Daniel 12 bob
1 – Sol waqıtta xalqın'dı qorg'awshı ullı hu'kimdar, Mixail perishte payda boladı. O'ytkeni milletler payda bolg'annan baslap ulıwma ju'z bermegen qorqınıshlı azap da'wiri baslanadı. Sonda senin' xalqın'nın' arasınan Qudaydın' kitabına atı jazılg'an ha'r bir adam qutqarıladı.
2 O'lip, topıraqqa ko'milgenlerdin' ko'pshiligi oyanadı: kimisi ma'n'gilik o'mirge iye boladı, kimisi shermendelikke ha'm ma'n'gi uyatqa duwshar boladı.
3 Danalar ashıq aspan sıyaqlı jaynaydı, adamlardı a'dil jolg'a jetelegenler bolsa, juldızlar yan'lı udayına ma'n'gi-baqıy jarqıraydı.
4 Al sen, Daniel, kitaptı mo'rle de, bul so'zlerdi aqırzamang'a deyin sır saqla. Ko'p adamlar o'zlerin ana jaqtan mına jaqqa urıp, bilimin asıradı.
5 Sonda men, Daniel da'ryanın' boyında payda bolg'an ja'ne basqa ekewin ko'rdim: birewi da'ryanın' bergi jag'asında, ekinshisi arg'ı jag'asında turg'an edi.
6 lardın' biri ag'ıstın' joqarg'ı jag'ında turg'an zıg'ır kiyimli perishteden: – Qashang'a deyin bul tan' qalarlıq waqıya dawam etedi? – dep soradı.
7 Suwdın' joqarg'ı jag'ında turg'an zıg'ır kiyimli perishtenin' eki qolın aspang'a sozıp, ma'n'gi jasawshı Qudaydın' atı menen ant ishkenin ha'm mınaday so'zler aytqanın esittim: – Bul tan' qalarlıq waqıyalar bir mu'ddet, eki mu'ddet ha'm yarım mu'ddet dawam etedi. Muxaddes xalıqtın' ku'sh-qu'direti tolıq joq bolg'anda, bulardın' ha'mmesi tamam boladı.
8 Sol adamnın' aytqan so'zlerin esittim, biraq tu'sinbedim ha'm onnan: – Mırzam, bunın' aqıbeti ne boladı? – dep soradım.
9 Ol bılay dep juwap berdi: – Endi kete ber, Daniel. Bul so'zler jabılıp, aqırzamang'a deyin mo'rlep qoyılg'an.
10 Ko'pler pa'klenedi ha'm ag'arıp, tazalanadı. Biraq napa'k napa'kligin dawam etedi. Napa'klerdin' birewi de bunı tu'sinbeydi, danalar bolsa bulardın' barlıg'ın tu'sinip aladı.
11 Ku'ndelikli qurbanlıqlar toqtatılıp, wayran qılatug'ın jerkenishli zat ornatılg'annan baslap 1290 ku'n o'tedi.
12 Aqırına deyin, yag'nıy 1335 ku'n o'tkenshe ku'tip, shıdag'anlar qanday baxıtlı!
13 Sen, Daniel, o'mir jolın'dı dawam etip, bul du'nyadan ko'z jumasan'. Biraq aqırzamanda tirilip, sıyın'dı alasan'.
