Ezekiel 22 bob
1 Mag'an Jaratqan İyeden so'z tu'sti:
2 – Sen, insan ulı, hu'kim qıl, qanxor qalanı hu'kim qıl! Onın' islegen jerkenishli islerin aytıp ber.
3 Og'an Quday İye bılay deydi dep ayt: «Ha'y, o'z ishin'de qan to'gip, jaza ku'nin jaqınlatqan qala! Sen butlar sog'ıp, o'zin'di haramladın'!
4 To'kken qanın' menen ayıplı boldın', soqqan butların' menen haramlandın'. Ku'nlerin' jaqınlastı, jılların' payanına jetti. Sonın' ushın Men seni milletlerdin' mazaqlawına, pu'tkil ellerdin' u'stin'nen ku'liwine jol qoyaman.
5 Jaman at shıg'arg'an, g'awg'ag'a tolg'an qala, jaqındag'ılar da, alıstag'ılar da seni mazaqlaydı.
6 Mine, ishin'de jasap atırg'an ha'r bir İzrail hu'kimdarı o'z ha'melinen paydalanıp, qan to'gedi.
7 Qalada ata-anasın mensinbeydi, kelgindini ezedi, jetim ha'm jesirge zulımlıq qıladı.
8 Sen Menin' muxaddes na'rselerimdi hu'rmet etpedin', Shabbatıma biypa'rwa boldın'.
9 Aran'ızda jala jawıp, qan to'getug'ınlar, to'beshiklerde butlarg'a arnalg'an qurbanlıq ma'resimine qatnasatug'ınlar ha'm uyatsız qılıqlardı qılatug'ınlar bar.
10 Aran'ızda a'kesinin' hayalı menen jatatug'ınlar, etek kiri kelip ju'rgen hayaldı zorlaytug'ınlar bar.
11 Birewi qon'sısının' hayalı menen jerkenishli is qılsa, basqası shermendelershe kelinin haramlaydı, basqası tuwısqan qarındasının' namısına tiyedi.
12 Sendegi adamlar qan to'giw ushın para aladı. Sen o'sim ha'm u'steme alasan', zorlıq penen jaqının'nın' mal-mu'lkin tartıp alasan', al Meni bolsa, umıttın', – deydi Quday İye.
13 – Minekey, haram paydan' ha'm ishin'de qan to'kkenin' ushın Men ashıw menen alaqanımdı alaqanıma uraman.
14 Men sag'an qarsı ha'reketke kirgen ku'ni ju'regin' daw berip, qolın'da ku'shin' qalar ma eken? Bunı Men, Jaratqan İye aytaman ha'm ju'zege asıraman.
15 Men seni milletler arasına tarqatıp, el boylap shashıp jiberemen ha'm aran'ızdag'ı haram islerge shek qoyaman.
16 Xalıqlardın' ko'z aldında xor bolg'anın'da, Menin' Jaratqan İye ekenimdi bilip alasan'».
17 Mag'an Jaratqan İyeden so'z tu'sti:
18 – İnsan ulı, İzrail xalqı Men ushın g'awajaqtay qa'dirsiz bolıp qaldı. Olardın' ha'mmesi – oshaqtag'ı mıs, qalayı, temir ha'm qorg'asın. Olar gu'misten qalg'an g'awajaqqa aylandı.
19 Sonlıqtan Quday İye bılay deydi: «Ha'mmen'iz g'awajaqqa aylang'anın'ız ushın, Men sizlerdi Erusalimge jıynayman.
20 Ottı alıstırıp, gu'misti, mıstı, temirdi, qorg'asındı ha'm qalayını eritiw ushın oshaqqa salg'anınday, Men de qa'ha'r-g'a'zebim menen sizlerdi jıynayman, ha'mmen'izdi salıp, eritemen.
21 Sizlerdi jıynap, g'a'zep otımdı u'stin'izge u'pleymen ha'm qala ishinde erip ketesiz.
22 Gu'mistin' oshaqta erigenindey, sizler de qala ishinde eriysiz. Sonda g'a'zep otın u'stin'izge to'kken Men – Jaratqan İye ekenimdi bilip alasız».
23 Mag'an Jaratqan İyeden so'z tu'sti:
24 – İnsan ulı, elge: «Sen tazalanbag'an jersen'. G'a'zep ku'ni jawın menen suwg'arılmag'ansan'», – dep ayt.
25 Onın' ishindegi hu'kimdarları ırıldap, oljasın tilkimlep atırg'an arıslang'a uqsaydı. Olar adamlardı jeydi, mu'lik ha'm baylıqlardı tartıp aladı, jesirlerdin' sanın ko'beytedi.
26 Onın' ruwxaniyleri nızamımdı buzadı, muxaddes zatlarımdı haramlaydı. Muxaddes zat penen haram zattı parıqlamaydı. Hadal menen haramnın' ayırmashılıg'ın tu'sindirmeydi. Shabbatıma ko'z jumadı, Men olardın' arasında xorlanıp atırman.
27 Olardın' ha'meldarları oljasın tilkimlep atırg'an qasqırg'a uqsaydı. Baylıq arttırıw ushın qan to'gedi, adamlardın' janın aladı.
28 Al payg'ambarları bolsa olardın' qılmısların ha'k penen aqlaydı. O'tirikten ayanlar ko'rip, Jaratqan İye solay aytpasa da: «Quday İye usılay aytadı», – dep jalg'an boljawlar aytadı.
29 Eldin' xalqı birin biri ezedi, tonaydı, jarlı ha'm ka'mbag'alg'a zulımlıq qıladı, kelgindini nahaq ja'birleydi.
30 Eldi joq qılmawım ushın, diywaldın' buzılg'an jerlerin du'zetetug'ın, onın' buzılg'an jerine qalqan bolıp, sol jer ushın Menin' aldımda turatug'ın birewdi izledim, biraq taba almadım.
31 Solay etip, Men olarg'a qa'ha'rimdi to'gemen, g'a'zep otım menen joq qılaman ha'm qılg'an qılmıslarına jarasa jazasın beremen, – deydi Quday İye.
