Hoshea 8 bob
1 Jaratqan İye bılay deydi: «Ka'rnay shalıp, dabıl salın'! Dushpan bu'rkittey Jaratqan İyenin' xalqının' u'stinde ushıp ju'r, Sebebi xalqım kelisimimdi buzdı, Olar nızamıma qarsı shıqtı.
2 İzrail xalqı Mag'an dad salıp: „Qudayım, Seni ta'n alamız!“ – deydi.
3 O'zleri bolsa, iygilikli islerden bas tarttı, Dushpanlar quwg'ın qıladı olardı.
4 Olar Mensiz patshalar tayınladı, Ruxsatımsız basshılar sayladı. Gu'mis ha'm altınınan o'zleri ushın butlar soqtı, Usı arqalı baslarına apat keltirdi.
5 Ha'y, Samariya! Senin' tana su'lderindegi butın' jerkenishli, Sizlerge qarsı g'a'zebim lawlap janbaqta! Qashan ayıpsız bolıp ju'resiz?
6 O'ytkeni bul İzraildın' isi, Buttı bir o'nerment soqtı, sonlıqtan ol Quday emes! Samariyanın' mu'sin tanası sındırıp taslanadı.
7 Samal ekken adamlar boran orıp alar, Masaqsız biyday un bolmas. Biydayın'ızdın' masag'ı bolg'anı menen, Onı bo'ten xalıqlar jep keter.
8 İzrail jalmap jutıldı, Basqa xalıqlar arasında jaramsız ıdısqa uqsap qaldı.
9 Jalg'ız qan'g'ıp ju'rgen qulanday, Olar Assiriyag'a ketti. Efrayım o'zine oynaslar jalladı.
10 Olar basqa xalıqlardan oynaslar jallasa da, Men olardı bir jerge jıynap alaman. Ku'shli patshanın' zulımlıg'ı astında, Olar tez arada ha'lsizlenip qaladı.
11 Efrayım gu'naların juwmaqshı bolıp, Ko'p qurbanlıq orınlar qurıp tasladı. Bular bolsa, gu'na isleytug'ın orıng'a aylandı.
12 Men bul xalıqqa ko'p nızamlar jazdım, Biraq olar nızamlarımdı jat na'rse dep oyladı.
13 Olar qurbanlıqlar beredi, O'zleri qurbanlıq go'shinen jeydi, Biraq Jaratqan İyenin', Menin' kewlim tolmas olarg'a. Olardın' jınayatların eske alaman. Gu'naları ushın jazasın beremen, Olar Mısırg'a qaytıp ketedi.
14 İzrail O'z Jaratıwshısın umıtıp, saraylar qurdı, Yahuda ko'p qalalardı bekkemledi. Biraq Men qalalarına ot qoyaman, Qorg'anların otqa jem qılaman».
