1 Efrayım sho'l samalın ku'tip turadı, Ku'ni boyı shıg'ıs samalının' izinen qu ju'redi. Jalg'an ha'm zorlıqtı arttıradı. Assiriya menen kelisim du'zip, Za'ytu'n mayın Mısırg'a jiberedi.
2 Jaratqan İyenin' dawası bar Yahudag'a, Yaqıptı ju'rgen jolı boyınsha jazalaydı, İslegen islerin o'zlerine qaytaradı.
3 Yaqıp anasının' qarnında tuwısqanının' tabanın uslag'an, U'lkeygende, Quday menen gu'resken.
4 Perishte menen gu'resip, onı jen'di, Ol jılap, miyrim-sha'pa'a't soradı, Qudaydı Beyt-Elde taptı. Sol jerde Quday bizler menen so'ylesti.
5 A'lemnin' Qudayı Jaratqan İye, Onın' atı – Jaratqan İye.
6 Sonlıqtan Qudayın'a qayt sen, Su'yispenshilikti ha'm a'dillikti saqla, Ha'mme waqıtta Qudayın'dı ku't.
7 Jaratqan İye bılay deydi: «Xalqım ta'reziden jeytug'ın sawdagerge uqsaydı, Olar urlıqtı jaqsı ko'redi.
8 Efrayım: „Men bayman, O'zime mal-da'wlet arttırdım, Barımdı man'lay terim menen taptım, Hesh kim meni gu'nakar dep ayıplay almas“, – deydi.
9 Biraq seni Mısırdan alıp shıqqan, Qudayın' Jaratqan İye – Men bolaman. Sho'ldegi ku'nlerin'izdegidey, Seni ja'ne shatırlarg'a ornalastıraman.
10 Men payg'ambarlarg'a so'yledim, Olarg'a ko'p ayanlar berdim, Olar arqalı tımsallar ayttım».
11 Giladta jawızlıq islenbedi me? So'zsiz onın' xalqı hesh na'rse bolmay qaldı. Gilgalda bug'alar qurbanlıq qılmadı ma? Atızlar do'geregindegi qurbanlıq orınlar, Tas u'yindilerine uqsap qaladı.
12 Yaqıp Aram eline qashıp ketti, İzrail ol jerde hayalı ushın qul bolıp, Qalın'lıq to'lew ushın qoy baqtı.
13 Jaratqan İye payg'ambarı arqalı, İzrail xalqın Mısırdan alıp shıqtı, Payg'ambar arqalı olardı qorg'adı.
14 Biraq Efrayım qattı g'a'zeplendirdi Qudaydı, Efrayımnan esabın talap qıladı to'kken qanı ushın, Onı mazaq qılg'anı ushın ılayıqlı jazasın qaytaradı.
