Hoshea 4 bob
1 Tın'lan' Jaratqan İyenin' so'zin, İzrail xalqı, Jaratqan İyenin' bul eldin' turg'ınlarına qarsı dawası bar: «Bul elde sadıqlıq ta, su'yispenshilik te, Quday haqqında bilim de joq, Meni, O'z Qudayın tanıg'ısı kelmeydi.
2 Ol jerde na'let, jalg'an, adam o'ltiriw, urlıq, Ha'm buzıqshılıq tolıp ketken. Ha'mme jaqta zorlıq, qan u'stine qan to'gedi.
3 Sonın' ushın, jer ko'z jas to'gedi, Ol jerde jasaytug'ın xalıq ha'lsireydi. Nabıt bolar jabayı haywanlar, Ko'ktegi quslar, ha'tteki ten'izdegi balıqlar.
4 Birde birewin'iz dawlaspan'lar, Hesh kim bir-birin ayıplamasın, Menin' dawam sizlerge qarsı, ha'y ruwxaniyler!
5 Sizler ku'ndiz jıg'ılasız, Payg'ambar da tu'nde sizler menen birge su'rnigedi, Men anan'ızdı nabıt qılaman.
6 Joq bolmaqta xalqım Meni bilmegeni ushın, O'ytkeni sizler waz keshtin'iz Meni biliwden, Mag'an ruwxaniy bolıp xızmet etpesin, dep, Men de waz keshemen sizlerden. Sizler umıttın'ız Qudayın'ızdın' nızamların, Sonın' ushın, Men de perzentlerin'izdi umıtaman.
7 Ruwxaniyler, sizlerdin' sanın'ız artqan sayın, Mag'an qarsı ko'p gu'na qıldın'ız. Endi abırayın'ızdı to'gip, shermende qılaman.
8 Sizler xalqımnın' gu'na qurbanlıqları arqalı jasaysız, Olardın' gu'na qılıwın qa'leysiz.
9 Xalqımnın' basına tu'sken sizlerdin' de basın'ızg'a tu'sedi. Tutqan jolın'ız boyınsha jazalayman, Qılg'an qılmısın'ızg'a jarasa qaytaraman.
10 Olar jeydi, biraq toymaydı qarnı, Buzıqshılıq qıladı, biraq ko'beymeydi sanı. Olar buzıqshılıq ushın, Jaratqan İyeni ta'rk etti.
11 Jan'a ha'm eski sharap, Xalqımdı es-aqılınan ayırdı.
12 Olar ag'ash buttan ken'es sorap, Tayaqtan juwap aladı. O'ytkeni joldan urdı olardı buzıqshılıq ruwxı, O'z Qudayınan ayırılıp, buzıqshılıq qıldı.
13 Tawlardın' to'belerinde qurbanlıqlar shalıp, Tu'tetki tu'tetip atır to'beshiklerde, Emen, aq terek ha'm terebinflerdin' qoyıw sayalarında. Sonın' ushın, qızların'ız buzıq boldı, Kelinlerin'iz neke hadallıg'ın buzdı.
14 Buzıqshılıq qılg'an qızların'ızdı, Neke hadallıg'ın buzg'an kelinlerin'izdi jazalamayman. Sebebi erkeklerdin' o'zleri buzıqlarg'a baradı, Butqa tabınatug'ın jerde buzıqlar menen birge qurbanlıq shaladı. Es-aqılınan ayırılg'an xalıq o'ledi.
15 Sen, İzrail buzıqshılıq qılsan' da, Yahuda bul ayıpqa qol urmasın. Tabınıw ushın Gilgalg'a barman', Beyt-Awenge de ayaq baspan'. Tiri Jaratqan İye haqı ant ishpen'.
16 İzrail qaysar sıyırday bolıp ketti, Endi Jaratqan İye olardı Qalay bag'adı qoyday etip ken' jaylawda?
17 Efrayım butlarg'a ju'regin berdi, Qoy onı!
18 Olar sharabın tawısılg'ansha iship, Buzıqshılıq jolın dawam etedi, Olardın' hu'kimdarları shermendelikti jaqsı ko'rdi.
19 Dawıl olardı ushırıp alıp ketedi, Butlarg'a bergen qurbanlıqları sebepli uyatqa qaladı».
