Daniel 9 bob
1 Babiloniya patshalıg'ına otırg'an midiyalı Axashwerosh ulı Dariydin' hu'kimdarlıg'ının' birinshi jılı edi.
2 Men, Daniel Dariydin' hu'kimdarlıg'ının' da'slepki jılında Muxaddes Kitaptı tu'siniwge kirisken edim. Jaratqan İyenin' payg'ambar Eremiyag'a aytqan so'zleri boyınsha, Erusalimnin' jetpis jıl dawamında wayran bolıp jatatug'ının bilip aldım.
3 Sonda men ju'zimdi Quday İye ta'repke burıp, jalbarınıp duwa ettim, oraza tuttım, aza kiyimin kiyip, ku'lge otırdım.
4 Qudayım Jaratqan İyege duwa etip, gu'nalarımızdı moyınlap, bılay dedim: «O, İye, ullı ha'm aybatlı Quday! O'zin'di su'yip, buyrıqların'a boysıng'anlar menen du'zgen kelisimin'de sadıq qalasan'!
5 Al bizler gu'na islep, jamanlıqqa qol urdıq. Jawız islerdi islep, Sag'an qarsı bas ko'terdik, buyrıqların'nan ha'm nızamların'nan ju'z burdıq.
6 Bizler Senin' atın' menen patshalarımızg'a, basshılarımızg'a, ata-babalarımızg'a ha'm elimizdegi barlıq xalıqqa so'ylegen xızmetkerlerin' bolg'an payg'ambarlarg'a qulaq salmadıq.
7 A'dalatlıq Sen ta'repte, İye! Al bizler bu'gin shermende boldıq. Bizler Sag'an qıyanet etkenimiz ushın Yahuda ha'm Erusalim turg'ınların – pu'tkil İzrail xalqı bolg'an bizlerdi uzaq ha'm jaqın ellerge tarqatıp jiberdin'.
8 Jaratqan İye, Sag'an qarsı gu'na qılg'anımız ushın patshalarımız, basshılarımız, ata-babalarımız, – ha'mmemiz shermende boldıq.
9 Quday İyemiz, bizler Sag'an qarsı bas ko'tersek te, Sen gu'nalarımızdı keshiriwshi, rehimli Qudaysan'.
10 Qudayımız Jaratqan İye, bizler Sag'an qulaq salmadıq! Xızmetkerlerin' payg'ambarlar arqalı bizlerge bergen nızamların'a a'mel qılmadıq.
11 Pu'tkil İzrail xalqı Nızamın'dı buzıp, haq joldan azg'ırıldı, Sag'an qulaq salıwdı qa'lemedi. Bizler Sag'an qarsı gu'na qılg'anımız ushın, qulın' Muwsanın' Nızamında jazılg'an na'letler basımızg'a tu'sti, ishilgen antlar orınlandı.
12 Awa, Sen bizlerge ha'm basshılarımızg'a eskertip aytqan so'zlerin'di ju'zege asırıp, bizlerdi u'lken apatqa duwshar ettin'. Erusalimnin' basına tu'sken awır apat jer ju'zindegi hesh bir jerde bolmag'an.
13 Muwsanın' Nızamında jazılg'an barlıq apatlar basımızg'a tu'sti. Al bizler sonda da gu'nalarımızdan qaytıp, Qudayımız Jaratqan İyenin' miyrim-sha'pa'a'tin izlemedik, Onın' haqıyqat so'zin de eske almadıq.
14 Jaratqan İye bizlerdi bul apatlarg'a duwshar qıldı, sebebi Qudayımız Jaratqan İye islegen ha'r bir isinde a'dalatlı. Al bizler Onın' so'zine qulaq salmadıq.
15 O, Quday İyemiz, Sen O'z xalqın'dı Mısırdan qu'diretli qolın' menen alıp shıqtın' ha'm ha'zirge deyin atın' dan'qqa bo'lengen. Al bizler gu'na qıldıq, jawızlıqqa qol urdıq.
16 İye, Sen haqlıg'ın' boyınsha O'z qalan' Erusalimnen, O'zin'nin' muxaddes tawın'nan ashıw ha'm g'a'zebin'di alıp taslay go'r! Bizlerdin' gu'nalarımız ha'm ata-babalarımızdın' nızamsızlıqları sebepli Erusalim ha'm O'zin' tan'lag'an xalqın' qon'sı xalıqlardın' arasında xor bolıp atır.
17 Endi Qudayımız, qulın'nın' duwasın ha'm jalbarınıwın esit. O'zin' ushın, İye, wayran bolg'an Muxaddes ornın'a nurlı ju'zin'di qarat.
18 Qudayım, qulaq salıp, esit! Ko'zlerin'di ashıp, bizlerdin' shekken azabımızg'a ha'm O'z atın' menen atalg'an qalan'nın' awhalına qara. Bizler o'z a'dilligimizge su'yenip emes, al Senin' sheksiz miyrimin'e su'yenip jalbarınamız.
19 ye, qulaq sal! İye, bizlerdi keshir! İye, na'zer salıp, ha'reket ete go'r! Qudayım, O'zin' ushın asıg'a go'r, o'ytkeni bul qala ha'm xalıq Senin' atın' menen atalg'an».
20 Men tınbay duwa etip, o'zimnin' ha'm xalqım İzraildın' gu'naların ashıq moyınlap, Qudaydın' muxaddes tawı – Erusalim ushın Qudayım Jaratqan İyege jalbarınıp atırg'an edim.
21 Men ele duwa etip atırg'anımda, aldıng'ı ayanda ko'rgen adam su'lderindegi Jabrayıl jıldam ushıp kelip, qasıma kelip turdı. Bul keshki qurbanlıq usınılatug'ın waqıt edi.
22 Ol mag'an tu'sindirip, bılay dedi: «Daniel, men sag'an danalıq ha'm tu'sinik beriw ushın keldim.
23 Sen Qudayg'a duwa etip baslag'anın'da, Ol sag'an juwap bergen edi. Men juwaptı sag'an jetkiziw ushın keldim, sebebi sen Qudaydın' su'yikli bendesisen'. Qa'ne, endi aytatug'ın so'zlerime jaqsılap qulaq sal, ayannın' ma'nisin tu'sinip al.
24 Jınayat islerdi toqtatıp, gu'nalarg'a shek qoyıw, ayıplardı pa'klew ha'm ma'n'gi a'dillikti ornatıw, ayan ha'm payg'ambarlardın' so'zleri a'melge asıp, en' muxaddes İbadatxana qayta bag'ıshlanıp, maylanıwı ushın Quday senin' xalqın' ha'm muxaddes qalan' ushın jetpis ret jeti ha'pte belgiledi.
25 Mınanı tu'sinip, bilip al: Erusalimdi qayta qurıw ushın buyrıq berilgennen baslap, Quday maylag'an hu'kimdar kelgenge deyin jetpis ret jeti ha'pte o'tedi. Alpıs eki ret jeti ha'pte o'tkende, Erusalim qalası, onın' ko'sheleri ha'm qorg'anları qayta tiklenedi, biraq bul qıyınshılıq da'wirde ju'z beredi.
26 Alpıs eki ma'rte jeti ha'pte o'tkende, Quday maylag'an hu'kimdar o'ltiriledi ha'm ol erisken ha'r bir na'rse joq boladı. Keyingi keletug'ın hu'kimdardın' a'skerleri qalanı da, İbadatxananı da wayran qıladı. Onın' aqırı topan suwınday bolıp, urıs aqırına deyin dawam etedi. Quday qıyratıwdı qarar etken edi.
27 Sol hu'kimdar ko'p xalıqlar menen jeti ha'pte ku'shli bir kelisim du'zedi. Sol ha'ptenin' yarımı o'tkende, ol qurbanlıq ha'm sadaqalarg'a shek qoyadı. Ja'ne de, İbadatxanag'a wayran qılatug'ın jerkenishli bir zattı ornatadı. Bul – wayran qılıwshı hu'kimdardı joq qılatug'ın Qudaydın' belgilegen ku'nine deyin dawam etedi».
