Ezekiel 17 bob
1 Mag'an Jaratqan İyeden so'z tu'sti:
2 – İnsan ulı! İzrail xalqına jumbaqlap tımsal aytıp ber.
3 Olarg'a ayt: «Quday İye bılay deydi: U'lken qanatlı, uzın pa'rli, mamıq, ala-shubar bir aybatlı bu'rkit Lebanong'a ushıp kelip, kedr ag'ashının' to'besin bu'rip,
4 en' joqarg'ı shaqasın julıp aldı. Onı sawdagerlerdin' eline alıp barıp, alıp satarlardın' qalasına otırg'ızdı.
5 Keyin u'lkenin' tuqımınan alıp, o'nimdar topıraqqa ekti. Onı mol suwlar boyına, tal sıyaqlı otırg'ızdı.
6 Ol o'sip, shaqaları jayılg'an, kelte boylı ju'zim ag'ashına aylandı. Onın' shaqaları bu'rkitke qaray iyildi, tamırı o'z ornında qaldı. Solay etip, ol shaqalag'an, qoyıw japıraqlı ag'ash bolıp o'sti.
7 Biraq u'lken qanatlı, mamıq pa'rli basqa bir bu'rkit te bar edi. Ju'zim ag'ashı suw izlep, otırg'ızılg'an ornınan tamırın og'an qaray burdı ha'm shaqaların og'an sozdı.
8 Ju'zim ag'ashı shaqalap, miywe berip, sawlatlı bolatug'ınday, mol suwlar boyına, o'nimdar topıraqqa egilgen edi».
9 – Olarg'a ayt: «Quday İye bılay deydi: Endi bul ju'zim ag'ashı g'awlap o'se me eken? Birinshi bu'rkit onı tamırı menen suwırıp, solqımların julıp, solıtıp taslamay ma? Onın' tazadan o'sken shaqaları quwrap qaladı. Ag'ashtı tamırı menen suwırıp alıw ushın, u'lken ku'sh yaki ko'p sanlı la'shker kerek bolmaydı.
10 Ol ko'shirip egilse de, g'awlap o'se me eken? Shıg'ıs samalı eskende, quwrap qalmay ma? Ag'ash o'sken qarıg'ında-aq solıp qaladı».
11 Mag'an Jaratqan İyeden so'z tu'sti:
12 – Qozg'alan'shı xalıqqa: «Bulardın' ma'nisin bilmeysiz be?» – dep ayt. Olarg'a bılay dep ayt: «Mine, Babiloniya patshası Erusalimge kelip, onın' patshasın ha'm ha'meldarların Babilong'a alıp ketti.
13 Ol patsha a'wladınan birewin tan'lap, onın' menen pitim du'zdi ha'm ant ishtirip pitimdi bekitti. Ol eldegi barlıq basshılardı tutqın etip alıp ketti.
14 Patshalıqtın' boysınıwshan' bolıwı, ko'terilis qılmawı ha'm pitim saqlanıp qalıp, bekkem bolıwı ushın ol usılay isledi.
15 Biraq taza qoyılg'an patsha atlar menen adamlar beriwin sorap, Mısırg'a elshilerin jiberdi ha'm usı isi arqalı Babilong'a qarsı shıqtı. Bul adam tabısqa erise alar ma eken? Bunı islegen adam aman qalar ma eken? Ol pitimdi buzdı, endi aman qala ma?
16 Men, Quday İye tiriligim haqı ant ishemen: ishken antınan qaytıp, du'zgen pitimin buzg'anı ushın, ol o'zin patsha etip taxtqa otırg'ızg'an patshanın' ma'kanında, Babilonda o'ledi.
17 Babiloniya patshası ko'plerdin' janın alıw ushın, diywalg'a topıraq u'ygende ha'm qamal minaraların qurg'anda, ullı ku'shi ha'm sansız xalqı bolsa da, faraon bul urısta ja'rdem bermeydi.
18 Ol du'zgen pitimin buzdı, ishken antınan taydı. Ol qol berisken bolsa da, bul islerdi qıldı. Endi ol qashıp qutıla almaydı.
19 Sonlıqtan Quday İye bılay deydi: O'z tiriligim haqı ant ishemen: Menin' aldımda ishilgen antqa nemquraydı qarag'anı ha'm Menin' aldımda du'zilgen pitimdi buzg'anı ushın, ondag'ı barlıq na'letlerdi onın' basına salaman.
20 Men og'an tor taslayman, ol Menin' duzag'ıma tu'sedi. Onı Babilong'a alıp barıp, Mag'an qarsı islegen opasızlıg'ı ushın hu'kim shıg'araman.
21 Onın' qashıp baratırg'an a'skerleri qılıshtan qaza tabadı, al qalg'anları samalg'a suwırıladı. Sonda bul so'zlerdi aytqan Men – Jaratqan İye ekenimdi bilip alasız.
22 Quday İye bılay deydi: Kedr ag'ashının' usha basınan bir shaqanı alıp otırg'ızaman. To'besindegi shaqasınan bir jas shıbıq alıp, onı u'lken ha'm ba'lent tawdın' to'besine egemen.
23 Onı İzraildın' ba'lent tawına otırg'ızaman. Ol shaqa jayıp, miywe beredi ha'm bir ullı kedr ag'ashına aylanadı. Barlıq quslar shaqalarına ma'kan basadı, ha'r qıylı qanatlı janzatlar shaqalarının' sayasın panalaydı.
24 Daladag'ı barlıq ag'ashlar biyik ag'ashtı jıg'atug'ın, pa's ag'ashtı biyikletetug'ın, jasıl ag'ashtı quwratatug'ın, quwrag'an ag'ashtı gu'llendiretug'ın bul – Men, Jaratqan İye ekenimdi bilip aladı. Men, Jaratqan İye aytaman ha'm ju'zege asıraman».
