Ezekiel 27 bob
1 Mag'an Jaratqan İyeden so'z tu'sti:
2 – İnsan ulı, Tirge arnap joqlaw ayt.
3 Ten'iz da'rwazasında ma'kan basqan ha'm jag'alawlardag'ı xalıqlar menen sawda-satıq qılatug'ın Tir qalasına ayt: «Quday İye bılay deydi: Tir, sen: „Men go'zzallıqta minsizben“, – dedin'.
4 Senin' shegaraların' ten'iz qoynında edi. Qurılısshıların' go'zzallıg'ın'dı minsizlikke eristirdi.
5 Qaptal taxtayların' Senir tawındag'ı sa'rwi ag'ashlarınan, Tayınlang'an u'lken kemedey edin'. O'religin'di sog'ıw ushın, Lebanonnan kedr ag'ashın alıp keldi.
6 Eskeklerin'di Bashan emenlerinen, Edenlik taxtayların'dı Kipr jag'alawlarındag'ı qarag'aylardan sog'ıp, Pildin' su'yegi menen bezedi.
7 Mısırdın' nag'ıslı zıg'ır tawarı, Sag'an jelqom qılıp qoyıldı, Ol sen ushın bayraq boldı. Elisha jag'alawlarınan alıp kelingen, Qızg'ısh ko'k ha'm shım qızıl tawarlar sag'an sayaban qılındı.
8 Eskekshilerin' Sidon ha'm Arwad turg'ınları edi, Sheber adamların', Tir, Senin' darg'aların' edi.
9 Kemenin' jarıqların pitew ushın, Geballı ta'jiriybeli adamlar ha'm ustalar sende bar edi. Aldı-sattı qılıw ushın, Ten'izdegi barlıq kemeler ha'm ten'izshiler sag'an keletug'ın edi.
10 Parsılar, Lud ha'm Put adamları, A'sker bolıp xızmet etti. Qalqan ha'm duwlıg'aların sag'an asıp qoyıp, Olar seni dan'qqa eristirdi.
11 Arwad ha'm Xelexten kelgenler, Diywalların'da aylanıp turıp saqshılıq etti. Gammadtan kelgenler minaraların'da xızmet etti. Olar qalqanların diywalların'a asıp qoyıp, Ko'rkin'e ko'rik qostı.
12 Senin' baylıg'ın' asa ko'p bolg'anlıqtan, Tarshish te senin' menen sawda-satıq isledi. Olar bergen zatların'nın' ornına gu'mis, temir, qalayı ha'm qorg'asın berdi.
13 Yawan, Tubal ha'm Meshex sawdagerleri senin' menen sawda isledi. Olar sen bergen zatlardın' ornına qullardı ha'm qoladan islengen buyımlardı berdi.
14 Togarma turg'ınları sen bergen zatlardın' ornına yabılardı, a'skeriy atlardı ha'm g'ashırlardı berdi.
15 Dedan xalqı da senin' menen sawda-satıq qıldı. Ten'iz jag'asındag'ı ko'plegen ellerdin' bazarı senin' qolın'da edi. Olar pil su'yegin ha'm ebon teregin sag'an to'lem qılıp beretug'ın edi.
16 Zatların'nın' ko'pligi sebepli, Aram da senin' menen sawda-satıq qıldı. Olar senin' zatların'nın' ornına periwza taslar, shım qızıl gezlemeler, nag'ıslı kiyimler, hasıl zıg'ır tawarlar, marjan ha'm rubin berdi.
17 Yahuda menen İzrail da senin' menen sawdasatıq qıldı. Olar senin' buyımların'nın' ornına Minnitten alıp kelingen biyday, sonday-aq mazalı zatlar, pal, za'ytu'n mayın ha'm ma'lha'm berdi.
18 Senin' zatların'nın' ko'pligi ha'm sheksiz baylıg'ın' sebepli, Damask Xelbonnan sharap ha'm Zaxardan ju'n alıp kelip, senin' menen sawda-satıq qıldı.
19 Uzaldan kelgen Wedan ha'm Yawan xalıqları sennen zatlar satıp alıp, olardın' ornına islew berilgen temir, kassiya ha'm xosh iyisli qamıs beretug'ın edi.
20 Dedan attın' erine jabatug'ın qımbatbaha gilemleri menen sawda qıldı.
21 Arabstan ha'm Kedardın' barlıq biyleri senin' qarıydarların' edi. Olar qozılar, qoshqarlar ha'm eshkiler alıp kelip, senin' menen sawda isledi.
22 Sheba menen Raamanın' sawdagerleri senin' menen sawda qılıp, alg'an zatlarının' ornına en' jaqsı xosh iyisli zatlar, qımbatbaha taslar ha'm altın beretug'ın edi.
23 Xaran, Kanne, Eden qalaları, Sheba, Ashshur ha'm Kilmad sawdagerleri senin' menen sawdasatıq qıldı.
24 Olar qımbatbaha kiyimler, qızg'ısh ko'k ha'm nag'ıslı gezlemeler, ra'n'ba'ra'n' gilemler ha'm jaqsılap esilgen jiplerdi sag'an sattı.
25 Tarshish kemeleri ka'rwanların' bolıp xızmet etti. Sen ten'iz qoynında awır ju'kke toldın'.
27 Eskekshilerin' seni ashıq ten'izge alıp shıqtı. Shıg'ıs samalı seni ten'iz qoynında qıyrattı.
28 Qıyrag'an ku'nin', baylıg'ın', zatların', buyımların', ten'izshilerin', darg'aların', jarıqlardı pitewshilerin', sawdagerlerin', a'skerlerin' ha'm kemede bolg'an ha'mme adamların' ten'iz tu'bine g'arq boladı.
29 Darg'aların'nın' qıshqırıg'ınan, Jag'adag'ı dala la'rzege keledi.
30 Barlıq eskekshiler kemelerin ta'rk etedi. Ten'izshiler ha'm darg'alar jag'ag'a shıg'ıp aladı.
31 Olar sen ushın pa'riyad qıladı, Dadlap ashshı ko'z jas to'gedi. Baslarına topıraq shashıp, Ku'lge awnaydı.
32 Shashların aldırıp, Aza kiyimin kiyedi. Senin' ushın ju'rekleri ezilip, Zar en'irep, aza tutadı.
33 Olar ag'ıl-tegil bolıp jılap, Sen ushın bılay dep joqlaw aytadı: „Ten'iz ortasında qıyrag'an, Tir kibi basqa qala bar ma?
34 Zatların' ten'izden shıqqanda, Ko'p milletlerdi toydırdın'. Baylıg'ın'nın' ha'm aldı-sattın'nın' ko'pligi menen, Jerdin' patshaların bayıttın'.
35 Al ten'izde qıyrap, suw tu'bine sho'kkenin'de, Buyımların' ha'm adamların' senin' menen birge suwg'a g'arq boldı.
36 Atawlarda jasawshılar sen tuwralı esitkende janları tu'rshikti, Patshalarının' za'rresi ushıp, ju'zinde qan qalmadı.
37 Basqa xalıqlardın' sawdagerleri seni tabaladı. Aqıbetin' qorqınıshlı boldı, Sen ma'n'gige joq bolasan'“».
