1 İzraildı shıpalamaqshı bolg'anımda, Efrayımnın' ayıpları a'shkara boldı, Samariyanın' jınayatı ashıldı. Olar hiylekerlik penen is tutadı, Urılar u'ylerge urlıqqa tu'sedi, Qaraqshılar jol tosıp tonawshılıq qıladı.
2 Olardın' islegen jawız isleri yadımda, Biraq olar bunı oylamaydı da. Endi jawız isleri o'zlerin qorshap aldı, Sol gu'nalar menin' ko'z aldımda.
3 Olar jamanlıqları menen patshanın', Jalg'anları menen ha'meldarlarının' kewlin ko'terer.
4 Olardın' ha'mmesi buzıqshılıqqa ha'wes, Olar qamırdı iylegennen baslap, Ol ashıg'ang'a deyin, O'shpey janıp turg'an tandırg'a uqsaydı.
5 Patshasının' bayram ku'ni, Ha'meldarlar sharaptın' qızıwına ma's boldı, Patsha surbetler menen tabaqlas boldı.
6 Olar hiyle menen og'an jaqın bolar, Ju'rekleri peshtey janar, Tu'ni menen g'a'zepten pısqıp, Azanda jalınday lawlaydı.
7 Tandırday qızg'an bul barlıq adamlar, Hu'kimdarların jalmamay jutıp atır. Na'tiyjede patshaları birinen keyin biri o'lip atır, Biraq Meni ja'rdemge shaqırmadı birewi de.
8 Efrayım basqa xalıqlar menen aralasıp ketti, Ol bir jag'ı ku'yip, bir jag'ı shiyki qalg'an nang'a uqsaydı.
9 O'zge xalıqlar onın' ku'shin jalmadı, Ol bolsa, bunı an'lamadı. Shashlarına aq tu'sti, Biraq bunı da bayqamadı.
10 İzraildın' menmenligi, o'zine qarsı gu'walıq berer, Basına tu'sken apatlarg'a qaramay, O'z Qudayı Jaratqan İyege qaytpadı, Olar Meni izlemedi.
11 Efrayım sana-sezimi joq, aqılsız kepterge uqsaydı, Olar birese Mısırdı shaqırıp, Birese Assiriyag'a barıp, ja'rdem soraydı.
12 Olar ketkende, Men torımdı olardın' u'stine taslayman, Aspanda ushıp ju'rgen qustay etip, jerge tu'siremen. Olardı jıyınında aytılg'anı boyınsha jazalayman.
13 Ha'siret bolsın, olarg'a! Sebebi olar Mennen uzaqlasıp ketti! Apat jawadı olardın' baslarına, O'ytkeni Mag'an qarsı bas ko'terdi! Olardı qutqarg'ım keledi, Biraq Mag'an jalg'an so'yleydi.
14 Olar Mag'an shın ju'rekten jalbarınbaydı, To'seklerinde jatıp, baqıradı. Biyday ha'm sharap ushın olar o'z denelerin tiledi. Mennen olar uzaqlasadı.
15 Olarg'a ta'lim-ta'rbiya berip, ku'sheytken bolsam da, Olar Mag'an qarsı jamanlıq oyladı.
16 Olar jaramsız sadaqqa uqsaydı, Mag'an, Quday Taalag'a ju'zin burmaydı. Aqılsız so'zleri sebepli, Basshıları qılıshtan o'ledi, Mısırda olar ku'lki boladı».
