Joqlaw 5 bob
1 O, Jaratqan İye, basımızg'a tu'skenler tuwralı oylap ko'r. Qara, qanday xor bolg'anımızdı ko'r!
2 Bizge bergen jerin' jat jerlilerge, U'ylerimiz kelgindilerge qaldı.
3 Bizler a'kesiz jetim bolıp qaldıq, Analarımız jesirge aylandı.
4 Suwımızdı pul to'lep ishemiz, Otınımızdı da satıp alamız.
5 Moynımızg'a moyıntırıq salıp jumsamaqta, Qattı sharshadıq, tınıshlıqtan juda bolg'anbız.
6 Qarnımızdı toydırıw ushın, Mısır menen Assiriyag'a qol sozdıq.
7 Ata-babalarımız gu'na isledi, biraq endi o'zleri joq. Bizler bolsaq, olardın' qılmısı ushın jazalanbaqtamız.
8 Qullar u'stimizden hu'kimdarlıq qılmaqta, Olardın' qolınan qutqaratug'ın hesh kim joq.
9 Daladag'ı qaraqshının' qılıshı sebepli, Janımızdı qa'wip astına qoyıp nan tabamız.
10 Ashlıqtın' da'rtinen, Tandırdan shıqqanday laplap tur terimiz.
11 Sionda hayallardın', Yahuda qalalarında qızlardın' namısına tiydi.
12 Jolbasshılarımız olardın' qolı menen asıp qoyıldı, Aqsaqallarımız hu'rmet etilmedi.
13 Jigitler digirman tartpaqta, Balalar awır otın astında tentireklemekte.
14 Aqsaqallar qala da'rwazasında ma'sla'ha'tlesip otırmaytug'ın boldı, Jas jigitler artıq qosıq aytpaytug'ın boldı.
15 Ju'regimizdi shadlıq ta'rk etti, Oyın-ku'lkimiz azag'a aylandı.
16 Basımızdan tajımız tu'sip qaldı, Gu'na islegenimiz ushın sorımız qurıdı!
17 Ju'regimiz tu'n'ildi, Jılay berip, ko'zlerimiz gu'n'girtlesti.
18 Sebebi Sion tawı hu'wlep bosap qaldı, Sag'allar ol jerde ızg'ıp ju'r.
19 Sen bolsan', o, Jaratqan İye, ma'n'gige hu'kimdarlıq qılasan', Senin' taxtın' a'wladtan-a'wladqa dawam etedi.
20 Nege Sen bizlerdi pu'tkilley umıttın'? Nege bizlerdi uzaq waqıt taslap qoydın'?
21 Jaratqan İye, bizlerdi O'zin'e qaytar, Bizler qaytayıq, Bizlerge burıng'ı ku'nlerimizdi qaytarıp ber.
22 Sen bizlerden pu'tkilley waz keshken bolsan' da, G'a'zebin' sheksiz bolsa da, solay qıl.
