Joqlaw 2 bob
1 A'ttegene-ay! Qalayınsha İye g'a'zep atına minip, Qız Siondı qara bult penen qapladı. Ol İzraildın' go'zzallıg'ın, Ko'klerden jerge ılaqtırdı. Qa'ha'ri kelgen ku'ni, Ayaq qoyg'ıshı bolg'an İbadatxananı eske almadı.
2 Yaqıptın' urpaqlarının' pu'tkil ma'kanların, İye ayawsız jalmap juttı. G'a'zebi kelip, qırıp tasladı, Qız Yahudanın' qorg'anlı qalaların. Patshalıg'ın ha'm hu'kimdarların, Xorlap, jer menen jeksen qıldı.
3 G'a'zebi qaynap, İzraildın' pu'tkilley shaqın sındırdı. Dushpan hu'jim qılg'anda, On' qolın İzraildın' u'stinen tartıp aldı. Do'gerekti jalmaytug'ın jalınday bolıp, Yaqıptın' jurtın jandırıp jiberdi.
4 Ol dushpan kibi oq jayın tartıp, Jaw kibi on' qolın iske saldı. Ko'zge jag'ımlı ko'ringenlerdin' ha'mmesin o'ltirip, Qız Sionnın' shatırının' u'stine, G'a'zebin ot kibi to'kti.
5 İye dushpanday bolıp, İzraildı jalmap juttı. Barlıq sarayların jalmap jutıp, Qorg'anlı qalaların wayran etti. Qız Yahudanın' pa'riyadın, Ahıw-nalasın arttırdı.
6 İbadatxanasın bag'dag'ı qostay etip qulattı, Jıynalatug'ın orındı qarabaqanag'a aylandırdı. Jaratqan İye Sionda belgilengen bayramlardı, Shabbat ku'nlerin umıttırdı. Qa'ha'r-g'a'zepke minip, Patsha ha'm ruwxaniylerden ju'z burdı.
7 İye O'z qurbanlıq ornınan waz keshti, Muxaddes ma'kanın ta'rk etti. İbadatxana imaratın, Dushpan qolına berdi. Jaratqan İyenin' U'yinen shıqqan dushpan shawqımı, Bayram ku'nindegi dawısqa megzedi.
8 Jaratqan İye qız Sionnın' diywalın, Wayran qılıwdı sheshti. Ol jaqsılap jobalastırdı, Irayınan qaytpay, ha'mmesin nabıt qıldı. Solay etip, sırtqı ha'm ishki diywallar aza tutpaqta, Ekewi de haldan taydı.
9 Da'rwazasın topıraqqa bılg'ap, İye ta'mbilerin sındırıp, joq qıldı. Patshasın ha'm ko'semlerin, Jat milletler arasına su'rgin qıldı. Endi xalıqqa Qudaydın' nızamları u'yretilmeydi, Payg'ambarlarına da Jaratqan İyeden ayan kelmeydi.
10 Qız Sionnın' aqsaqalları, Til qatpastan jerde otırıptı, Baslarına topıraq shashıp, Aza kiyimin kiyip alg'an. Basların to'men salbıratıp alg'an, Erusalimnin' jas qızları da.
11 Jas to'giwden ko'zlerim taldı, Qa'lbim o'rtenbekte. Xalqımnın' nabıt bolg'anı zardabınan, Ju'regim tilkim-tilkim bolmaqta. Sebebi qala ko'shelerinde, Balalar ha'm na'resteler esten tanıp jatırıptı.
12 Olar: «Nan menen suw ber», – dep, Analarına pa'riyad qılmaqta, Jaradar kibi, qala ko'shelerinde esten tanıp, Analarının' bawırında jan ta'slim qılmaqta.
13 Men sag'an ne aytayın? Seni nege megzeteyin, o, qız Erusalim? O, pa'k qız Sion! Jubatıwım ushın, seni nege ten'eyin? Jaraqatın' ten'izdey teren', Sag'an kim shıpa bere aladı?
14 Payg'ambarların' ko'rgen ayanlar, Jalg'an ha'm ma'nissiz bolıp shıqtı. Abadanshılıg'ın'dı qayta tiklew ushın, Qılmısların'dı betin'e aytpadı. Olar ko'rgen jalg'an ayanlar, Seni joldan shıg'ardı.
15 Joldan o'tkenler qol shoshaytıp, Qız Erusalim, seni tabalap, bas shayqap: «Go'zzallıq ko'rki, Pu'tkil du'nyanın' quwanıshı delingen qala usı ma?» – deydi.
16 Barlıq dushpanlar sag'an awzın ken' ashıp, Tabalap, tislerin qayraydı. «Bizler onı jalmap juttıq! Mine, biz ku'tken ku'n! Aqırı bul ku'nge de jettik, onı ko'rdik!» – deydi.
17 Jaratqan İye O'z niyetin a'melge asırdı. A'yyemgi zamanlarda aytqanınday, Aytqan so'zin orınladı, Seni ayawsız nabıt qıldı. Awhalın'a dushpanlardı shad qıldı, Jawların'dı ku'shke toltırdı.
18 İyege qattı jalbarın! Ha'y, qız Sionnın' diywalı! Ku'ndiz-tu'ni ko'z jasın'dı da'rya kibi ag'ız, O'zin'e tınıshlıq berme, Ko'z jasın' hasla toqtamasın!
19 Tur, tu'ni menen qayta-qayta jalbarın, Kewlin'degini İye da'rgayında suw kibi to'k! Ha'r bir ko'shenin' basında, ashlıqtan qulap atırg'an, Perzentlerin'nin' janı ushın, Qol jayıp, Og'an jalbarın.
20 Qara, Jaratqan İye, xalqın'nın' awhalın ko'r! Qaysı xalıqtı bunday awhalg'a salg'an edin'? Hayallar erkeletip o'sirgen balaların jey ala ma? Ruwxaniy ha'm payg'ambarlar Muxaddes ma'kanda o'ltirile me?
21 Jası-g'arrısı ko'shede shan'g'a bılg'anıp jatır, Qız-jigitlerim qılıshtan qırıldı. G'a'zebin' kelgen ku'ni Sen olardı o'ltirdin', Ha'mmesin ayawsız bawızladın'.
22 Belgilengen bayram ku'nindegidey shaqırıp, Ha'r ta'repten mag'an qarsı dushpanlardı jıynadın'. Jaratqan İyenin' g'a'zebi kelgen ku'ni, Hesh kim qashıp qutıla almadı, Birde birewi jan saqlap qala almadı, Erkeletip o'sirgenlerimdi dushpanım qırıp tasladı.
