Ezekiel 45 bob
1 «İzrail jerin urıwlarg'a bo'lgenin'izde, uzınlıg'ı jigirma bes mın' shıg'anaq, eni jigirma mın' shıg'anaq bolg'an bir bo'lek jerdi muxaddes aymaq sıpatında Jaratqan İye ushın ajıratın'. Bul jer tolıg'ı menen muxaddes sanalsın.
2 Sol jerdin' bes ju'z shıg'anaqqa bes ju'z shıg'anaq bolg'an to'rt mu'yeshli jeri Muxaddesxana ushın ajıratılsın. Onın' a'tirapın aylang'an eliw shıg'anaqlıq ashıq maydan bolsın.
3 Muxaddes aymaqtan uzınlıg'ı jigirma bes mın' shıg'anaq, eni on mın' shıg'anaq bolg'an bir bo'lek o'lshe. Muxaddesxana jaylasqan bul jer ju'da' muxaddes jer boladı.
4 Jerdin' bul muxaddes bo'legi Jaratqan İyege jaqınlasatug'ın ruwxaniylerge, yag'nıy Muxaddesxanada xızmet etetug'ın ruwxaniylerge tiyisli boladı. Bul bo'lekte Muxaddesxana ushın muxaddes orın ha'm ruwxaniylerdin' u'yleri boladı.
5 Uzınlıg'ı jigirma bes mın' shıg'anaq, eni on mın' shıg'anaq bolg'an muxaddes aymaqtın' ekinshi yarımı İbadatxana xızmetindegi lebiylilerge jasaytug'ın qalaların qurıw ushın mu'lik etip beriledi.
6 Muxaddes aymaqtın' qaptalınan eni bes mın' shıg'anaq, uzınlıg'ı jigirma bes mın' shıg'anaq bolg'an jerdi qala ushın ajıratın'. Bul jer pu'tkil İzrail xalqına tiyisli boladı».
7 «Muxaddes aymaq penen qala aymag'ının' eki qaptalındag'ı jerler hu'kimdarg'a berilsin. Ol batıs ta'repten batısqa, shıg'ıs ta'repten shıg'ısqa qaray sozılıp, onın' uzınlıg'ı batıstan shıg'ısqa shekem sozılg'an İzrail urıwlarına ajıratılg'an jerdin' uzınlıg'ına ten' boladı.
8 Bul İzrailda hu'kimdardın' u'lesi boladı. Bunnan bılay, hu'kimdarlarım xalqıma zulımlıq qılmaydı. İzrail urıwları o'z jerlerine o'zleri iyelik qıladı».
9 «Quday İye bılay deydi: Jeter endi, İzrail hu'kimdarları! Zorlıqzombılıqtı ha'm eziwshilikti toqtatın'. A'dalat ha'm tuwrılıqtı ju'zege asırın'. Xalqımdı o'z iyeliginen quwıp shıg'arıwdı toqtatın', – deydi Quday İye.
10 – Ta'rezin'iz tuwrı bolsın, sıyımlılıqtı o'lsheytug'ın efa ha'm suyıqlıqtı o'lsheytug'ın bat ıdısların'ız durıs o'lshemde bolsın.
11 Efa menen battın' sıyımlılıq ko'lemi birdey bolsın. Efa da, bat ta xomerdin' onnan bir bo'legine ten' bolsın. Efa ushın da, bat ushın da xomer u'lgi bolıp belgilensin.
12 Bir shekel jigirma gerag'a ten' bolsın, jigirma shekel, jigirma bes shekel ha'm on bes shekel qosılıp bir minanı qurasın».
13 «Beretug'ın salıg'ın'ız mınadan ibarat: biydaydın' alpıstan bir bo'legi, arpanın' alpıstan bir bo'legi,
14 za'ytu'n mayının' ju'zden bir bo'legi. Maydı o'lshegende battan paydalanın', on bat bir xomerge, yag'nıy bir korg'a* tuwrı keledi.
15 Sonday-aq İzrail jaylawındag'ı eki ju'z qoydan birewi hu'kimdarg'a berilsin. Bular g'a'lle sadaqası, jandırılatug'ın qurbanlıq ha'm tatıwlıq qurbanlıg'ı bolıp, gu'nadan pa'kleniw ushın beriledi, – deydi Quday İye.
16 – Eldegi pu'tkil xalıq bul sadaqalardı İzrail hu'kimdarına beriwi kerek.
17 Hu'kimdar İzrailda barlıq bayramlarda – u'lken bayramlarda, ja'ne de Jan'a ay bayramında ha'm Shabbat ku'nlerinde jandırılatug'ın qurbanlıqlardı, g'a'lle sadaqaların ha'm ishimlik sadaqaların ta'miyinlewi sha'rt. Ol İzrail xalqın pa'klew ushın beriletug'ın gu'na qurbanlıg'ın, g'a'lle sadaqasın, jandırılatug'ın qurbanlıqtı ha'm tatıwlıq qurbanlıg'ın alıp keledi.
18 Quday İye bılay deydi: – Birinshi aydın' birinshi ku'ni minsiz bir bug'a alıp, Muxaddesxananı pa'kle.
19 Ruwxaniy gu'na qurbanlıg'ının' qanınan alıp, onı İbadatxana qapılarının' jaqlawlarına, qurbanlıq orınnın' u'stinin' to'rt mu'yeshine, ishki ha'wlige kiretug'ın da'rwazalardın' jaqlawlarına jaqsın.
20 Xalıqtın' bilmey ha'm abaylamay qılg'an gu'naları ushın jetinshi ku'ni de solay islen'ler. Usılayınsha İbadatxananı pa'klen'.
21 Birinshi aydın' on to'rtinshi ku'ni Qutqarılıw bayramın bayramlan', bunda jeti ku'n dawamında ashıtqısız nan jewin'iz kerek.
22 Bayramnın' birinshi ku'ni hu'kimdar o'zinin' ha'm xalıqtın' gu'nası ushın bir bug'anı gu'na qurbanlıg'ı ushın usınadı.
23 Bayramnın' jeti ku'ni dawamında ha'r ku'ni hu'kimdar Mag'an minsiz jeti bug'a menen minsiz jeti qoshqardı jandırılatug'ın qurbanlıq etip ha'm ha'r ku'ni bir tekeni gu'na qurbanlıg'ı etip beriwi kerek.
24 Qurbanlıq qılınatug'ın ha'r bir bug'a ha'm ha'r bir qoshqar menen birge g'a'lle sadaqası sıpatında bir efadan un ha'm ha'r bir efa ushın bir hinnen za'ytu'n mayın bersin.
25 Jetinshi aydın' on besinshi ku'ni baslanatug'ın Qos bayramı ushın da hu'kimdar jeti ku'n dawamında beriletug'ın gu'na qurbanlıqların, jandırılatug'ın qurbanlıqlardı, g'a'lle sadaqaların ha'm za'ytu'n mayın bersin».
