Ezekiel 8 bob
1 Su'rginde bolg'an waqtımızdın' altınshı jılının' altınshı ayının' besinshi ku'ni men u'yimde otırg'an edim, Yahuda aqsaqalları da menin' janımda edi. Sonda Quday İye qolın u'stime qoydı.
2 Qarag'anımda, jalıng'a uqsag'an birewdi ko'rdim. Onın' belinen to'meni jalıng'a uqsaydı, belinen joqarısı bolsa, mıstay jarqırap turg'an edi.
3 Ol qolg'a uqsag'an bir na'rseni sozıp, menin' shashımnan uslap aldı. Ruwx meni jer ha'm ko'k aralıg'ına ko'terdi ha'm Qudaydın' ayanında meni Erusalimge, İbadatxananın' ishki ha'wlisinin' arqa da'rwazasının' kirer awzına alıp bardı. Ol jerde Qudaydın' qızg'anıshın oyatqan but turg'an edi.
4 Sol jerde mag'an İzraildın' Qudayının' saltanatı ko'rindi. Men bunday ayandı oypatlıqta da ko'rgen edim.
5 Quday mag'an: – İnsan ulı! Arqa ta'repke qara, – dedi. Qarasam, qurbanlıq orın janındag'ı da'rwazanın' arqa ta'repinde sol qızg'anısh oyatatug'ın buttın' mu'sini turg'an eken.
6 Quday mag'an ja'ne bılay dedi: – İnsan ulı, sen olardın' ne islep atırg'anın ko'rip tursan' ba? İzrail xalqı bul jerde ju'da' jerkenishli islerdi islewi arqalı Meni Muxaddes ma'kanımnan uzaqlastırmaqta. Biraq sen bunnan da beter jerkenishli na'rselerdi ko'resen'.
7 Ol meni ha'wlinin' kirer awzına alıp keldi. Qarasam, diywalda bir tesik bar eken.
8 Ol mag'an: – İnsan ulı! Diywaldı tes, – dedi. Men diywaldı testim ha'm ol jerde bir qapını ko'rdim.
9 Ol mag'an: – Kirip, olar bul jerde islep atırg'an ju'da' jerkenishli islerdi ko'r, – dedi.
10 Men ishke kirip qarag'anımda, diywaldı aylandırıp ha'r qıylı jer bawırlawshılardın', jerkenishli haywanlardın' ha'm izraillılardın' barlıq but mu'sinlerinin' su'wretlerinin' salıng'anın ko'rdim.
11 Olardın' aldında izraillılardın' jetpis aqsaqalı ha'm aqsaqallardın' arasında Shafan ulı Yazaniya turg'an edi. Olardın' ha'r birinin' qolında tu'tetki tu'tetiletug'ın ıdıs bolıp, ıdıstan shıqqan xosh iyis bultlar kibi joqarıg'a ko'terilip turdı.
12 Keyin Quday mag'an bılay dedi: – İnsan ulı! İzrail aqsaqallarının' ha'r birinin' qaran'g'ılıqta, o'zlerinin' butlarının' bo'lmelerinde neler islep atırg'anın ko'rdin' be? Olar: «Jaratqan İye bizlerdi ko'rmeydi, Jaratqan İye eldi ta'rk etken», – deydi.
13 Ol mag'an tag'ı da: – Sen olardın' bunnan da beter jerkenishli islerdi islegenin ko'resen', – dedi.
14 Son'ınan Ol meni Jaratqan İyenin' U'yinin' arqa da'rwazasının' kirer awzına alıp keldi. Men ol jerde Tammuz* degen quday ushın aza tutıp jılap otırg'an hayallardı ko'rdim.
15 Ol mag'an: – Bunı ko'rdin' be, insan ulı? Sen bunnan da beter jerkenishli islerdi ko'resen', – dedi.
16 Ol meni Jaratqan İyenin' U'yinin' ishki ha'wlisine alıp keldi. Ol jerde, İbadatxananın' kirer awzında, aywan ha'm qurbanlıq orın aralıg'ında jigirma beske jaqın erkek bar edi. Olar Jaratqan İyenin' İbadatxanasına arqasın, al shıg'ısqa ju'zin qaratıp, shıg'ıstag'ı quyashqa tabınıp atırg'an edi.
17 Ol mag'an bılay dedi: – Ko'rdin' be, insan ulı? Yahuda xalqının' bul jerde islep atırg'an jerkenishli isleri jeterli emes pe edi? Bug'an qosa, olar jerdi zorabanlıqqa toltırmaqta ha'm Menin' g'a'zebimdi qattıraq qozg'atpaqta. Olardın' Mag'an qalay til tiygizip atırg'anına qara!
18 Sonın' ushın Men g'a'zep atına minemen. Men olardı ayamayman, rehim de etpeymen. Bar dawısı menen baqırıp jalbarınsa da, olardı tın'lamayman.
