Ezekiel 43 bob
1 Keyin adam meni shıg'ısqa qarap turg'an da'rwazag'a alıp keldi.
2 Mine, İzraildın' Qudayının' saltanatı shıg'ıs ta'repten kirip keldi. Dawısı ku'shli aqqan suwlardın' gu'mbirlisi yan'lı edi. Saltanatınan jer ju'zi nurg'a tolıp turdı.
3 Bul ayan Quday Erusalimdi nabıt qılıwg'a kelgeninde ha'm Kebar kanalı boyında bolg'anımda ko'rgen ayanlarıma uqsar edi. Men jerge et betimnen jıg'ıldım.
4 Jaratqan İyenin' saltanatı shıg'ısqa qarag'an da'rwazadan İbadatxanag'a kirdi.
5 Ruwx meni ko'terip, ishki ha'wlige alıp keldi. Men İbadatxananın' Jaratqan İyenin' saltanatına tolıp turg'anın ko'rdim.
6 Adam qasımda turg'anında, İbadatxanadan mag'an so'ylegen dawıstı esittim.
7 Ol bılay dedi: – İnsan ulı, bul orın Menin' taxtım turatug'ın ha'm taban tireytug'ın jerim. Usı jerde, İzrail xalqının' arasında ma'n'gige bolaman. Bunnan bılay, İzrail xalqı da, patshaları da, o'zlerinin' opasızlıg'ı menen ha'm marhum patshalarına sıyınıwı menen muxaddes atımdı haramlamaytug'ın boladı.
8 Olar bosag'asın bosag'amnın' qasına, qapılarının' jaqlawların Menin' qapı jaqlawlarımnın' qasına qurdı. Menin' menen olardın' arasında tek g'ana bir diywal bar edi. Olar islegen jerkenishli isleri arqalı Menin' muxaddes atımdı haramladı. Sonlıqtan g'a'zep penen olardı joq qıldım.
9 Endi İzrail xalqı opasızlıqların ha'm marhum patshalarına sıyınıwdı Mennen awlaq qılsın. Sonda Men olardın' arasında ma'n'gige ma'kan basaman.
10 İnsan ulı, usı İbadatxana tuwralı İzrail xalqın xabardar qıl. Olar islegen gu'nalarınan uyalsın, mına İbadatxananın' jobası menen tanısıp shıqsın.
11 Eger olar islegen barlıq islerinen uyalıp, pushayman bolsa, onda olarg'a İbadatxananın' ko'rinisin, jaylasıw ta'rtibin, kiretug'ın ha'm shıg'atug'ın jerlerin, onın' qurılısı menen du'zilisin ha'm ta'rtip-qag'ıydaların ko'rset. Onın' qurılısı menen qag'ıydaların saqlawı ha'm olarg'a a'mel qılıwı ushın, bulardın' ha'mmesin olardın' ko'z aldına jazıp qoy.
12 İbadatxana nızamı mınaday: tawdın' to'besi ha'm onın' a'tirapındag'ı aymaq – ju'da' muxaddes! İbadatxana nızamı mine usınday!
13 İbadatxanadag'ı qurbanlıq orınnın' o'lshemleri bir shıg'anaq ha'm qosımsha to'rt eli turatug'ın uzınıraq shıg'anaq penen o'lshenedi. Qurbanlıq orınnın' aynalasında teren'ligi bir shıg'anaq, eni bir shıg'anaq, erneginin' eki bir qarıs bolg'an salmasha boladı. Qurbanlıq orınnın' biyikligi mınaday:
14 Qurbanlıq orınnın' to'mengi bo'leginin' biyikligi salmashanın' tu'binen o'lshegende eki shıg'anaq, u'stingi ta'repinin' ekinshi bo'lektin' tu'bine deyingi aralıg'ı bir shıg'anaq. Ortadag'ı bo'lektin' biyikligi to'rt shıg'anaq, u'stingi ta'repinin' u'shinshi bo'lektin' tu'bine deyingi aralıg'ı bir shıg'anaq.
15 En' u'stingi u'shinshi bo'lektin', yag'nıy qurbanlıq jag'ılatug'ın orınnın' biyikligi to'rt shıg'anaq bolıp, onnan to'rt shaq shıg'ıp turadı.
16 Qurbanlıq orınnın' oshag'ının' uzınlıg'ı da, eni de on eki shıg'anaq bolıp, to'rt mu'yeshlik ko'rinisinde boladı.
17 Ortadag'ı bo'leginin' to'rt ta'repi de on to'rt shıg'anaqtan edi. Qurbanlıq orınnın' tu'bindegi salmashanın' erneginin' biyikligi yarım shıg'anaq boladı. Do'geregine aylandırıp islengen salmashanın' teren'ligi bir shıg'anaq edi. Qurbanlıq orınnın' tekshesi shıg'ıs ta'repte boladı.
18 Adam mag'an bılay dedi: – İnsan ulı! Quday İye bılay deydi: «Qurbanlıq orındı qurg'annan keyin, onın' u'stinde jandırılatug'ın qurbanlıqtı usınıw ha'm qan serpiw qag'ıydaları mınaday:
19 Mag'an xızmet etiw ushın, Mag'an jaqınlasa alatug'ın Sadoq na'silinen bolg'an lebiyli ruwxaniylerge gu'na qurbanlıg'ı retinde bir bug'a ber, – deydi Quday İye.
20 – Bug'anın' qanın alıp, qurbanlıq orınnın' to'rt shaqına su'rtip, joqarg'ı bo'lektin' to'rt mu'yeshine ha'm erneklerine aylandırıp serpip shıqsın. Usılayınsha qurbanlıq orın tazalanıp, pa'klenedi.
21 Keyin gu'na qurbanlıg'ı ushın soyılg'an bug'anı Muxaddesxananın' sırtındag'ı arnawlı orıng'a alıp barıp, o'rtep jibersin.
22 Ekinshi ku'ni gu'na qurbanlıg'ı ushın minsiz teke usınılsın. Bug'anın' qanı menen tazalang'anı sıyaqlı, tekenin' qanı menen de qurbanlıq orın tazalansın.
23 Qurbanlıq orındı pa'klegennen son', minsiz bug'a menen qoshqardı
24 Jaratqan İyenin', Menin' aldıma alıp kel. Ruwxaniyler olarg'a duz sewip, olardı jandırılatug'ın qurbanlıq qılıp Mag'an usınsın.
25 Jeti ku'n dawamında, ha'r ku'ni minsiz bir tekeni gu'na qurbanlıg'ı qılıp usınsın. Ja'ne de, minsiz bir bug'a menen minsiz bir qoshqardı da qurbanlıqqa usınsın.
26 Usı jeti ku'n dawamında ruwxaniyler qurbanlıq orındı tazalap pa'klesin. Keyin onı paydalanıwg'a boladı.
27 Jeti ku'n tamam bolg'annan keyin, segizinshi ku'nnen baslap ruwxaniyler jandırılatug'ın qurbanlıqların'ızdı ha'm tatıwlıq qurbanlıqların'ızdı qurbanlıq orında usınadı. Sonda Menin' sizlerge kewlim toladı, – deydi Quday İye».
