Lebiyliler 1 bob

Jandırılatug'ın qurbanlıqlar(1-17).

¹ Jaratqan İye Muwsanı shaqırıp alıp, Ushırasıw shatırınan og'an bılay dedi:

² – Sen İzrail xalqına ja'riyalap mınalardı ayt: «Aran'ızdag'ı birin'iz Jaratqan İyege qurbanlıq bermekshi bolsa, ol iri yamasa mayda mal usınsın.

³ Eger iri maldan jandırılatug'ın qurbanlıq beretug'ın bolsa, onda ol minsiz ha'm erkek mal usınsın. Jaratqan İyenin' bul qurbanlıqtı qabıl etiwi ushın, qurbanlıqtı Ushırasıw shatırının' aldına alıp kelsin.

⁴ Sol adam qurbanlıq maldın' basına qolın qoysın. Sonda qurbanlıq adamnın' gu'nalarının' juwılıwı ushın qabıl etiledi.

⁵ Keyin ol bug'anı Jaratqan İyenin' aldında shalsın. Xaronnın' ulları bolg'an ruwxaniyler bug'anın' qanın alıp kelip, qandı Ushırasıw shatırının' kirer awzının' aldındag'ı qurbanlıq orınnın' to'rt qaptalına serpip jibersin.

⁶ Son'ınan qurbanlıq berip atırg'an adam jandırılatug'ın qurbanlıqtın' terisin sıyırıp alıp, onı jiliklep bo'lsin.

⁷ Al ruwxaniy Xaronnın' ulları qurbanlıq orında ot jag'ıp, u'stine otın qalasın.

⁸ Keyin maldın' jiliklerin, basın ha'm ish mayların sol ottın' u'stine jaylastırsın.

⁹ Maldın' ishek-qarnı ha'm tuyaqları suw menen juwılsın. Al ruwxaniy olardın' barlıg'ın qurbanlıq orınnın' u'stinde tu'tetip jandırsın. Bul – jandırılatug'ın qurbanlıq, Jaratqan İyege xosh iyisli sıy boladı.

¹⁰ Eger mayda maldan jandırılatug'ın qurbanlıq beretug'ın bolsa, onda ol minsiz bolg'an erkek toqlı yamasa teke usınsın.

¹¹ Onı qurbanlıq orınnın' arqa ta'repinde, Jaratqan İyenin' aldında shalsın. Xaronnın' ulları bolg'an ruwxaniyler qandı qurbanlıq orınnın' to'rt qaptalına serpip jibersin.

¹² Adam qurbanlıqtı jiliklep, basın ha'm ish mayların ayırıp alsın. Ruwxaniy olardı qurbanlıq orındag'ı janıp turg'an ottın' u'stine jaylastırsın.

¹³ Qurbanlıqtın' ishek-qarnı ha'm tuyaqları suw menen juwılsın. Al ruwxaniy olardın' barlıg'ın qurbanlıq orınnın' u'stinde tu'tetip jandırsın. Bul – jandırılatug'ın qurbanlıq, Jaratqan İyege xosh iyisli sıy boladı.

¹⁴ Eger kim de kim jandırılatug'ın qurbanlıq etip Jaratqan İyege qus bermekshi bolsa, onda ol qumırı yamasa jas kepter usınsın.

¹⁵ Ruwxaniy onı qurbanlıq orıng'a a'kelip, basın u'zip alsın ha'm basın qurbanlıq orınnın' u'stinde tu'tetip jandırsın. Al qustın' qanın qurbanlıq orınnın' qaptalına sıg'ıp, ag'ızsın.

¹⁶ Ruwxaniy qustın' jemsegin ishindegi na'rseleri menen birge shıg'arıp, qurbanlıq orınnın' shıg'ıs ta'repindegi ku'l to'giletug'ın jerge taslasın.

¹⁷ Son' qustın' qanatlarınan uslap, qustı qaq ayırsın, biraq onı ekige bo'lip taslamasın. Keyin qustı qurbanlıq orındag'ı janıp turg'an ottın' u'stine qoyıp tu'tetip jandırsın. Bul – jandırılatug'ın qurbanlıq, Jaratqan İyege xosh iyisli sıy boladı».