Ezekiel 10 bob
1 Men kerublardın' u'sti betindegi gu'mbezdin' joqarısında lazuritten islengen taxtqa uqsag'an bir na'rseni ko'rdim.
2 Jaratqan İye zıg'ır kiyimli adamg'a: – Kerublar astındag'ı do'n'gelekler arasına kir. Kerublar arasında janıp turg'an ko'mirden bir qosıwıs alıp, onı qalag'a shash, – dedi. Ol adam do'n'gelekler arasına kirdi, men ko'rip turdım.
3 Ol adam kirgende, kerublar İbadatxananın' qubla ta'repinde turg'an edi. İshki ha'wli bultqa toldı.
4 Jaratqan İyenin' saltanatı kerublardan ayırılıp, İbadatxananın' bosag'asına kelip turdı. İbadatxana bultqa toldı, al ha'wli Jaratqan İyenin' saltanatının' nurına toldı.
5 Kerublardın' qanatlarının' dawısı Qu'direti ku'shli Qudaydın' so'ylegendegi dawısına uqsap, sırtqı ha'wliden esitilip turdı.
6 Jaratqan İye zıg'ır kiyimli adamg'a: «Do'n'geleklerdin' arasınan, kerublardın' arasınan ot alıp shıq», – dep buyrıq bergende, adam kirip, do'n'gelektin' arasında turdı.
7 Sonda kerublardın' biri o'zlerinin' janındag'ı otqa qolın sozıp, biraz ot alıp zıg'ır kiyim kiygen adamnın' alaqanına saldı. Adam ottı alıp, ol jerden shıqtı.
8 Kerublardın' qanatları astında adamnın' qolına uqsag'an na'rse ko'rindi.
9 Qarag'anımda, kerublardın' janında to'rt do'n'gelekti ko'rdim. Ha'r bir kerubtın' janında bir do'n'gelekten bolıp, do'n'gelekler sarı yaqıt kibi jaltıldar edi.
10 Olardın' to'rtewinin' de ko'rinisi birdey bolıp, ha'r do'n'gelektin' ishinde kesesine salıng'an ja'ne bir do'n'gelekten bar edi.
11 Olar qozg'alg'anda, to'rt ta'repke de ha'reket ete alatug'ın edi. Bas qay jaqqa bag'ıtlansa, olar burılmastan, sol jaqqa ju'rdi. Ju'rgende olar hesh jaqqa burılmadı.
12 Olardın' pu'tkil denesi, arqası, qolları, qanatları ha'm do'n'gelekleri, barlıq to'rt do'n'gelegi de ko'zler menen qaplang'an edi
13 Do'n'geleklerdin' «quyın» dep aytılatug'ının esitip qaldım.
14 Olardın' ha'r birinin' to'rt bet-a'lpeti bar edi: birinshi bet-a'lpeti – kerubtiki, ekinshisi – adamdiki, u'shinshisi – arıslandiki, to'rtinshisi – bu'rkittiki edi.
15 Kerublar ko'terildi. Olar menin' Kebar kanalı boyında ko'rgen janzatlarım edi.
16 Kerublar ju'rgende, janındag'ı do'n'gelekler de ju'retug'ın edi. Kerublar jerden ko'teriliw ushın qanatların jayg'anda, do'n'gelekler de olardan ayırılmay ju'rdi.
17 Janzatlardın' ruwxı do'n'geleklerde bolg'anlıqtan, olar toqtag'anda, do'n'gelekler de toqtaytug'ın, olar ko'terilgende, do'n'gelekler de ko'teriletug'ın edi.
18 Jaratqan İyenin' saltanatı İbadatxananın' bosag'asınan ketip, kerublardın' u'stinde turdı.
19 Kerublar qanatların qag'ıp, menin' ko'z aldımda jerden ko'terildi. Do'n'gelekler de olar menen birge ko'terilip, Jaratqan İyenin' U'yinin' shıg'ıs da'rwazasının' kirer awzında toqtadı. İzraildın' Qudayının' saltanatı olardın' u'stinde edi.
20 Bul janzatlardı men Kebar kanalı boyında, İzraildın' Qudayının' to'mengi jag'ında ko'rgen edim. Men olardın' kerublar ekenin endi bildim.
21 Ha'r bir kerubtın' to'rt bet-a'lpeti, to'rt qanatı ha'm qanatlarının' astında adam qolına uqsag'an qolları bar edi.
22 Olardın' bet-a'lpeti de, ko'rinisi de, o'zleri de men sol Kebar kanalı boyında ko'rgenlerime uqsaytug'ın edi. Ha'r biri tuppa-tuwrı aldıg'a qaray ju'retug'ın edi.
