Daniel 8 bob
1 Birinshi ayannan keyin, patsha Belshassardın' hu'kimdarlıg'ının' u'shinshi jılında Danielge, yag'nıy mag'an ja'ne bir ayan ko'rindi.
2 Bul ayanda men Elam wa'layatının' Suza qorg'an qalasında, Ulay kanalının' boyında turg'an ekenmen.
3 Men kanal boyında bir qoshqardın' turg'anın ko'rdim. Onın' uzın eki mu'yizi bar edi. Onın' mu'yizinin' biri uzınıraq, sol uzın mu'yizi ekinshi bolıp shıqqan edi.
4 Qoshqar batıs, arqa ha'm qubla ta'replerge o'zin urıp atırg'anın ko'rdim. Hesh bir haywan og'an qarsı shıg'a almaytug'ın edi ha'm onın' qolınan hesh na'rseni qutqara almaytug'ın edi. Qoshqar qa'legenin islep, o'zin aybatlı qılıp ko'rsetti.
5 Bunı tamasha qılıp turg'anımda, batıs ta'repten bir tekenin' pu'tkil jer ju'zin aralap, tuyaqları jerge tiymesten kiyatırg'anın ko'rdim. Onın' ko'zlerinin' ortasında bir u'lken mu'yizi bar edi.
6 Ol bar ku'shi ha'm g'a'zebi menen men ko'rgen kanaldın' boyında turg'an eki mu'yizli qoshqarg'a qaray taslandı.
7 G'a'zep penen qoshqardı su'zip, onın' mu'yizlerin sındırg'anın ko'rdim. Qoshqardın' tekege qarsı shıg'atug'ın ku'shi joq edi. Teke onı jerge qulatıp, basqılap tasladı, qoshqardı onın' qolınan qutqaratug'ın hesh kim bolmadı.
8 Teke qattı ku'sheyip ketti, biraq ku'sh-qu'diretke tolg'an waqıtta, onın' u'lken mu'yizi sınıp tu'sti ha'm onın' ornına to'rt ta'repke qayırılıp, basqa u'lken to'rt mu'yiz o'sip shıqtı.
9 Sol mu'yizlerdin' birinen ja'ne bir kishkene mu'yiz o'sip shıqtı. Keyin ol u'lkeyip, qublag'a, shıg'ısqa ha'm go'zzal u'lkege qaray jayıla berdi.
10 Qu'direti ko'kke jetken bul mu'yiz aspan la'shkerlerine hu'jim qıldı. Aspan la'shkerleri bolg'an juldızlardın' bazıların jerge tu'sirip, olardı basqılap tasladı.
11 Ha'tteki, aspan la'shkerlerinin' sa'rka'rdasın mensinbey, og'an beriletug'ın ku'ndelikli qurbanlıqlardı toqtattı. Muxaddes orındı bolsa wayran qıldı.
12 Jawızlıq sebepli aspan la'shkerleri ku'ndelikli qurbanlıqlar menen birge og'an tapsırıldı. Haqıyqattı ayaq astı qılg'an sol mu'yiz ha'r bir isinde tabısqa eriser edi.
13 Keyin bir perishtenin' so'ylesip atırg'anın esitip qaldım. Basqa birewi perishte onnan bılay dep soradı: – Ayandag'ı bul jawızlıq ku'ndelikli qurbanlıqlardın' ornın qashang'a deyin iyeleydi? Qashang'a deyin Muxaddes orın ha'm aspan la'shkerleri ayaq astı boladı?
14 Ekinshi perishte mag'an bılay dedi: – Bunday awhal eki mın' u'sh ju'z ku'n ha'm tu'n dawam etedi. Sonnan keyin, Muxaddes orın pa'klenip, aldıng'ı halına qaytarıladı.
15 Men, Daniel ko'rgen ayannın' ma'nisin tu'siniw ushın, basımdı qatırıp turg'anımda, ku'tilmegende, aldımda adam su'lderindegi birew payda boldı.
16 Sol waqıtta men Ulay kanalınan: «Ha'y, Jabrayıl, bul adamg'a ayannın' ma'nisin tu'sindirip ber», – dep aytqan adam dawısın esittim
17 Jabrayıl men turg'an jerge jaqınlasqanda, qorqqanımnan etbetimnen jerge jıg'ıldım. Biraq ol mag'an: – Ha'y, adam balası, bul aqırzaman haqqındag'ı ayan ekenin tu'sin, – dedi.
18 Ol so'ylep atırg'anda esten awıp, jerde sozılıp jatırg'an edim. Degen menen, ol qolın sozıp, meni ayaqqa turg'ızıp qoydı da,
19 mag'an bılay dedi: – Qulaq sal, Quday O'z g'a'zebin jer ju'zine shashıwdı belgilegen waqtında, neler bolatug'ının sag'an bildiremen. Sebebi bul ayan belgilengen aqırzamang'a baylanıslı.
20 Sen ko'rgen eki mu'yizli qoshqar – bul Midiya ha'm Persiya patshaların bildiredi.
21 Ju'nli teke bolsa Grek patshasın. Eki ko'zinin' ortasındag'ı u'lken mu'yiz – Grek taxtına otıratug'ın birinshi patsha.
22 Sınıp tu'sken mu'yizdin' ornına shıqqan to'rt mu'yiz – sol xalıqtan shıg'atug'ın to'rt patshalıqtı bildiredi. Taxtqa otırg'an to'rt patsha aldıng'ı patshag'a qarag'anda ha'lsiz boladı.
23 Sol to'rt patshanın' hu'kimdarlıg'ının' aqırı jaqınlap, gu'naları tolıptasqanda, hiylekerlikke sheber, aybat ju'zli bir patsha bas ko'terip shıg'adı.
24 Ol ju'da' ku'sheyip ketedi, biraq o'z ku'shi menen bug'an erispeydi. Ol ha'mme na'rseni wayran qılıp, barlıq islerinde tabısqa erisedi. Ku'shli basshılardı ha'm muxaddes xalıqtı qırıp taslaydı.
25 Ol sumlıg'ı menen hiylekerligi arqalı tabısqa erisip, ta'kabbirlenip ketedi. Ko'p adamlardı eskertip otırmay o'ltiredi, ha'tteki, en' ullı patshalardın' Patshasına qarsı bas ko'teredi. Biraq ol insan qolı tiymey-aq joq qılınadı.
26 Sag'an aytılg'an azang'a ha'm keshke baylanıslı ayan haqıyqat. Sen ayandı sır tut, o'ytkeni bul uzaq keleshekke baylanıslı.
27 Usı waqıyadan son', Danieldin', yag'nıy menin' ma'nisim qashıp, bir neshe ku'n awırıp jattım. Son'ınan ornımnan turıp, patshanın' xızmetine qayttım. Degen menen, bul ayan meni pu'tkilley hawlıqtırıp taslag'an edi. Men onın' ma'nisin tu'sinbegen edim.
