İoel 2 bob
1 Sionda ka'rnay shertin'ler! Muxaddes tawımda dabıl urın'lar! Qorqıwdan titiresin bul jerde jasaytug'ınlar, O'ytkeni kiyatır Jaratqan İyenin' ku'ni, Ol ju'da' jaqın.
2 Bul ku'n qaran'g'ı, tas tu'nek, Bultlı ha'm qap-qaran'g'ı bolar. Tawlardın' u'stinen jayılg'an tan' nurı yan'lı, Sansız ha'm ku'shli bir la'shker ordası kiyatır. A'welleri bunday hesh ju'z bermegen, A'wladlar boyı da hesh qashan bolmas.
3 Olardın' aldında jalmaytug'ın ot, Artında lawlag'an jalın janar. Aldındag'ı Eden bag'ı sıyaqlı jerler, Olar o'tkennen keyin, izsiz sho'lge aylanadı. Hesh na'rse qashıp qutıla almas olardan.
4 Olardın' ko'rinisi atlarg'a uqsaydı, Sawash atlarınday du'sirlesedi.
5 Taw to'besine shıg'ıp atırg'an, Sawash arbasının' dawısınday du'sirleydi, Sabandı jandırıp atırg'an jalınday tısırlaydı, Sawashqa sap tartıp, ju'ris qılg'an, Ku'shli la'shker ordasının' shawqımına uqsaydı.
6 Olardın' aldında qorqınıshqa tu'sedi xalıqlar, Ha'mmenin' ju'zi solıp, ag'arıp ketedi.
7 Bahadırlarday hu'jim qıladı olar, Batır a'skerler sıyaqlı diywallarg'a o'rmelep minedi. Olar sap tartıwı menen alg'a basıp, Hesh biri o'z jolınan shetke shıqpaydı.
8 Bir-birin iyterip, tu'rtpesten, Ha'mmesi saptı buzbay qa'dem basadı. Jawdın' qurallı bo'getlerin jarıp o'tkende de, Olardı hesh na'rse toqtata almas.
9 Olar qalag'a bastırıp kirip, Diywallardan o'rmelep o'tedi, U'ylerge tırmasıp minip, Urıday terezeden kirer.
10 Olardın' aldında jer silkinedi, Aspan qaltırap turadı. Quyash ha'm ay qarayıp ketedi, Juldızlardın' nurı so'nedi.
11 Dawısı gu'rkirep, Jaratqan İye ordasın baslap baradı, Sansızdur Onın' la'shkerleri, Onın' buyrıg'ına boysınatug'ınlar qu'diretli. Jaratqan İyenin' sol ku'ni ullı ha'm qorqınıshlı! Sol ku'nge kim shıday alar eken?!
12 Jaratqan İye bılay deydi: «Ha'zir oraza tutıp, jılap ha'm ko'z jas to'gip, Pu'tkil ju'regin'iz benen Mag'an qaytın'.
13 Kiyimin'izdi emes, ju'reklerin'izdi jırtın'». Qudayın'ız Jaratqan İyege qaytın'. Sebebi Jaratqan İye miyrimli, rehimli, Sabır-taqatlı ha'm su'yispenshiligi sheksiz. Jazalawdan waz keshetug'ın Quday.
14 Kim biledi, Ol rayınan qaytıp, rehim qılıwı mu'mkin? Keyin bereket beredi. Sonda Qudayın'ız Jaratqan İyege, G'a'lle ha'm ishimlik sadaqaların'ızdı usınarsız.
15 Sionda ka'rnay shertin', Oraza ushın ku'n belgilen', Sol ku'ni saltanatlı jıynalıs ja'riyalan'.
16 Jıynan' xalıqtı, Pa'klen' ja'miyetti, Qartayg'anlardı bir jerge shaqırın', Balalardı, ha'tteki emiziwli bo'pelerdi alıp kelin'. Ja'ne de, ku'yew o'z bo'lmesinen shıqsın, Kelinshek shımıldıqtan shıg'ıp kelsin.
17 Ruwxaniyler, Jaratqan İyenin' xızmetkerleri, Jılasın İbadatxananın' aywanı menen qurbanlıq orın arasında, Jalbarınsın olar bılay dep: «Jaratqan İye, O'z xalqın'a rehim qıl, Mu'lkin' a'psanag'a aylanıp, masqara bolmasın basqa milletler arasında, Xalıqlar: „Olardın' Qudayı qayaqta?“ – dep mazaq qılmasın».
18 Sonda Jaratqan İye janı ashıp, Rehim qıldı O'z xalqına.
19 Bılay dep juwap berdi Ol xalqına: «Mine, sizlerge beremen g'a'lle, jan'a sharap ha'm za'ytu'n mayın, Bulardan toyıp iship-jeysiz. Endi jol qoymayman milletler arasında mazaq bolıwın'ızg'a.
20 Arqadan kelgen qa'wipti sizlerden uzaqlastıraman, Quwrag'an ha'm izsiz sho'lge olardı aydap jiberemen. Aldındag'ılardı shıg'ıstag'ı ten'izge, Keyindegilerdi batıstag'ı ten'izge ılaqtıraman. Sasıq iyis shıg'adı o'liklerinen». Shınında da, Jaratqan İye ullı is qıldı.
21 Qorqpa, jer ju'zi, quwanıp shadlan! Jaratqan İye ullı islerdi isledi.
22 Qorqpan', jabayı haywanlar! Sebebi jasılg'a do'nedi jaylawlar. Miywelerin berer miywe ag'ashlar, A'njir ha'm ju'zimlerdin' miyweleri mol boladı.
23 Ha'y, Sion xalqı, quwanın', Qudayın'ız Jaratqan İyenin' islerinen shadlanın'. Tiklenip alıwın'ız ushın, Ol sizlerge gu'z jawın jawdırdı, O'z waqtında jawdırdı gu'z ha'm ba'ha'r jawınların.
24 Endi qırmanlarda taza da'nler mol bolıp, Sharapqa ha'm za'ytu'n mayına ıdıslar tolıp-tasadı.
25 Jaratqan İye bılay deydi: «Sol jılları sizlerge jibergen, Shegirtke u'yirlerinin' jegenlerinin', Qıyratqanlarının', jalmag'anlarının', Yag'nıy, Men jibergen la'shker ordasının', Keltirgen zıyanının' ornın toltıraman.
26 Endi qa'legenin'izshe jep toyasız, Sizler ushın a'jayıp islerdi ko'rsetken, Qudayın'ız Jaratqan İye bolg'an Mag'an alg'ıs aytasız. Xalqım, sizler endi hasla shermende bolmaysız.
27 Ha'y, İzrail, Menin' aran'ızda ekenimdi, Menin' Qudayın'ız Jaratqan İye ekenimdi, Mennen basqa quday joq ekenin bilip alasız. Xalqım, sizler endi hasla shermende bolmaysız.
28 Sonnan keyin, barlıq adamlardın' u'stine, O'z Ruwxımdı jawdıraman. Ul ha'm qızların'ız payg'ambarshılıq qıladı, Qartayg'an adamların'ız tu'sler, Jasların'ız ayanlar ko'redi.
29 O'z Ruwxımdı jawdıraman sol ku'nlerde, Ha'tteki qul ha'm shorılardın' u'stine.
30 Aspanda ha'm jer ju'zinde belgi ko'rsetemen, Qan, ot ha'm tu'tin minarası payda boladı.
31 Jaratqan İyenin' ullı ha'm qorqınıshlı ku'ni kelmesinen aldın, Quyash qaran'g'ılanıp, ay qang'a aylanadı.
32 Sonda Menin', Jaratqan İyenin' atın aytıp shaqırg'an ha'r bir adam qutqarıladı. Jaratqan İye, yag'nıy Men wa'de bergenimdey, Sion tawındag'ı ha'm Erusalimdegi qashıp qutılg'anlar, Aman qalg'anlar Jaratqan İyenin', yag'nıy Menin' tan'lap alg'anlarım boladı».
