Joqlaw 3 bob
1 Qudaydın' g'a'zep tayag'ın jep, Azap shekken adamman men.
2 Ol meni aydap aparıp, Jaqtı tu'speytug'ın qaran'g'ılıqta ju'rgizdi.
3 Pu'tkil ku'n dawamında qayta-qayta, Tek mag'an qarsı qolın ko'terdi.
4 Etimdi, terimdi tozdırıp, Su'yeklerimdi sındırdı.
5 Meni qamal qılıp, Ha'siretli awırmanlıq penen qorshap aldı.
6 A'zelde a'lemnen o'tkenler sıyaqlı, Meni qaran'g'ılıqta jasawg'a ma'jbu'rledi.
7 Qashpawım ushın, a'tirapımdı diywal menen qorshadı, Awır shınjırlar menen kisenledi.
8 Pa'riyad etip, jalbarıng'anımda da, Ol duwamdı qabıl qılmadı.
9 Jonılg'an taslar menen jolımdı tosıp, Soqpaqlarımdı bılg'astırıp tasladı.
10 Quday men ushın buqqıdag'ı ayıwg'a, Jasırın jatqan arıslang'a uqsaydı.
11 Ol meni jolımnan shıg'arıp, tilkimledi, Da'rmansız jalg'ız qaldırdı.
12 Oq jayın kerip, Meni og'ına nıshan qıldı.
13 Oq qaltasınan oqlar alıp atıp, Bawırımdı testi.
14 Men pu'tkil xalqıma ku'lki bolıp, Ku'n boyı aytatug'ın qosıg'ına aylandım.
15 Ol meni ashshı ha'siretke toydırıp, Juwsannın' ashshı suwın ishtirdi.
16 O'zimdi topıraqqa bılg'ap, Tas penen tislerimdi sındırdı.
17 Janım tınıshlıqtan mahrum boldı, Baxıttın' ne ekenin umıttım.
18 O'zime o'zim: «Shıdamım tawısıldı, Jaratqan İyege bolg'an u'mitim so'ndi», – dedim.
19 Azabım ha'm sergizdanlıg'ım tuwralı oylasam, Ashshı juwsan ha'm za'ha'r ishkendey bolaman.
20 Janım bunı u'zliksiz eske alıp, İshimde ezilip atır.
21 Biraq mınanı ju'regime tu'yip, Sonnan u'mit etemen:
22 Jaratqan İyenin' su'yispenshiligi sebepli, Biz joq bolıp ketpedik, Onın' rehimliligi tawısılmaydı.
23 Ha'r ku'ni azanda olar jan'ara beredi, Onın' sadıqlıg'ı ullı!
24 Men ishimnen: «Jaratqan İye – menin' bar-jog'ım, Sonlıqtan men Og'an u'mit baylayman», – dedim.
25 Jaratqan İye O'zine u'mit baylag'anlarg'a, O'zin izlegenlerge jaqsılıq qıladı.
26 Jaratqan İyenin' qutqarıwın, U'nsiz ku'tken jaqsı.
27 Jaslıqta moyıntırıqqa u'yrengen jaqsı.
28 Adam u'nsiz, jalg'ız otırsın, Sebebi bul awırmanlıqtı Jaratqan İye saldı.
29 Et betinen jerge jıg'ılsın, Ba'lkim, ele u'mit bar shıg'ar.
30 O'zin urg'ang'a shekesin tutsın, Ko'rgen xorlıqtı ishine jutsın.
31 Sebebi İye, ma'n'gige taslap qoymaydı.
32 Ol qayg'ı keltirgen bolsa da, Ullı miyrimi menen rehim qıladı.
33 Adamzattı jazalap, azar berse de, Bulardı Ol ju'rek qa'lewi menen qılmaydı.
34 U'lkedegi barlıq tutqınlar, Ayaq astında ezilgende,
35 Quday Taalanın' da'rgayında, Adam huqıqınan mahrum bolg'anda,
36 Dawa isinde adamg'a a'dalatsızlıq qılıng'anda, İye bulardı ko'rmey me?
37 Bulardı İyenin' O'zi buyırmasa, Kim aytıp, ju'zege asıradı?
38 Jamanlıq ta, jaqsılıq ta, Quday Taalanın' awzınan shıqpay ma?
39 O'z gu'naları ushın jazasın alsa da, Tiri qalg'an eken, adam nege shag'ım etsin?
40 Jollarımızdı tekserip, sınap ko'reyik, Jaratqan İyege qaytıp barayıq.
41 Kelin', ko'klerdegi Qudayg'a qollarımızdı sozıp, Ju'regimizdi ashıp bılay deyik:
42 «Bizler qılmıs islep, bas ko'terdik, Sen de bizlerdi keshirmedin'.
43 G'a'zepke minip, bizlerdi quwdaladın', Ayawsız o'ltirdin'.
44 Duwalarımız esitilmewi ushın, O'zin' bultlarg'a bu'rkenip aldın'.
45 Bizlerdi milletler arasında, Taslandı ha'm sıpırındıqqa aylandırdın'.
46 Barlıq dushpanlarımız awzın ken' ashıp, Bizlerdi tabaladı.
47 Qa'wip ha'm hiyle, Qıyraw ha'm wayranshılıq basımızg'a tu'sti».
48 Xalqımnın' nabıt bolg'anı sebepli, Ko'z jaslarım sel bolıp ag'adı.
49 Ko'z jasım toqtamay, u'zliksiz ag'a beredi,
50 Jaratqan İye ko'klerden na'zer salıp, ko'rmegenshe.
51 Qalamdag'ı barlıq qızlardın' awhalın ko'rip, Ju'regim qayg'ı-ha'siretke batqan.
52 Hesh qanday sebepsiz, Dushpanlarım meni qustay awladı.
53 Janımdı alıw ushın shuqırg'a tasladı, U'stimnen tas attı.
54 Suw basımnan asıp ketti, Men, o'ldim dep oyladım.
55 Shuqırdın' tu'binen, Atın'dı aytıp shaqırdım, o, Jaratqan İye.
56 «Qulag'ın'dı jawma, dadımdı esit», – dedim. Sen jalbarıng'anımdı esittin'.
57 Shaqırg'anımda, Sen mag'an jaqınlap: «Qorqpa», – dedin'.
58 İye, Sen dawa-arzımdı qorg'ap, O'mirimdi saqlap qaldın'.
59 Jaratqan İye, mag'an qılıng'an nahaqlıqtı Sen ko'rdin', Dawama haq hu'kimin'di shıg'ar.
60 Olardın' qalay o'sh almaqshı ekenin, Mag'an qarsı du'zgen jobasın ko'rdin'.
61 Jaratqan İye, olardın' meni qalay xorlag'anın, Mag'an qarsı du'zgen jobasın,
62 Dushpanlardın' ku'n boyı menin' u'stimnen, Qalay ga'p qılg'anların esittin'.
63 Olarg'a na'zer sal! Otırsa da, tursa da, Meni qosıq qılıp, u'stimnen ku'ledi.
64 Olarg'a qolları menen islegen isine jarasa, Jazasın ber, Jaratqan İye!
65 Olardın' ju'reklerin tu'nekke bu'rke, Senin' g'arg'ısın' u'stilerine jawsın!
66 G'a'zep penen olardın' izinen qalmay, Ko'klerin'nin' astınan olardı joq qıl, Jaratqan İye!
