Hoshea 13 bob
1 Jaratqan İye bılay deydi: «Burın Efrayım so'ylegende, ha'mme titireytug'ın edi, İzrailda onın' ma'rtebesi ullı edi. Biraq Efrayım Baalg'a tabınıp, gu'na arttırdı, Usılay etip, o'zin o'limge tapsırdı.
2 Ha'zir de xalqım gu'na u'stine gu'na islep atır, Gu'mislerinen quyma butlar, Sheberlik penen mu'sinler sog'ıp atır. Bulardın' ha'mmesin o'nerment qoldan isler. Bunday adamlar haqqında bir so'z bar: „Butqa qurbanlıq qılg'an – tananı su'ygen boladı“.
3 Sonın' ushın, olar tan'g'ı dumanday boladı, Bir maydanda joq bolatug'ın shıqqa uqsaydı. Samal ushırg'an qırmandag'ı qawıqtay joq boladı, Morıdan shıqqan tu'tinge uqsap qaladı.
4 Biraq Mısırdan seni alıp shıqqan, Qudayın' Jaratqan İye – Men bolaman. Mennen basqa Qudaydı bilmewin'iz kerek, Mennen basqa joqdur senin' qutqarıwshın'.
5 Men seni sho'lde, Suwsız qurg'aqshılıqta baqtım.
6 Otlı jaylawda olar toydı, Qarnı toyg'annan keyin, menmen boldı. Sol sebepli sen Meni umıttın'.
7 Men olardın' jolın arıslan sıyaqlı an'lıyman, Qaplan sıyaqlı, buqqıda jataman.
8 Balalarınan ayırılg'an ayıw sıyaqlı taslanaman, Ju'reklerin jawıp turg'an ko'kireklerin tilkimlep taslayman. Sol jerde arıslan sıyaqlı olardı jalmayman, Jırtqısh haywan kibi maydalap taslayman.
9 Ha'y, İzrail, Men seni qurtaman, Sag'an kim ja'rdem bere aladı?
10 Barlıq qalaların'dı qutqaratug'ın patshan' qa'ne? „Bizlerge patsha ha'm basshı ber“, – dep sorag'an biylerin' qa'ne?
11 Men ashıwlanıp, sag'an patsha berdim, G'a'zepke mingenimde, onı alıp tasladım.
12 Efrayımnın' jınayatı jıynalıp tur, Onın' gu'nası saqlanıp tur.
13 Tolg'aq tutqan ananın' azabı og'an tu'sedi, Biraq bala aqılsız bolıp, Waqtı bolg'anda da, qarınnan shıqpadı.
14 Bul xalıqtı o'liler ma'kanının' ku'shinen qutqarar ma edim? Olarg'a a'mengerlik qılar ma edim? Ha'y o'lim, uwlı iynen'di shıg'ar! Ha'y o'liler ma'kanı, apat ku'shin'di ko'rset! Endi Men rehim qılmayman».
15 Efrayım tuwısqanları arasında ko'p o'sip-o'nse de, Jaratqan İye onın' u'stine shıg'ıs samalın, Sho'lden esetug'ın samal jiberedi, Onın' bulag'ı qurıydı, Qudıg'ının' suwı tartılıp qaladı. G'a'ziynesindegi bahalı zatları tonaladı.
