Ezekiel 3 bob
1 Ol mag'an: – İnsan ulı, aldın'dag'ı bul orama qag'azdı je, keyin barıp, İzrail xalqı menen so'yles, – dedi.
2 Men awzımdı ashtım, Ol mag'an orama qag'azdı jewge berdi.
3 Keyin mag'an: – İnsan ulı, Men o'zin'e berip atırg'an usı orama qag'azdı jep, qarnın'dı toydır, – dedi. Men orama qag'azdı jedim, ol awzımda palday tatlı boldı.
4 Ol mag'an ja'ne bılay dedi: – İnsan ulı, endi barıp, İzrail xalqına Menin' so'zlerimdi ayt.
5 Seni tu'siniksiz so'yleytug'ın, tili awır xalıqqa emes, al İzrail xalqına jiberip atırman.
6 Eger Men seni tu'siniksiz so'yleytug'ın, tili awır ha'm so'zlerine tu'sinip bolmaytug'ın ko'p milletler arasına jibergenimde edi, olar sag'an so'zsiz qulaq salg'an bolar edi.
7 Biraq İzrail xalqı sag'an qulaq salmaydı, olar, ha'tte, Mag'an da qulaq salmaydı. O'ytkeni pu'tkil İzrail xalqı o'jet ha'm qaysar.
8 8Mine, Men seni de olardın' o'zleri sıyaqlı o'jet ha'm qaysar qılaman.
9 Men seni miytindey bekkem qılaman. Olar qozg'alan'shı xalıq bolsa da, olardan qorqıp, qa'weterlenbe.
10 Ol mag'an ja'ne mınalardı ayttı: – İnsan ulı! Menin' sag'an aytqanlarımdı dıqqat penen tın'lap, ha'mmesin ju'regin'de saqla!
11 Endi su'rgindegi jerleslerin'e bar da, tın'lasa da, tın'lamasa da, olarg'a: «Quday İye bılay demekte», – dep ayt.
12 Keyin Ruwx meni ko'terip aldı. Sonda men art jag'ımnan: «Jaratqan İyenin' saltanatı O'z ma'kanında alg'ıslansın», – degen ba'lent, gu'mbirlegen dawıstı esittim.
13 Bul janzatlardın' qanatlarının' bir-birine tiygen ha'm olardın' janındag'ı do'n'geleklerdin' gu'mbirlegen dawısı edi.
14 Ruwx meni joqarı ko'terip, basqa jaqqa alıp ketti. Men bolsam, ha'siretke ha'm g'a'zepke tolıp, kete berdim. Jaratqan İyenin' u'stime sozılg'an qolı awır edi.
15 Keyin men Kebar kanalının' boyındag'ı TelAbibte jasap atırg'an su'rgindegilerge bardım. Sol jerde olardın' arasında jeti ku'n dawamında o'zime kele almay, an'-tan' bolıp otırdım.
16 Sol jeti ku'n o'tkennen keyin, Jaratqan İyeden mag'an so'z tu'sti:
17 – İnsan ulı! Men seni İzrail xalqına gu'zetshi etip tayınladım. Menin' aytqan so'zlerimdi tın'lap, olardı Menin' atımnan eskert.
18 Eger Men nahaqqa: «Sen so'zsiz o'lesen'», – desem, al sen onın' o'mirin saqlap qalıw ushın, onın' menen so'ylesip, nahaqlıq jolınan qaytıwdı eskertpesen', onda ol o'z gu'nası ushın o'ledi. Al Men onın' qanının' qunın sennen talap qılaman.
19 Eger sen nahaqtı eskertsen', biraq ol jawızlıg'ınan da, nahaqlıq jolınan da qaytpasa, onda ol o'z gu'nası ushın o'ledi, al sen o'z janın'dı saqlap qalasan'.
20 Eger haq adam haqlıg'ınan bas tartıp, jawızlıqqa qol ursa, Men onı su'rniktiremen, ol o'ledi. Sen og'an eskertpegenin' sebepli, ol o'z gu'nası ushın o'ledi ha'm islegen jaqsı isleri eske alınbaydı. Al Men onın' qanının' qunın sennen talap etemen.
21 Eger sen haq adamg'a gu'na islemewdi eskertsen' ha'm ol gu'na islemese, onda ol so'zsiz jasaydı. Sebebi ol eskertiwge qulaq saldı, al sen bolsan', o'z janın'dı saqlap qalasan'.
22 Sol jerde Jaratqan İyenin' qolı menin' u'stimde boldı ha'm Ol mag'an: – Turıp, oypatlıqqa tu's, Men senin' menen sol jerde so'ylesemen, – dedi.
23 Men turıp, oypatlıqqa tu'stim. Sol jerde Jaratqan İyenin' saltanatı mag'an Kebar kanalı janında ko'ringendey bolıp tur eken. Men et betimnen jerge jıg'ıldım.
24 Ruwx mag'an kirip, meni ayaqqa turg'ızıp qoydı. Ol mag'an til qatıp bılay dedi: – U'yin'e kirip, esigin'di ishten ilip al.
25 Endi bolsa, insan ulı, seni arqan menen shırmap baylap taslaydı. So'ytip, sen xalıqtın' arasına shıg'a almaysan'.
26 Bul qozg'alan'shı xalıqtı a'shkaralamawın' ushın, Men seni gu'n' qılıp, tilin'di tan'layın'a jabıstırıp taslayman.
27 Biraq sag'an til qatqanımda, sen olarg'a: «Quday İye bılay dep atır», – dep aytıwın' ushın seni tilge kirgizemen. Tın'lag'ısı kelgenler tın'lasın, tın'lag'ısı kelmegenler tın'lamay-aq qoysın. Aqırı, olar qozg'alan'shı xalıq g'oy!
