Lebiyliler 11 bob

Hadal ha'm haram haywanlar(1-47).

¹ Jaratqan İye Muwsa menen Xarong'a bılay dedi:

² – İzrail xalqına bılay dep aytın'lar: «Jer betinde jasaytug'ın haywanlardan mınalardın' go'shin jewge boladı:

³ tuyaqları teren' etip ekige ayırılg'an, asha tuyaqlı ha'm gu'yis qaytaratug'ın haywanlardın' ha'mmesin.

⁴ Biraq bul haywanlardan tek mınalardın' go'shin jewin'izge bolmaydı: tu'ye gu'yis qaytaradı, biraq onın' tuyag'ı ekige ayırılmag'an. Sonlıqtan ol sizler ushın haram boladı.

⁵ Daman gu'yis qaytaradı, biraq onın' tuyag'ı joq. Sonlıqtan ol sizler ushın haram boladı.

⁶ Qoyan gu'yis qaytaradı, biraq onın' tuyag'ı joq. Sonlıqtan ol sizler ushın haram boladı.

⁷ Shoshqa ekige ayırılg'an, asha tuyaqlı bolg'anı menen, ol gu'yis qaytarmaydı. Sonlıqtan ol sizler ushın haram boladı.

⁸ Usı haywanlardın' go'shin jemen'ler ha'm olardın' o'ligine de qol tiygizben'ler. Olar sizler ushın haram sanaladı.

⁹ Suwda jasaytug'ın haywanlardan mınalardın' go'shin jewin'izge boladı: ten'izde, suwlarda jasaytug'ın qalashlı ha'm qabırshaqlı haywanlardın' go'shin jewin'izge boladı.

¹⁰ en'izde ha'm suwlarda jasaytug'ın qalashsız ha'm qabırshaqsız haywanlardın' ha'mmesi sizler ushın ma'kiriw sanaladı.

¹¹ Bular sizler ushın jerkenishli sanaladı. Olardın' go'shin jemen'ler ha'm o'liginen jerkenin'ler.

¹² Suwda jasaytug'ın qalashsız ha'm qabırshaqsız haywanlardın' ha'mmesi sizler ushın jerkenishli sanaladı.

¹³ Mına quslardı jerkenishli dep bilip, olardın' go'shin jemen'ler: bu'rkit, ku'shegen, qara qus,

¹⁴ shayqus, lashın ha'm onın' tu'rleri,

¹⁵ g'arg'anın' barlıq tu'rleri,

¹⁶ u'ki, batpaq bayıwlısı, shag'ala ha'm qarshıg'anın' tu'rleri,

¹⁷ u'y bayıwlısı, qarabay, qulaqlı japalaq,

¹⁸ aq quw, uzaqsha, sipa,

¹⁹ la'ylek ha'm qutannın' tu'rleri, o'pepek ha'm jarg'anat.

²⁰ Qanatlı shıbın-shirkeylerdin' ha'mmesi sizler ushın jerkenishli.

²¹ Al olardın' ishindegi tek g'ana uzın ayaqları menen sekirip ju'retug'ınların jewin'izge boladı.

²² Olar: shegirtkenin' barlıq tu'rleri, shekshek shegirtke, qara shegirtke ha'm usılardın' barlıq tu'rleri.

²³ Basqa shıbınshirkeylerdin' ha'mmesi sizler ushın jerkenishli.

²⁴ To'mendegi haywanlar sizlerdi haramlaydı, olardın' o'ligine bir jerin tiygizgen adam keshke deyin haram sanaladı.

²⁵ Kim de kim olardın' o'ligin tasısa, ol kiyimlerin juwıwı tiyis ha'm ol keshke deyin haram sanaladı.

²⁶ Tuyag'ı ekige ayırılg'an, biraq tuyag'ındag'ı jarıg'ı teren' bolmag'an ha'm gu'yis qaytarmaytug'ın ha'r bir haywan sizler ushın haram boladı. Olarg'a bir jerin tiygizgen adam da haram sanaladı.

²⁷ To'rt ayaqlı haywanlardan pa'njelerin jerge basıp ju'retug'ın haywanlar da sizler ushın haram boladı. Olardın' o'ligine bir jerin tiygizgen adam keshke deyin haram sanaladı.

²⁸ Olardın' o'ligin tasıg'an adam kiyimlerin juwsın ha'm ol keshke deyin haram sanaladı. O'ytkeni bul haywanlar sizler ushın haram.

²⁹ Jer bawırlap ju'riwshi mına haywanlar da sizler ushın haram sanaladı: go'rtıshqan, tıshqan, kesirtkenin' tu'rleri,

³⁰ gekkon, eshkemer, diywal kesirtkesi, sho'l kesirtkesi, xameleon.

³¹ Barlıq jer bawırlawshılar ishinde sizler ushın haram dep sanalatug'ınları usılar. Olardın' o'ligine bir jerin tiygizgen adam keshke deyin haram sanaladı.

³² Olardın' birewinin' o'ligi bir na'rsenin' u'stine tu'sip ketse, onı haram qıladı. Sol ha'r bir iste qollanılatug'ın ag'ash ıdıs, kiyim, teri, ya kenep bolsın, olardı suwg'a salıp qoyıw kerek. Olar keshke deyin haram sanalıp, son'ınan hadal sanaladı.

³³ Al eger haywannın' o'ligi ılay ıdıstın' ishine tu'sip ketse, onda ıdıstın' ishindegi ha'r qanday na'rse haram sanaladı ha'm ıdıs sındırıp taslanıwı kerek.

³⁴ Bunday ıdıstag'ı suw iship-jewge bolatug'ın azıq-awqatqa tamıp ketse, onda bular haram sanaladı.

³⁵ Usınday haywanlardın' birinin' o'ligi nenin' u'stine tu'sse de, sonı haram qıladı. Ol tandırg'a yamasa oshaqqa tu'sken bolsa, onda olar buzıp taslanıwı tiyis. Sebebi olar haram boladı ha'm sizler ushın da haram sanaladı.

³⁶ Biraq o'lik tu'sken bulaq yamasa suw saqlag'ısh g'ana hadal sanaladı. Al haywanlardın' o'ligine bir jerin tiygizgen adam haram sanaladı.

³⁷ Eger usı haywanlardın' birinin' o'ligi egiletug'ın tuqımg'a tu'sse, tuqım hadal bolıp qala beredi.

³⁸ Biraq eger ol suwg'a salıng'an tuqımnın' u'stine tu'sse, tuqım sizler ushın haram sanaladı.

³⁹ Eger go'shin jewge bolatug'ın haywan haram o'lse, onın' o'ligine bir jerin tiygizgen adam keshke deyin haram sanaladı.

⁴⁰ Onın' go'shinen jegen adam kiyimlerin juwıwı tiyis ha'm ol keshke deyin haram sanaladı. O'likti tasıg'an adam da kiyimlerin juwıwı tiyis. Bunday adam keshke deyin haram sanaladı.

⁴¹ Jer bawırlap ju'riwshi barlıq haywanlardı ma'kiriw sanan'lar. Olardı jemen'ler.

⁴² Qarnı menen su'yretilip ju'riwshi bolsın, to'rt ayaqlı jer bawırlawshı ha'm ko'p ayaqlı janıwarlar bolsın, olardın' hesh birin jemen'ler. O'ytkeni olar jerkenishli.

⁴³ Olardın' hesh biri menen o'zin'izdi ma'kiriw etpen'ler, olar arqalı haram bolıp qalman'lar.

⁴⁴ Sebebi Men – sizlerdin' Qudayın'ız Jaratqan İye bolaman. Muxaddes bolıw ushın o'zlerin'izdi Mag'an bag'ıshlan'lar, sebebi Men – muxaddespen. Jer bawırlawshılardın' hesh biri menen o'zlerin'izdi haramlaman'lar.

⁴⁵ Qudayın'ız bolıw ushın, sizlerdi Mısırdan shıg'arg'an Jaratqan İye – Men bolaman. Muxaddes bolın'lar, o'ytkeni Men – muxaddespen.

⁴⁶ Haywanlar, quslar, suwda jasawshı ha'r tu'rli haywanlar ha'm jer bawırlawshılar tuwralı qag'ıydalar usı boladı.

⁴⁷ Haramdı hadaldan, jewge bolatug'ın haywanlardı jewge bolmaytug'ın haywanlardan ayırıp bilin'ler!»