Ezekiel 42 bob
1 Adam meni arqadag'ı jol arqalı sırtqı ha'wlige alıp shıg'ıp, ruwxaniylerdin' bo'lmelerine alıp bardı. Bul bo'lmeler ashıq maydannın' ha'm İbadatxananın' artındag'ı jaydın' arqa ta'repinde jaylasqan edi.
2 Bo'lmelerdin' esigi arqag'a qarap turg'an bolıp, imarattın' uzınlıg'ı ju'z shıg'anaq, eni eliw shıg'anaq edi.
3 İmarattın' bir ta'repi ishki ha'wlinin' eni jigirma shıg'anaq bolg'an ashıq jerine, ekinshi ta'repi sırtqı ha'wlidegi tas to'selgen jolg'a qarap turg'an edi. İmarat u'sh qabat qılıp qurılg'an bolıp, onın' qaptal da'lizleri bar edi.
4 İmarattın' aldında eni on shıg'anaq, uzınlıg'ı ju'z shıg'anaq bolg'an ayaq jol bolıp, sol jol arqalı imaratqa kiriwge bolatug'ın edi. Bo'lmelerdin' qapıları arqag'a qaray ashılatug'ın edi.
5 U'shinshi qabattag'ı bo'lmeler ekinshi qabattag'ıg'a, ekinshi qabattag'ı bo'lmeler birinshi qabattag'ıg'a qarag'anda tarlaw edi. Sebebi u'stingi qabattag'ı bo'lmelerdin' da'lizleri ko'birek orın alıp turg'an edi.
6 Usı u'sh qabatlı imaratta ha'wlilerdegidey su'tinler bolmadı. Sonlıqtan joqarg'ı qabattag'ı bo'lmeler to'mengi qabattag'ı bo'lmelerden tar edi.
7 Bo'lmeler sırtqı ha'wliden diywal arqalı ajıratılıp turdı. Diywal bo'lmelerdin' aldında eliw shıg'anaqqa sozılıp jattı.
8 Sırtqı ha'wlidegi bo'lmelerdin' uzınlıg'ı eliw shıg'anaq, al İbadatxana ta'reptegi bo'lmelerdin' uzınlıg'ı ju'z shıg'anaq edi.
9 Sırtqı ha'wliden to'mengi bo'lmelerge kiretug'ın awız shıg'ıs ta'repte jaylasqan edi.
10 Bul awız ha'wlinin' diywalı baslang'an jerde edi. İbadatxananın' qubla ta'repinde de ruwxaniylerdin' bo'lmeleri bar edi. Olar ashıq maydannın' ha'm İbadatxananın' artındag'ı imarattın' qubla ta'repinde jaylasqan edi.
11 Bo'lmelerdin' aldında ayaq jol bar edi. Bul bo'lmelerdin' uzınlıg'ı da, eni de, barlıq esikleri de, jaylasıwı da arqa ta'reptegi bo'lmeler menen birdey ko'riniste edi.
12 Qubladag'ı bo'lmelerge shıg'ıstan, diywaldı boylap turg'an joldın' baslang'an jerinen kiretug'ın edi.
13 Adam mag'an bılay dedi: – Ashıq maydannın' arqasındag'ı ha'm qublasındag'ı bo'lmeler – muxaddes bo'lmeler. Jaratqan İyege jaqınlasatug'ın ruwxaniyler en' muxaddes zatlardı sol jerde jeydi. En' muxaddes qurbanlıqlardı – g'a'lle sadaqaların, gu'na ha'm ayıp qurbanlıqların sol jerge qoyadı. Sebebi ol jer muxaddes.
14 Ruwxaniyler muxaddes orınnan sırtqı ha'wlige tuwrı shıg'ıp ketpewi tiyis. Olar xızmet waqtında kiygen kiyimlerin usı jerge sheship qoyıwı kerek. Sebebi bul kiyimler muxaddes. Xalıqtın' aldına shıqpasınan aldın, ruwxaniyler kiyimlerin o'zgertiwi kerek.
15 Ol İbadatxananın' ishki jag'ındag'ı o'lshemlerdi alıp bolg'annan son', meni shıg'ıstag'ı da'rwaza arqalı alıp shıg'ıp, İbadatxana do'geregindegi sırtqı aymaqtı o'lshey basladı.
16 Ol o'lsheytug'ın tayaq penen shıg'ıs ta'repti o'lshedi. Ol bes ju'z shıg'anaq shıqtı.
17 Arqa ta'repti o'lshedi, ol bes ju'z shıg'anaq shıqtı.
18 Qubla ta'repti o'lshedi, ol da bes ju'z shıg'anaq shıqtı.
19 Keyin batısqa aylanıp, onı o'lshedi, ol da bes ju'z shıg'anaq shıqtı.
20 Usılayınsha, ol İbadatxana aymag'ının' to'rt ta'repin o'lshep shıqtı. Muxaddes orındı muxaddes emes orınnan ajıratıp turatug'ın diywal bar edi. Onın' uzınlıg'ı da, eni de bes ju'z shıg'anaqqa ten' edi.
