Hoshea 9 bob
1 Ha'y İzrail, basqa xalıqlarday quwanıp, shadlanba! Sen opasızlıq qılıp, Qudaydan uzaqlastın', Barlıq qırman jerinde, Buzıqshılıqqa to'lengen to'lemdi jaqsı ko'rdin'.
2 Al endi qırman da, sharap sıg'atug'ın iskenje de xalıqtı toydırmas, Taza sharap ta olardın' u'mitin aqlamas.
3 Olar Jaratqan İyenin' jerinde qalmaydı, Efrayım Mısırg'a qaytıp ketedi. Assiriyada haram sanalg'an azıq-awqatlardı jeydi.
4 Qurbanlıqların' lazımdag'ı nan sıyaqlı bolıp, Onnan jegenlerdin' ha'mmesi haram sanaladı. Jaratqan İyege ishimlik sadaqasın quyman', Alıp kelgen qurbanlıqların' Og'an maqul bolmas. Olardın' nanı tek g'ana qarın ushın, Bunday nanlar Jaratqan İyenin' u'yine kirgizilmes.
5 Ne isley alasız belgilengen bayramlarda, Jaratqan İyenin' bayram ku'nlerinde?
6 Olar apattan qashıp qutılsa da, Mısır olardı bir jerge jıynaydı, Paytaxtı Memfis olardı jerleydi. Bahalı gu'mis zatların'dı jantaq sho'pler basıp, Shatırlarına shen'gel o'sip ketedi.
7 Jaza beriletug'ın waqıt jetip keldi, Esap beretug'ın waqtı keldi. Ha'y, İzrail, mınanı bilip qoy, Ko'p gu'naların' sebepli, Dushpanshılıg'ın'nın' sheksizligi sonshelli, Payg'ambar aqmaq, ruwxtan ilhamlang'an adamlar telbe, dep sanaldı.
8 Qudayım payg'ambardı Efrayımg'a gu'zetshi qıldı, Biraq onın' ha'r bir adımına duzaq qurdın'ız, Dushpanlıq bar Qudayımızdın' u'yinde.
9 Giba ku'nlerindegi sıyaqlı, olar azg'ırılıwg'a teren' battı. Quday jınayatların eske aladı, Gu'nalarına jarasa jaza beredi.
10 Jaratqan İye bılay deydi: «Men İzraildı tapqanda, Sho'lde ju'zim tapqanday boldım. Ata-babaların'ızdı ko'rgende, Da'slepki a'njir miywesin ko'rgendey boldım. Biraq olar Baal-Peorg'a kelgende, Sol jerdegi jerkenishli butqa o'zlerin bag'ıshladı. Olar o'zleri jaqsı ko'rgen sol but sıyaqlı Jerkenishli bolıp qaldı.
11 Efrayımnın' saltanatı bir qus sıyaqlı ushıp ketedi, Olarda perzent te tuwılmas, hayalları da ha'miledar bolmas, Qursag'ına bala da pitpes.
12 Eger perzent o'sirse de, Men olardı birewin de qaldırmay tartıp alaman. Awa, olardı taslap ketkenimde, ha'siret shegedi!
13 Efrayımdı ko'rgenimde, Ol Tir qalasına uqsaytug'ın edi, Go'zzal jerde jaylasqan edi. Biraq endi Efrayım o'z balaların, Ja'lladtın' aldına alıp shıg'adı».
14 Jaratqan İye, bul xalqın'a ne beresen'? Hayallardı bala tuwmaytug'ın, Balaların emize almaytug'ın qılıp ber.
15 Jaratqan İye bılay deydi: «Olardın' ha'r bir jawızlıg'ı Gilgaldan baslandı, Sol jerde jerkene basladım olardan. İslegen jawızlıqları ushın, Olardı u'yimnen quwıp jiberemen. Artıq olardı jaqsı ko'rmeymen, Olardın' barlıq basshıları Mag'an qarsı bas ko'terdi.
16 Efrayım quladı, tamırları kewip qaldı, Artıq miywe bere almaydı. Balalı bolg'an jag'dayda da, A'lpeshlegen zu'ryadın o'ltiremen».
17 Olar Qudayg'a qulaq salmag'anlıqtan, Qudayım olardan ju'z buradı. Xalıqlar arasında gezende boladı.
