Lebiyliler 10 bob

Nadab ha'm Abihudın' o'limi(1-7),Ruwxaniyler ushın qag'ıydalar(8-20).

¹ Xaronnın' ulları Nadab ha'm Abihu tu'tetki tu'tetiletug'ın ıdısların alıp, ishlerine shoq, shoqtın' u'stine tu'tetki saldı. Olar Jaratqan İye usınıwdı buyırmag'an ottı Onın' aldına alıp keldi.

² Jaratqan İyenin' otı payda boldı. Ot olardı ku'ydirip jiberdi ha'm olar Jaratqan İyenin' aldında o'lip qaldı.

³ Sonda Muwsa Xarong'a bılay dedi: – Jaratqan İyenin': «Mag'an xızmet etkenlerge muxaddesligimdi ko'rsetemen, Pu'tkil xalıq aldında saltanatımdı ashaman», – dep aytqanı usı edi. Xaron u'ndemedi.

⁴ Muwsa Xaronnın' a'kesinin' inisi Uzzieldin' ulları Mishael ha'm Elsafandı shaqırıp alıp, olarg'a: – Berman kelin'ler, tuwısqanların'ızdın' o'li denesin Muxaddes shatırdın' aldınan ordanın' sırtına alıp shıg'ın'lar, – dedi.

⁵ Olar keldi de, Muwsanın' buyırg'anınday, tuwısqanlarının' denelerin kiyimlerinen uslap, ordanın' sırtına alıp shıqtı.

⁶ Bunnan son', Muwsa Xarong'a ha'm onın' ulları Elazar menen İtamarg'a bılay dedi: – Aza tutıp, shashların'ızdı jayman'lar ha'm kiyimlerin'izdi jırtpan'lar. Olay islesen'iz, o'lesizler ha'm Jaratqan İye pu'tkil xalıqqa qa'ha'rlenedi. Biraq tuwısqanların'ız bolg'an pu'tkil İzrail xalqı Jaratqan İye ta'repinen ot penen joq qılıng'anlar ushın aza tutıwı mu'mkin.

⁷ Ushırasıw shatırının' aldınan hesh jaqqa shıg'ıp ketpen'ler, bolmasa o'lip qalasızlar. O'ytkeni sizler Jaratqan İyenin' maylaytug'ın mayı menen Og'an bag'ıshlandın'ız. Xaron ha'm onın' ulları Muwsanın' aytqanına boysındı.

⁸ Jaratqan İye Xarong'a bılay dedi:

⁹ – O'zin' de, ulların' da Ushırasıw shatırına sharap yamasa basqa o'tkir ishimlikler iship kirmen'ler, bolmasa o'lip qalasızlar. Bul a'wladlar boyı ma'n'gi qag'ıyda bolsın.

¹⁰ Sizler muxaddes na'rseni a'piwayı na'rseden, haram na'rseni hadal na'rseden ayıra alıwın'ız sha'rt.

¹¹ Menin' Muwsa arqalı İzrail xalqına bergen barlıq qag'ıydalarımdı olarg'a u'yretiwin'iz tiyis.

¹² Muwsa Xarong'a ha'm onın' qalg'an ulları Elazar menen İtamarg'a bılay dedi:– Jaratqan İyege berilgen g'a'lle sadaqasının' jandırılmag'an bo'legin alıp, onnan ashıtqısız nan jawıp qurbanlıq orınnın' qasında jen'ler. Sebebi bul – ju'da' muxaddes.

¹³ Onı muxaddes jerde jen'ler. O'ytkeni Jaratqan İyege berilgen sıylardan senin' ha'm ulların'nın' payı usı boladı. Mag'an usınday buyrıq berildi+.

¹⁴ Al joqarı ko'terip usınılg'an to's penen bag'ıshlap usınılg'an sandı ulların' ha'm qızların' menen birge taza jerde jen'ler. O'ytkeni bul İzrail xalqının' bergen tatıwlıq qurbanlıqlarınan senin' ha'm balaların'nın' payı etip, usılar berildi.

¹⁵ İzrail xalqı sıy qılıp bergen may menen birge qurbanlıqtın' san ha'm to'sin a'kelsin. Olar to's ha'm sandı Jaratqan İyege bag'ıshlap, joqarı ko'terip usıng'annan keyin, bular sag'an ha'm senin' ulların'a beriledi. Jaratqan İyenin' buyrıg'ına muwapıq, bular ma'n'gige senin' ha'm balaların'nın' payı boladı.

¹⁶ Muwsa gu'na qurbanlıg'ı ushın beriletug'ın tekeni sorastırg'anda, onın' jandırıp jiberilgenin bildi. Sonda ol Xaronnın' qalg'an ulları Elazar ha'm İtamarg'a qattı ashıwlanıp bılay dedi:

¹⁷ – Ne ushın gu'na qurbanlıg'ının' go'shin muxaddes jerde jemedin'ler? Ol – ju'da' muxaddes qurbanlıq-g'o! Jaratqan İyenin' aldında ja'miyettin' gu'nasın juwıp, olardı pa'klewin'iz ushın, Jaratqan İye onı sizlerge bergen edi.

¹⁸ Tekenin' qanı Muxaddes shatırdın' ishine alıp kirilmegen. Sizlerge buyırg'anımday, tekeni muxaddes jerde jewin'iz kerek edi.

¹⁹ Xaron Muwsag'a bılay dedi: – Olar bu'gin Jaratqan İyege gu'na qurbanlıg'ın ha'm jandırılatug'ın qurbanlıqtı berdi. Al menin' basıma usınday is tu'sti! Bu'gin men gu'na qurbanlıg'ının' go'shinen jegenimde, bul Jaratqan İyege unar ma edi?

²⁰ Bul so'zdi esitip, Muwsa bug'an ırazı boldı.