Ezekiel 7 bob
1 Mag'an Jaratqan İyeden so'z tu'sti:
2 – İnsan ulı! Quday İye İzrail jerine bılay deydi: «Aqırı jetti! Jerdin' to'rt ta'repinin' aqırı jetti!
3 Mine, senin' aqırın' jetti! Men senin' u'stin'e g'a'zebimdi shashaman. Sag'an tutqan jolların'a ılayıqlı hu'kim shıg'arıp, barlıq jerkenishli islerin' ushın jazalayman.
4 Seni ayamayman, rehim de qılmayman. Tutqan jolların' ushın seni so'zsiz jazalayman, jerkenishli islerin' ushın jazan'dı tartasan'. Sonda sizler Menin' Jaratqan İye ekenimdi bilip alasız.
5 Quday İye bılay deydi: Apat u'stine apat! Qaran'lar, apat kelmekte!
6 Aqırın' jetti, awa, ku'nin' payanına jetti! Ol sag'an qarsı ko'terildi. Qara, ol kiyatır!
7 Sag'an qırg'ın keldi, sag'an keldi, ha'y, eldin' turg'ını! Waqıt jetti, ku'n jaqın. Tawlarda quwanısh emes, ala-sapıran hu'kim su'redi.
8 Tez arada Men sag'an qa'ha'rimdi to'gemen ha'm g'a'zebimdi tolıq shashaman. Sag'an tutqan jolların'a ılayıqlı hu'kim shıg'arıp, barlıq jerkenishli islerin' ushın jazalayman.
9 Seni ayamayman, rehim de qılmayman. Tutqan jolların' ushın seni so'zsiz jazalayman, jerkenishli islerin' ushın jazan'dı tartasan'. Sonda sizlerdi jazalag'an Men, Jaratqan İye ekenimdi bilip alasız.
10 Mine ol, sol ku'n! Mine, ol keldi: qırg'ın ko'gerip shıqtı, zorlıq gu'lledi, menmenlik bu'rtik jardı.
11 Zorlıq nızamsızlıqtı jazalaytug'ın tayaq bolıp o'sip shıqtı. Xalıqtan hesh kim qalmadı. Olardın' molshılıg'ı da, baylıg'ı da, saltanatı da qalmadı.
12 Waqıt keldi, sol ku'n jaqınlastı. Satıp alg'an quwanbasın, satqan g'am shekpesin. Sebebi Menin' g'a'zebim pu'tkil alaman u'stine jawadı.
13 Jerin satqan adam o'mirinin' aqırına deyin satqan jerin qaytarıp ala almaydı. O'ytkeni ayan pu'tkil alamang'a tiyisli, ol o'zgermeydi. O'zlerinin' gu'nası sebepli olardın' birewi de o'mirin saqlap qala almaydı.
14 Ka'rnaylar shalındı, ha'mmesi tayar. Biraq hesh kim sawashqa tu'speydi, o'ytkeni Menin' g'a'zebim pu'tkil alaman u'stine jawadı.
15 ırtta qılısh, ishte illet ha'm ashlıq. Daladag'ılar qılıshtan, qala ishindegiler ashlıqtan ha'm illetten o'ledi.
16 Aman qalg'anlar oypatlıqtag'ı kepterlerdey tawg'a qashadı. Olardın' ha'r biri o'z gu'nası ushın zar en'ireydi
17 Qollarında hal qalmaydı, dizelerinin' ma'darı qurıydı.
18 Olar aza kiyimin kiyedi, olardı qorqınısh biyleydi. Ha'mmesinin' ju'zi uyattan qızarıp, barlıg'ı shashların tıqırlap aldıradı.
19 Olar gu'misin ko'shege ılaqtıradı, altını haram sanaladı. Jaratqan İyenin' g'a'zep ku'ninde gu'mis ha'm altını olardı qutqara almaydı, ashlıqtan da saqlamaydı, qarnın da toydırmaydı. Altın ha'm gu'mis olardı gu'nag'a baslag'an edi.
20 O'zleri maqtanıp ju'rgen a'jayıp tag'ınshaqlarınan olar jerkenishli butlarının' mu'sinlerin ha'm haramı na'rselerin isletti. Sonlıqtan Men bul baylıqların olar ushın haram qıldım.
21 Men olardı jat jerlilerge olja qılaman, jer betindegi jawızlarg'a talataman. Jawızlar olardı haramlaydı.
22 Men olarg'a na'zer salmayman, olar Menin' qa'dirli ornımdı haramlaydı. Basqınshılar sol jerge kirip, onı haramlaydı.
23 Shınjırlar tayarlan'! El qanlı jınayatqa, qala zorlıqqa tolıp ketken.
24 Men milletlerdin' en' jawızın jiberemen. Olar xalqımnın' u'ylerin basıp aladı. Ku'shlilerdin' menmenligine shek qoyaman, olardın' muxaddes orınları haram qılınadı.
25 Qorqınısh kelgende, olar tınıshlıq izley baslaydı, biraq tınıshlıq bolmaydı.
26 Apat izinen apat keledi, mısh-mısh izinen mısh-mısh tarqaladı. Olar payg'ambarlardan biykarg'a ayanlar soraydı, ruwxaniyler ta'lim beriwden, aqsaqallar ken'es beriwden juda boladı.
27 Patsha g'amg'a batadı, hu'kimdarın qorqınısh biyleydi, el xalqının' qolı iske barmaydı. Olardı tutqan jollarına say jazalayman, o'z hu'kimlerine ılayıqlı hu'kim shıg'araman. Sonda olar Menin' Jaratqan İye ekenimdi bilip aladı».
