shıqqan.
29 Ko'rik toqtawsız u'plenip, Otta qorg'asın erip atır. Biraq zergerdin' bul isi biyhuda ketti, Sonda da jawızlıqtan ajıratılmadı.
30 Olardı «sıpatsız gu'mis» dep ataydı. O'ytkeni Men, Jaratqan İye olardan ju'z burdım.
