Ezekiel 24 bob
1 Su'rginde bolg'an waqtımızdın' tog'ızınshı jılının' onınshı ayının' onınshı ku'ni Mag'an Jaratqan İyeden so'z tu'sti:
2 – İnsan ulı, usı ku'ndi, bu'gingi sa'neni jazıp qoy. Babiloniya patshası usı bu'gin Erusalimdi qamal qıldı.
3 Bul qozg'alan'shı xalıqqa bir tımsal aytıp, Quday İye bılay deydi dep ayt: «Qazandı qoy, qazandı qoyıp, ishine suw quy.
4 Og'an go'shtin' jaqsı bo'leklerin: jambas ha'm jawırın go'shlerin salıp, saylandı jiliklerge toltır.
5 Su'riwdegi qoydan saylap al. Astına ot jag'ıp, su'yegin jaqsılap qaynat.
6 Quday İye bılay deydi: Qanxor qala ha'siret shegedi! Tat basıp, tatı tazalanbag'an bul qazan ha'siret shegedi! Shek taslap saylamastan, go'shti bo'lek-bo'lek qılıp alıp, ılaqtırın.
7 Qalanın' qanı onın' ortasında. Ol qandı keyin shan' menen bastırılıp qalatug'ın jerge emes, al jalan'ash jartastın' u'stine to'kti.
8 O'sh alıwg'a degen g'a'zebimdi oyatıw ushın, Men de qandı jartas u'stinde qaldırdım, onı jasırıp bolmaydı.
9 Sonlıqtan Quday İye bılay deydi: Qanxor qala ha'siret shegedi! Men u'lken qılıp otın u'yemen.
10 Otındı mol etip salıp, ottı alıstır, go'shti qaynat ha'm da'm beriwshi zatlardı qos. Su'yekler de ku'yip ku'l bolsın.
11 Qazandı bosat, ko'mirdin' u'stine qoyıp, qızdır. Mıs qızıp, ishindegi pataslıq erisin ha'm tatı ku'yip ketsin.
12 Biraq barlıq miynetim bosqa ketti, qalın' tattı eritiw ushın, ha'tte, ot ta ja'rdem bermedi.
13 Uyatsız qılıg'ın' seni haramladı. Seni tazalamaqshı bolg'anımda, sen tazalanbadın'. Sol sebepli u'stin'e g'a'zebimdi tolıq to'gip bolmag'ansha, tazalanbaysan'.
14 Bunı Men, Jaratqan İye aytıp turman. Menin' ha'reketke kiretug'ın waqtım boldı. Men O'zimdi toqtatpayman, ayamayman, rehim de qılmayman. Sen o'z jolın' ha'm islerin'e go're hu'kim qılınasan', – deydi Quday İye».
15 Mag'an Jaratqan İyeden so'z tu'sti:
16 – İnsan ulı, men bir soqqı menen seni ko'zin'e qa'dirli bolg'an adamnan juda qılaman. Biraq joqlaw aytpa, jılama, ko'z jas to'kpe
17 İshin'nen jıla, marhum ushın aza tutpa. Sa'llen'di ha'm ayaq kiyimin'di sheshpe, saqalın'dı jawma, kewil aytıwg'a kelgenler a'kelgen awqattan jeme.
18 Azanda men xalıq penen so'ylestim, keshte hayalım qaytıs boldı. Kelesi ku'ni azanda men o'zime buyırılg'anlardı orınladım.
19 Sonda adamlar mennen: – Sen islep atırg'an bul na'rselerdin' bizler ushın qanday ma'nisi bar? – dep soradı.
20 Men olarg'a Jaratqan İyeden mag'an mınaday so'z tu'skenin ayttım:
21 «İzrail xalqına ayt, Quday İye bılay deydi: Ku'shin'izdin' maqtanıshı, ko'zin'izge qa'dirli ha'm janın'ızdın' arzıwı bolg'an Muxaddes ma'kanımnın' haramlanıwına jol qoyaman. Qaldırıp ketken ul ha'm qızların'ız qılıshtan qırıladı.
22 Sonda Ezekiel ne qılg'an bolsa, sizler de sonı qılasız. Saqalın'ızdı jawmaysız, kewil aytıwg'a kelgenler a'kelgen awqattan jemeysiz.
23 Sa'llen'iz basın'ızda, ayaq kiyimin'iz ayag'ın'ızda boladı. Joqlaw aytpaysız, jılamaysız. Qılmısların'ızdın' zardabınan dimarın'ız qurıp, birge nala shegesiz.
24 Ezekiel sizler ushın belgi boladı. Ol ne islegen bolsa, sizler de solay isleysiz. Bular ju'z bergende, sizler Menin' Quday İye ekenimdi bilesiz».
25 Bunnan keyin Quday İye mag'an bılay dedi: – Sag'an kelsek, insan ulı, Men olardın' qorg'anın, saltanatlı shadlıg'ın, ko'zine qa'dirli bolg'an na'rsesin ha'm janının' arzıwın, sonday-aq ulların ha'm qızların tartıp alg'anımda,
26 sol ku'ni qashıp qutılg'an bir adam xabardı jetkeriw ushın sag'an keledi.
27 Sonda ja'ne tilge kirip, sol adam menen so'ylesesen', artıq tilin' tutılmaydı. Sen xalqım ushın bir belgi bolasan', sonda olar Menin' Jaratqan İye ekenimdi bilip aladı.
