1 Ol mag'an: – İnsan ulı, ornın'nan tur, Men senin' menen so'ylespekshimen, – dedi.
2 Dawıs mag'an so'ylep atırg'anda, mag'an Ruwx kirip alıp, meni ayaqqa turg'ızdı ha'm men so'ylep turg'annın' so'zlerin esittim.
3 Ol mag'an bılay dedi: – İnsan ulı, Men seni Mag'an qarsı bas ko'tergen qaysar millet, İzrail xalqına jiberemen. Olar ha'm olardın' ata-babaları usı ku'nge shekem Mag'an qarsı bas ko'terip kelmekte.
4 Bul xalıq qaysar ha'm o'jet. Men seni olarg'a jiberemen. Sen olarg'a: «Quday İye bılay dep atır», – deysen'.
5 Bul qozg'alan'shı xalıq so'zin'e qulaq sala ma, salmay ma, ba'ri bir o'zlerinin' arasında bir payg'ambardın' bolg'anın bilsin.
6 Al sen bolsan', ha'y insan ulı, olardan da, olardın' so'zlerinen de qorqpa. Ha'tte, tikenli putalar menen oshag'anlar a'tirapın'dı qorshap alsa da, shayanlar arasında jasasan' da qorqpa. Olardın' so'zlerinen qorqpa, ju'zlerinen aybınba, olar qozg'alan'shı xalıq.
7 Seni tın'lasa da, tın'lamasa da, olarg'a so'zlerimdi ayt. Olar qozg'alan'shı xalıq.
8 Sen bolsan', ha'y insan ulı, Menin' aytqanlarımdı tın'la, bul qozg'alan'shı xalıqqa uqsag'an qaysar bolma. Awzın'dı ashıp, Menin' sag'an beretug'ın na'rsemdi je.
9 Qarasam, mag'an qaray bir qol sozıldı. Qolda bir orama qag'az bar edi.
10 Qol orama qag'azdı aldıma ashıp qoydı. Onın' eki ta'repine de joqlaw, qayg'ı ha'm ha'siret so'zleri jazılg'an edi.
