Hoshea 14 bob
1 Samariya o'z Qudayına qarsı bas ko'terdi, Endi olar gu'nasının' jazasın tar qılıshtan o'ledi. Dushpanlar jerge urıp o'ltiredi bo'pelerin, Ju'kli hayallarının' qarınların jaradı.
2 Qudayın' Jaratqan İyege qayt, ha'y İzrail, O'ytkeni gu'nan' sebepli quladın'.
3 Ta'wbe etip, Jaratqan İyege qayt, Og'an ayt: «Barlıq gu'nalarımızdı keshir, Duwamızdı qabıl et. Bug'alardı qurbanlıq qılg'anday, Sag'an alg'ıs-maqtaw usınamız.
4 Assiriya bizlerdi qutqara almaydı, Minbeymiz sawash atlarına. Endi qoldan sog'ılg'an butlardı „qudayımız“, demeymiz. Sebebi jetim Sennen rehim tabadı».
5 Jaratqan İye bılay deydi: «Shıpa berip xalqıma, opasızlıqtan qaytaraman, Su'yemen shın kewilden olardı. Sebebi olarg'a degen g'a'zebim qayttı.
6 Shıq sıyaqlı bolaman İzrailg'a, Sonda İzrail lala gu'ldey ashıladı, Lebanon kedri sıyaqlı tamır jayadı.
7 Olardın' shaqaları jayılıp, Za'ytu'n ag'ashınday ko'rkem boladı. Lebanondag'ı kedr ag'ashınday xosh iyis taratadı.
8 Olardın' sayasında ja'ne xalıqlar jasaydı, Olar mol biyday jetistirip, ju'zimdey gu'lleydi. Lebanon sharabınday belgili boladı».
9 «Efrayım bılay desin: „Butlar mag'an kerek emes! Qudaydın' dawısına qulaq salaman, Na'zerimdi Og'an qarataman, Men jasıl sa'rwi ag'ashınday bolaman“. Men sen alg'an mol zu'ra'a'tin'nin' bulag'ıman».
10 Kim dana bolsa, usı jazılg'an so'zlerdi tu'sinedi, Kim aqıl-parasatlı bolsa, bulardın' barlıg'ın an'laydı. Jaratqan İyenin' jolları tuwrı, Bul joldan ju'redi haq adamlar, Biraq gu'nakarlar bul jollarda su'rnigip jıg'ıladı.
