Ezekiel 34 bob
1 Mag'an Jaratqan İyeden so'z tu'sti:
2 – İnsan ulı, İzrail shopanlarına payg'ambarshılıq qıl. Payg'ambarshılıq qılıp, olarg'a, yag'nıy shopanlarg'a ayt: «Quday İye bılay deydi: Su'riwdi bag'ıwdın' ornına o'zlerin bag'ıp ju'rgen İzrail shopanları, ha'siret shegesiz!
3 Sizler may jeysiz, ju'nnen kiyim kiyesiz, semiz qoylardı soyasız, biraq su'riwdi baqpaysız.
4 Ha'lsizge ku'sh bermedin'iz, keseldi shıpalamadın'ız, su'yegi sıng'annın' sınıg'ın tan'badın'ız. Adasqandı qaytıp alıp kelmedin'iz, joytılg'andı izlemedin'iz. Qaytama, olardı ku'sh penen, rehimsiz basqardın'ız.
5 Olar shopansız ha'r jaqqa taradı ha'm tarqap ju'rip, jabayı haywanlarg'a jem boldı.
6 Qoylarım tawlarda ha'm biyik to'belerde gezdi. Olar barlıq jerge jayıldı, olardı hesh kim izlemedi, tabıwg'a urınbadı.
7 Sonlıqtan, shopanlar, Jaratqan İyenin' so'zin tın'lan'!
8 Tiriligim haqı ant ishemen, – deydi Quday İye, – shopannın' joqlıg'ı sebepli qoylarım talandı ha'm jırtqısh haywanlarg'a jem boldı. Shopanlarım qoylarımdı izlemedi, qoylarımdı baqpay, o'zlerin baqtı.
9 Sonlıqtan, shopanlar, Jaratqan İyenin' so'zin tın'lan'!
10 Quday İye bılay deydi: Men shopanlarg'a qarsıman! Men olardan esap talap etemen ha'm endigiden bılay, olarg'a qoylarımdı baqtırmayman. Artıq o'zlerin de baqpaydı. Endi olarg'a jem bolmawı ushın, awızlarınan qoylarımdı tartıp alaman.
11 Quday İye bılay deydi: Men O'zim qoylarımdı izleymen ha'm olarg'a qarayman.
12 Tarqalıp ketken qoylardın' arasında shopan su'riwine qalay qaraytug'ın bolsa, Men de olarg'a solay qarayman. Bult tu'nergen bultlı ku'ni tarqalıp ketken qoylarımdı ha'mme jerden qutqarıp alaman.
13 Olardı xalıqlardın' arasınan shıg'arıp, ellerden jıynap alaman. Ata jurtına alıp kelip, İzrail tawlarında, saylarında ha'm eldin' adam ma'kan basqan jerlerinin' ha'mmesinde bag'aman.
14 Men olardı jasıl jaylawlarda bag'aman, İzraildın' ba'lent tawları olardın' o'risi boladı. Olar sol jerlerdegi maysazarlarda jatıp, İzraildın' tawlarındag'ı mol sho'pli jaylawlarda otlaydı.
15 Qoylarıma Men O'zim shopan bolaman, olarg'a dem berip, tınıshlandıraman, – deydi Quday İye.
16 – Joytılg'anın izleymen, adasqanın qaytıp alıp kelemen, su'yegi sıng'annın' sınıg'ın tan'aman, awırg'anına ma'det beremen, al semiz ha'm ku'shlisin bolsa, joq qılaman. Olardı a'dalatlıq penen bag'aman.
17 Sizlerge kelsek, qoylarım, – deydi Quday İye, – qoy menen qoy, qoshqar menen teke arasında qazılıq qılaman.
18 Jasıl jaylawda otlag'anın'ız az bolg'anday, jegenin'izden qalg'anın basqılap atırsız! Taza suwdan ishkenin'iz jetkilikli emestey, ishkenin'izden qalg'anın ayag'ın'ız benen ılaytıp atırsız!
19 Menin' qoylarım sizlerdin' basqılap taslag'an sho'plerin'izdi jep, ayaqların'ız benen ılaytıp taslag'an suwların'ızdı ishiwi kerek pe?
20 Sonlıqtan Quday İye bılay deydi: Semiz qoy menen arıq qoy arasında Men O'zim qazılıq qılaman.
21 Ha'lsiz qoylardı quwıp shıg'armag'ansha, sizler olardı jambasın'ız ha'm iynin'iz benen iyterip, shaqın'ız benen du'ktin'iz.
22 Men qoylarımdı qutqaraman, olar endi talanbaydı. Ja'ne de, qoy menen qoydın' arasında qazılıq qılaman.
23 Olardın' u'stinen bag'atug'ın bir shopandı, qulım Dawıttı qoyaman. Dawıt olardı bag'adı ha'm olardın' shopanı boladı.
24 Men, Jaratqan İye, olardın' Qudayı, al qulım Dawıt olardın' hu'kimdarı boladı. Bunı Men, Jaratqan İye aytıp turman.
25 Men olar menen tınıshlıq kelisimin du'zip, eldegi barlıq jırtqısh haywanlardı quwıp shıg'araman. Sonda qoylarım jabayı ta'biyat qoynında qa'wipsiz jasap, tog'aylarda uyıqlaydı.
26 Men olardı jarılqayman ha'm tawımnın' a'tirapında jasataman. O'z waqtında jawın jawdıraman, bul jawınlar bereketli jawınlar boladı.
27 Ag'ashlar o'z miywesin, jer o'z o'nimin beredi. Xalıq o'z jerinde qa'wipsiz jasaydı. Moyıntırıqların sındırıp, olardı qul qılg'anlardın' qollarınan, olar Menin' Jaratqan İye ekenimdi bilip aladı.
28 Bunnan bılay, olar milletlerge talanbaydı ha'm jırtqısh haywanlar olardı jemeydi. Olar qa'wipsiz jasaydı, hesh kim olardı qorqıtpaydı.
29 Men olarg'a o'nimdar jerlerdi beremen, olar endi elde ashlıqtan qırılmaydı, xalıqlardın' tabasına da ushıramaydı.
30 Sonda olar Menin' o'zlerinin' Qudayı Jaratqan İye ekenimdi, o'zleri menen birge ekenimdi ha'm İzrail xalqı Menin' xalqım ekenin bilip aladı, – deydi Quday İye.
31 – Sizler Menin' qoylarım, jaylawdag'ı qoylarımsız. Sizler adamsızlar, Men bolsam, sizlerdin' Qudayın'ızban, – deydi Quday İye».
