Eremiya 7 bob
1 Eremiyag'a Jaratqan İyeden mınaday so'z tu'sti:
2 – Jaratqan İyenin' İbadatxanasının' da'rwazasında turıp, mına so'zdi ja'riyala: «Ha'y, pu'tkil Yahuda xalqı, Jaratqan İyege sıyınıw ushın mına da'rwazalardan kirgenler! Jaratqan İyenin' so'zin tın'lan'!
3 İzraildın' Qudayı A'lemnin' Jaratqan İyesinin' so'zi mınaw: Jolların'ızdı ha'm is-ha'reketin'izdi tuwrılan'. Sonda Men sizlerge bul jerde jasawg'a ruxsat beremen.
4 „Bul Jaratqan İyenin' İbadatxanası, bul Jaratqan İyenin' İbadatxanası, Jaratqan İyenin' İbadatxanası usı jerde“, – degen jalg'an so'zlerge isenben'.
5 Eger jolların'ızdı, islerin'izdi pu'tkilley du'zetsen'iz, bir-birin'izge a'dalatlı bolsan'ız,
6 kelgindige, jetimge ha'm jesirge zulımlıq qılmasan'ız, bul jerde nahaq qan to'kpesen'iz, o'zlerin'izge zıyan keltiretug'ın basqa qudaylarg'a awıp ketpesen'iz,
7 onda Men sizlerge bul jerde, a'welden ata-babaların'ızg'a bergen jerde ma'n'gi-baqıy jasawın'ızg'a ruxsat beremen.
8 Degen menen, sizler paydasız jalg'an so'zlerge isenip ju'rsiz.
9 Sizler urlıq qılasız, adam o'ltiresiz, neke hadallıg'ın buzasız, jalg'an ant ishesiz, Baalg'a arnap, xosh iyisli tu'tetki tu'tetesiz, tanımaytug'ın basqa qudaylarg'a eresiz.
10 Keyin bul jerkenishli islerdi dawam etiw ushın, Menin' atım menen atalg'an mına u'yge kelip, aldımda turıp: „Bizler aman-esenbiz“, – deysizler me?
11 Menin' atım menen atalg'an bul u'y sizler ushın qaraqshılar ma'kanına aylandı ma? Degen menen, Men ne islep atırg'anın'ızdı ko'rip turman, – deydi Jaratqan İye.
12 – Endi Shilog'a, Men O'z atımdı da'slepki ret ornatqan jerge barın' ha'm xalqım İzraildın' jawızlıg'ı sebepli og'an ne qılg'anımdı ko'rin'.
13 Bulardın' ha'mmesin sizler de isledin'iz, – deydi Jaratqan İye. – Men sizlerge qayta-qayta ayttım, qulaq salmadın'ız, shaqırdım, juwap bermedin'iz.
14 Solay eken, Men Shilog'a ne qılg'an bolsam, Menin' atım menen atalg'an, sizler isengen bul İbadatxanag'a, sizlerge ha'm ata-babaların'ızg'a bergen bul jerge sonı qılaman.
15 Tuwısqanların'ızdı, pu'tkil Efrayım na'sillerin aldımnan qalay quwg'an bolsam, sizlerdi de solay quwaman».
16 – Eremiya, sen bul xalıq ushın duwa etpe, olar ushın pa'riyad qılma, jalınba, Mag'an ta'welle salma. Ba'ri bir Men seni tın'lamayman.
17 Yahuda qalalarında, Erusalim ko'shelerinde olardın' ne islep atırg'anın ko'rip turg'anın' joq pa?
18 Balalar otın jıynaydı, a'keler ot jag'adı, hayallar qamır iylep, Aspan xanshasına arnap mazalı nan pisiredi. Menin' g'a'zebimdi keltiriw ushın, bul xalıq basqa qudaylarg'a ishimlik sadaqasın quyadı.
19 Olardın' ashıwg'a tiymekshi bolg'anı Men be? – deydi Jaratqan İye. – Yaq, olar o'zlerine za'lel keltirip, uyatqa qalmaqta.
20 Sol sebepli Quday İye bılay deydi: – Men ashıw-g'a'zebimdi bul jerge, adamlar menen haywanlardın', atızdag'ı ag'ashlar menen jerdin' o'niminin' u'stine to'gemen. G'a'zebim ot bolıp janar, ol so'ndirilmes.
21 zraildın' Qudayı, A'lemnin' Jaratqan İyesi bılay deydi: – Jandırılatug'ın qurbanlıqların'ızdı basqa qurbanlıqların'ızg'a qosıp, ekewinin' de go'shin jey berin'.
22 O'ytkeni Men ata-babaların'ızdı Mısırdan alıp shıqqanımda, jandırılatug'ın qurbanlıq ha'm basqa qurbanlıqlar tuwralı hesh na'rse aytpadım, buyrıq ta bermedim.
23 Men olarg'a tek mına buyrıqtı bergen edim: «Mag'an qulaq salın'. Sonda Men sizlerdin' Qudayın'ız, sizler de Menin' xalqım bolasız. Ba'rqulla Men buyırg'an joldan ju'rin', sonda abadan turmısqa erisesiz».
24 Biraq olar tın'lamadı, Mag'an dıqqat awdarmadı. Kerisinshe, o'z qa'lewi ha'm jawız ju'reginin' o'jetligi jolında ju'rdi. Alg'a ilgerilewdin' ornına, artqa ketti.
25 Ata-babaların'ız Mısırdan shıqqan ku'nnen tap usı ku'nge shekem, Men olarg'a barlıq qullarımdı – payg'ambarlardı ha'r ku'ni izli-izinen jiberdim.
26 Sonda da olar Meni tın'lamadı, na'zer de awdarmadı. Olar moyın tawlap, ata-babalarınan da beter jamanlıq qıldı.
27 Sen olarg'a usı so'zlerdin' ha'mmesin aytasan', biraq olar seni tın'lamaydı. Sen olardı shaqırasan', biraq olar juwap bermeydi.
28 Sonlıqtan sen olarg'a bılay dep ayt: «Bul Qudayı Jaratqan İyenin' so'zine qulaq aspag'an, ta'lim-ta'rbiyanı qabıl almag'an millet! Haqıyqat o'ldi, olardın' awzınan haq so'z shıqpaytug'ın boldı.
29 Erusalim xalqı, shashın'ızdı kesip ılaqtırın', Taqır to'belerge shıg'ıp, joqlaw aytın'. Sebebi g'a'zebine ushırag'an bul a'wladtı, Jaratqan İye ta'rk etip, taslap ketti.
30 Yahuda xalqı Menin' na'zerimde jaman isler isledi, – deydi Jaratqan İye. – Olar Menin' atım menen atalg'an u'yge jerkenishli butlardı qoyıp, onı haramladı.
31 Ul-qızların otta jag'ıp qurbanlıq qılıw ushın, Ben- Hinnom oypatlıg'ındag'ı Tofette sıyınıw orınların qurdı. Bulardı Men buyırmadım, bular oyıma kirip te shıqpadı.
32 Endi sonday ku'nler keledi, – deydi Jaratqan İye, – Ol jer Tofet yamasa Ben-Hinnom oypatlıg'ı delinbeydi, al Bawızlaw oypatlıg'ı dep ataladı. Tofette jerlewge orın qalmag'ansha, o'liler jerlenedi.
33 Bul xalıqtın' o'li deneleri aspandag'ı quslarg'a ha'm jerdegi jabayı haywanlarg'a jem boladı. Olardı u'rkitetug'ın hesh kim qalmaydı.
34 Yahuda qalalarında ha'm Erusalim ko'shelerinde quwanısh ha'm shadlıq seslerin, kelin-ku'yewdin' toyının' sestin esitilmeytug'ın qılaman. Ol jer qarabaqanag'a aylanadı».
