Ezekiel 37 bob
1 Jaratqan İyenin' qolı menin' u'stimde edi. Ol meni O'z Ruwxı menen alıp ketip, oypatlıqtın' ortasına aparıp qoydı. Ol jer su'yeklerge tolıp atırg'an edi.
2 Ol meni olardın' arası menen jeteledi, men oypatlıqta jatırg'an sansız su'yeklerdi ko'rdim. Su'yekler ju'da' kewip qalg'an edi.
3 Ol mennen: – İnsan ulı, mına su'yekler tirile ala ma? – dep soradı. Men Og'an: – Quday İye, bunı tek Sen bilesen', – dep juwap berdim.
4 Keyin Ol mag'an bılay dedi: – Payg'ambarshılıq etip, mına su'yeklerge bılay dep ayt: «Kewip qalg'an su'yekler, Jaratqan İyenin' so'zin tın'lan'!
5 Quday İye bul su'yeklerge bılay demekte: Men sizlerge na'pes beremen, sizler tirilesiz.
6 U'stin'izge sin'irler pitirip, et o'siremen ha'm teri menen qaplayman. İshin'izge dem salaman, sizler tirilesiz ha'm Menin' Jaratqan İye ekenimdi bilip alasız».
7 Men o'zime tapsırılg'anday, payg'ambarshılıq ettim. Payg'ambarshılıq etip atırg'anımda, tasırlag'an shawqım esitildi, su'yekler bir-biri menen birlese basladı.
8 Men olarda sin'irdin' ha'm ettin' qalay payda bolg'anın, olardı teri qaplag'anın ko'rdim. Biraq denesinde ele jan joq edi.
9 Sonda Ol mag'an bılay dedi: – Ruwxqa payg'ambarshılıq qıl. İnsan ulı, payg'ambarshılıq qılıp, og'an bılay dep ayt: «Quday İye bılay deydi: Ha'y dem, to'rt ta'repten samal bolıp, mına o'ltirilgenlerdin' u'stine es, olar tirilsin».
10 Men Ol tapsırg'anday, payg'ambarshılıq qıldım. Ruwx olarg'a kirip, olar tirildi, ayaqqa turdı. Olar ju'da' ullı alamang'a aylandı.
11 Sonda Ol mag'an bılay dedi: – İnsan ulı, mına su'yekler – pu'tkil İzrail xalqı. Olar: «Su'yegimiz quwrap qaldı, u'mitimiz u'zildi, bizler tamırdan u'zilip taslang'anbız», – deydi.
12 Sonlıqtan payg'ambarshılıq etip, olarg'a ayt: «Quday İye bılay deydi: Xalqım, Men qa'birlerin'izdi ashıp, sizlerdi go'rden shıg'araman ha'm İzrail jerine alıp kelemen.
13 Qa'birlerin'izdi ashıp, o, xalqım, sizlerdi go'rden shıg'arg'anımda, Menin' Jaratqan İye ekenimdi bilip alasız.
14 Sizlerge ruwxımdı salaman, sizler tirilesiz. Men sizlerdi o'z jerin'izge ornalastıraman. Sonda bunı Menin', Jaratqan İyenin' aytqanın ha'm ju'zege asırg'anın bilesiz, – deydi Jaratqan İye».
15 Mag'an Jaratqan İyeden so'z tu'sti:
16 – İnsan ulı, sen bir tayaq alıp, og'an: «Yahuda ha'm onın' menen birlesken izraillılar ushın» dep jaz. Keyin basqa tayaq alıp, og'an: «Yusup ha'm onın' menen birlesken İzrail xalqı ushın Efrayımnın' tayag'ı» dep jaz.
17 Eki tayaqtı bir-birine qosıp usla, olar qolın'da bir tayaqtay bolıp ko'rinsin.
18 Xalqın': «Qolın'dag'ı ne, tu'sindirip beresen' be?» – dep sorasa,
19 olarg'a bılay dep ayt: «Quday İye bılay deydi: Men Efrayımnın' qolındag'ı tayag'ın, yag'nıy Yusup penen birlesken İzrail urıwlarının' tayag'ın alıp, Yahudanın' tayag'ına qosaman. Olardı bir tayaq qılıp, O'z qolımda uslayman».
20 Sen jazıw jazg'an eki tayaq olardın' ko'z aldında senin' qolın'da turg'anda,
21 olarg'a Quday İye bılay deydi dep ayt: «Men İzrail xalqın ha'mme jaqtan, o'zleri barg'an xalıqlardın' arasınan jıynap alıp, o'zlerinin' jerine alıp kelemen.
22 Olardı bul jerde, İzrail tawlarında bir xalıq qılaman ha'm olardın' ha'mmesin bir patsha basqaratug'ın boladı. Olar artıq eki xalıq bolmaydı ha'm eki patshalıqqa bo'linbeydi.
23 Endi butlar menen, jerkenishli zatlar menen ha'm ha'r qıylı nadurıs na'rseler menen o'zlerin haramlamaydı. Gu'nag'a batıp jasag'an ma'nzillerinen olardı azat etip, tazalayman. Olar Menin' xalqım, Men olardın' Qudayı bolaman.
24 Qulım Dawıt olarg'a patsha boladı ha'm ha'mmesinin' shopanı boladı. Olar Menin' buyrıqlarım menen jasaydı, qag'ıydalarıma a'mel qılıp, olardı orınlaydı.
25 Olar Men qulım Yaqıpqa bergen jerde, ata-babaları jasag'an jerde jasaydı. Sol jerge olardın' o'zleri, balaları ha'm balalarının' balaları ma'n'gige ma'kan basadı. Qulım Dawıt ma'n'gige olardın' hu'kimdarı boladı.
26 Men olar menen tınıshlıq kelisimin du'zemen, bul kelisim ma'n'gige dawam etedi. Olardı ayaqqa turg'ızaman, ko'beytemen ha'm O'zimnin' Muxaddesxanamdı olardın' ortasına ma'n'gige ornataman.
27 Olardın' arasında ma'kan basaman. Men olardın' Qudayı, olar Menin' xalqım boladı.
28 Muxaddesxanam ma'n'gige olardın' arasında jaylasqanda, xalıqlar İzraildı muxaddes qılatug'ın Men, Jaratqan İye ekenin bilip aladı».
