Ezekiel 4 bob
1 – İnsan ulı! Endi bir gerbish alıp aldın'a qoy, onın' u'stine Erusalim qalasının' su'wretin sal.
2 Qalanı qorshawg'a alıp, og'an qarsı bekinisler qur, diywalg'a topıraq u'y, dushpan ordasın qur ha'm qala aylanasına diywal buzatug'ın u'skenelerdi ornat.
3 Keyin temir taba alıp, onı o'zin' menen qalanın' ortasına temir diywal etip ornat. Keyin ju'zin'di qalag'a qarat. Qala qamal qılınadı, sen onı qamal qılg'an bolasan'. Bul İzrail xalqı ushın eskertiw boladı.
4 Son'ınan shep qaptalın' menen jambaslap jatıp, İzrail xalqının' gu'nasın u'stin'e ju'kle. Shep jag'ın' menen qansha ku'n jatsan', sonsha ku'n olardın' gu'nasın o'zin'e ju'kleysen'.
5 Olardın' gu'na qılg'an jıllarının' sanına bola, sen ushın sonsha ku'n ajırattım. Sen u'sh ju'z toqsan ku'n dawamında İzrail xalqının' gu'nasın o'zin'e ju'kleysen'.
6 Belgilengen waqıt tamam bolg'annan keyin, on' jag'ın'a jambaslap jat, endi Yahuda xalqının' gu'nasın o'zin'e alasan'. Men ha'r jıldı bir ku'n dep esaplap, sag'an qırıq ku'n belgiledim.
7 Erusalimnin' qamal qılıng'an diywallarına ju'zin'di qarat, bilegin'di tu'rip, og'an qarsı payg'ambarshılıq qıl.
8 Qalanı qamal qılg'an ku'nlerin' pitpegenshe, Men seni bir jag'ın'nan ekinshi jag'ın'a awnay almaytug'ınday etip, arqan menen baylap taslayman.
9 Endi biyday, arpa, aq ha'm qızıl lobiya, tarı ha'm jazlıq biyday alıp, bir ıdısqa sal ha'm nan pisir. Onı u'sh ju'z toqsan ku'n bir jag'ın'da jatqanın'da jeysen'.
10 Ha'r ku'ni jeytug'ın nanın'nın' mug'darı jigirma shekeldin'* awırlıg'ına ten' boladı, onı belgilengen waqıtta jeysen'.
11 Suwdı da o'lshep ishesen', onın' mug'darı hinnin'* altıdan bir bo'legine ten' boladı. Onı da belgilengen waqıtta ishesen'.
12 Nanın'dı arpa gu'lshelerindey etip tayarlap je. Olardı adamlardın' ko'z aldında, adamnın' u'lken da'retine pisir.
13 Jaratqan İye tag'ı: – Men İzrail xalqın basqa milletler arasına su'rgin qılg'anımda, olar haram nan jeydi, – dedi.
14 Sonda men: – Ah, Quday İye! Men hesh qashan o'zimdi haramlamag'anman. Jaslıg'ımnan usı ku'nge deyin, hesh qashan haram o'lgen yaki jırtqısh talap o'ltirgen haywandı jemegenmen. Hesh qanday haram go'shti awzıma alg'an emespen, – dedim.
15 – Yaqshı, – dedi Ol, – nanın'dı adam da'retinin' ornına, maldın' tezegine pisiriwin'e ruxsat beremen.
16 Son'ınan Ol mag'an bılay dedi: – İnsan ulı! Men Erusalimdi bir tislem nang'a zar qılaman. Olar qorqıw ishinde nanın o'lshep jeydi ha'm g'ulg'ılag'a tu'sip, suwın o'lshep ishedi.
17 Suw ha'm nan jetispeydi. Adamlar qorqınıshtan esten ayırıladı ha'm gu'nalarının' zardabınan dimarları qurıydı.
