Hoshea 11 bob
1 Jaratqan İye bılay deydi: «Balalıg'ında İzraildı su'ydim, Ulımdı Mısırdan shaqırıp aldım.
2 Olardı qansha shaqırsam, Mennen sonsha uzaqlastı. Qurbanlıqlar berdi Baallarg'a, Tu'tetkiler tu'tetti butlarg'a.
3 Efrayımg'a ta'y-ta'y turıp, ju'riwdi Men u'yrettim, Onı qollarımda ko'terip ju'rdim. Biraq ol bilmedi Menin' shıpa bergenimdi.
4 Men onı insan jibi menen, Su'yispenshilik arqanı menen jeteledim. Moynınan moyıntırıqtı alıp taslap, Onı awqatlandırıw ushın, en'keydim.
5 Xalqım ta'wbe qılıwdan bas tartqanı ushın, Mısırg'a qaytıp barmay ma? Assiriya olarg'a hu'kimdarlıq qılmay ma?
6 Qalalarında qılısh jalan'laydı, Da'rwazalarının' ta'mbileri joq qılınadı, Qorg'anı ishinde olardı qılısh jalmaydı.
7 O'z xalqım Mennen ju'z burıwg'a beyimlesedi, Baalg'a dad salsa da, Ol olardı hasla joqarı ko'termes.
8 Ha'y, Efrayım, qalay sennen waz kesheyin? Ha'y İzrail, qalayınsha seni taslap keteyin? Adma qalasın joq qılg'anımday, seni joq qıla alaman ba? Seboyımg'a qılg'anımdı sag'an qıla alaman ba? Bunday qılıwg'a ju'regim dawamas hasla! Sag'an bolg'an mehrim artıp ketti.
9 Yaq, lawlag'an g'a'zebimdi basın'ızg'a jawdırmayman, Efrayımdı ja'ne nabıt qılmayman. O'ytkeni Men insan emespen, Qudayman, Aran'ızda bolatug'ın muxaddes Qudayman, Artıq aldın'ızg'a g'a'zep penen barmayman.
10 Arıslanday aqırg'anımda, xalqım Jaratqan İyenin', Menin' izimnen eredi, Men aqırg'anımda balalarım batıstan titiresip keledi.
11 Olar Mısırdan quslarday bolıp, Assiriyadan kepterlerdey qaltırap keledi. Men olardı u'ylerine ornalastıraman, Bunı Men, Jaratqan İye aytaman.
12 Efrayım a'tirapımdı jalg'an menen, İzrail Meni hiyle menen orap tasladı. Al Yahuda Quday menen birge bolıp, Muxaddes Qudayg'a sadıq qaldı».
