Ezekiel 14 bob
1 İzrail aqsaqallarının' bazıları kelip, aldıma otırdı.
2 Sonda Mag'an Jaratqan İyeden so'z tu'sti:
3 – İnsan ulı, mına adamlar o'z butların ju'rek to'rine jaylap, azg'ırıwshını o'zlerinin' aldına qoydı. Solay eken, Mennen ma'sla'ha't sorawına qalay jol qoyaman?
4 Sonlıqtan olar menen so'ylesip, olarg'a ayt: «Quday İye bılay deydi: O'z butların ju'rek to'rine jaylap, azg'ırıwshını o'zlerinin' aldına qoyg'an İzrail xalqınan bir adam payg'ambardın' aldına kelse, Men, Jaratqan İye og'an butlarının' ko'pligine jarasa juwap beremen.
5 Solay etip, butları sebepli Mag'an jat bolg'an İzrail xalqının' ju'regin O'zime qarataman»
6 – Sonlıqtan İzrail xalqına ayt: «Quday İye bılay deydi: Ta'wbe qılın', butların'ızdan waz keshin' ha'm pu'tkil jerkenishli zatların'ızdan ju'z burın'.
7 Eger İzrail xalqınan bolg'an birew yamasa İzrailda jasap atırg'an kelgindilerden biri Meni ta'rk etse, o'z butların ju'rek to'rine jaylap, azg'ırıwshını o'zinin' aldına qoysa ha'm Mennen ma'sla'ha't soraw ushın payg'ambarg'a kelse, onda Men, Jaratqan İye, og'an O'z juwabımdı beremen.
8 Men sol adamg'a qarsı shıg'aman, onı eskertiwshi mısalg'a ha'm a'psanag'a aylandıraman, onı xalqımnın' arasınan joq qılaman. Sonda Menin' Jaratqan İye ekenimdi bilip alasız.
9 Eger payg'ambar joldan azıp, bir so'z aytsa, onda sol payg'ambardı Men, Jaratqan İye azg'ırg'an bolaman. Men og'an qarsı qolımdı ko'terip, xalqım İzraildın' arasınan joq qılaman.
10 Payg'ambar da, onnan ma'sla'ha't sorap kelgen de jazasın aladı. Ekewi birdey ayıplı.
11 Sonda İzrail xalqı Mennen ayırılmaydı ha'm gu'naları menen o'zlerin haramlamaydı. Olar Menin' xalqım, Men olardın' Qudayı bolaman, – deydi Quday İye».
12 Mag'an Jaratqan İyeden so'z tu'sti:
13 – İnsan ulı, eger bir el qıyanet etip, Mag'an qarsı gu'na islese, Men og'an qarsı qolımdı ko'teremen, olardı bir tislem nang'a zar qılıp, ashlıqqa duwshar qılaman. Eldegi adam ha'm haywanlardı qırıp taslayman.
14 Eger mına u'sh adam: Nux, Daniel ha'm Ayup sol jerde bolg'anda da, olar a'dilligi menen tek o'zlerinin' janların g'ana qutqarıp qalg'an bolar edi, – deydi Quday İye.
15 – Eger Men sol jerge jırtqısh haywanlardı jibersem, olar sol jerdi adamsız qılsa ha'm sol jer jırtqıshlar sebepli bosap, adam ayaq baspaytug'ın bolıp qalsa,
16 sonda usı u'sh adam olardın' arasında bolsa, Men Quday İye, tiriligim haqı ant ishemen: olar o'zlerinen basqa hesh kimdi, ha'tte, ulların da, qızların da qutqara almas edi. Jer bolsa qan'ırap bos qalar edi.
17 Yamasa, Men sol jerge qılısh jiberip: «Qılısh, el boylap o't!» – desem ha'm ondag'ı adamlar menen haywanlardı qırsam,
18 sonda usı u'sh adam olardın' arasında bolsa, Men Quday İye, tiriligim haqı ant ishemen: olar o'zlerinen basqa hesh kimdi, ha'tte, ulların da, qızların da qutqara almas edi.
19 Bolmasa, Men bul elge illet jibersem, yamasa qan to'giw ushın g'a'zebimdi to'gip, adamlardı ha'm haywanlardı qırıp taslasam,
20 Men Quday İye, tiriligim haqı ant ishemen: Nux, Daniel ha'm Ayup olardın' arasında bolsa da, olar ulların da, qızların da qutqara almas edi. Tek a'dilligi menen o'zlerinin' janın g'ana qutqara alar edi.
21 Al endi Quday İye bılay deydi: Erusalimdegi adamlardı ha'm haywanlardı joq qılıw ushın, olarg'a bunnan da beter to'rt awır jazanı: qılısh, ashlıq, jırtqısh haywanlar ha'm illet jiberemen.
22 Degen menen ayırım adamlar aman qaladı. Aman qalg'an erkek ha'm hayallar ol jerden shıg'ıp, Babilong'a, aldın'ızg'a keledi. Sizler olardın' ju'ris-turısın ha'm islerin ko'rgenin'izde, Men Erusalimge nege usınday apatlardı jibergenimdi tu'sinip, olardın' basına salg'an ha'mme na'rseden ta'selle tabasız.
23 Awa, olardın' ju'ris-turısın ha'm islerin ko'rip ta'selle tabasız. Sizler Menin' Erusalimde islegen barlıq islerimnin' qurıdan-qurı islenbegenin bilesiz, – deydi Quday İye.
