Lebiyliler 13 bob

Teri kesellikleri tuwralı nızam(1-46),Baz basıw haqqında(47-59).

¹ Jaratqan İye Muwsa menen Xarong'a bılay dedi:

² – Denesinde jaman teri keselligine aylanıwı mu'mkin bolg'an daq, bo'rtpe yamasa aqtan'lag'ı bar adam ruwxaniy Xarong'a yamasa onın' ruwxaniy ullarının' birine aparılsın.

³ Ruwxaniy teridegi jaranı tekserip shıqsın. Eger jaranın' u'stindegi qıl ag'arıp, jara oyılg'an bolsa, onda bul – jaman teri keselligine ta'n jara. Bunday jag'dayda terisindegi jaranın' usınday ekenligi anıqlang'an adamdı ruwxaniy haram dep ja'riyalasın.

⁴ Al eger adamnın' terisinde aqtan'laq bolg'anı menen, ol oyılmag'an ha'm u'stindegi qıllar ag'armag'an bolsa, onda ruwxaniy kesel adamdı jeti ku'n basqalardan bo'leklep qoysın.

⁵ etinshi ku'ni ruwxaniy jaranı ja'ne tekserip ko'rsin. Eger jara sol halında qalıp, terige jayılmag'an bolsa, onda kesel adamdı ja'ne jeti ku'n bo'leklep qoysın.

⁶ Ruwxaniy jetinshi ku'ni kesel adamdı tag'ı tekserip ko'rsin. Eger jara terige jayılmag'an ha'm aldıng'ısınan go're bilinbey baratırg'an bolsa, onda ol keseldi hadal dep ja'riyalasın. Bul – a'piwayı bo'rtpe bolg'anı. Kesel adam kiyimlerin juwsın ha'm sonda ol hadal dep sanaladı.

⁷ Ruwxaniyge tekserilip, hadal dep sanalg'annan keyin, sol adamnın' terisindegi bo'rtpe jayıla baslasa, ol qaytadan ruwxaniyge ko'rinsin.

⁸ Ruwxaniy adamdı tag'ı tekserip shıqsın. Eger adamnın' terisindegi bo'rtpe jayılg'an bolsa, onda ruwxaniy onı haram dep ja'riyalasın. Demek, sol adamnın' jaman teri keselligine shalıng'anı.

⁹ Usı keseldin' belgisi bar adam ruwxaniyge aparılıp,

¹⁰ ruwxaniy onı tekserip shıqqanda, teride aq daq tabılsa, daqtın' u'stindegi qıllar da aq bolıp, ol awzı ashıq jara bolsa,

¹¹ bul jazılmaytug'ın teri keselligi bolg'anı. Ruwxaniy adamdı haram dep ja'riyalasın, onı bo'leklep qoyıwdın' paydası joq. Sebebi ol adam a'lle qashan haram bolıp esaplanadı.

¹² Eger kesellik jayılıp, jara sol adamdı basınan ayag'ına deyin qaplag'an bolsa,

¹³ onda ruwxaniy onı tekserip shıqsın. Eger barlıq denesi taza terige qaplang'an bolsa, ruwxaniy onı hadal dep ja'riyalasın.

¹⁴ Biraq eger jaranın' awzı ashıq ha'm qızarg'an bolsa, onda adam haram sanaladı.

¹⁵ Ruwxaniy qızarg'an, awzı ashıq jara ko'rse, adamdı haram dep ja'riyalasın. Usınday jara haram bolıp, bul jaman teri keselliginin' belgisi.

¹⁶ Eger jaranın' awzı pitip, tek g'ana aq daq qalg'an bolsa,

¹⁷ onda ruwxaniy tekserip shıg'ıp, ol adamdı hadal dep ja'riyalasın.

¹⁸ Eger birewdin' terisine shıyqan shıg'ıp, ol jazılıp ketken bolsa,

¹⁹ biraq shıyqannın' ornında aq yamasa aqshıl qızıl ren'degi aqtan'laq payda bolsa, ol ruwxaniyge ko'riniwi tiyis.

²⁰ Ruwxaniy onı tekserip shıqsın. Eger daq teren' oyılıp, u'stindegi tu'kler ag'arg'an bolsa, onda ol adamdı haram dep ja'riyalasın. Bul – shıyqannın' ornına shıqqan jaman teri keselligi bolg'anı.

²¹ 1Biraq eger ruwxaniy teksergende, daqtın' u'stindegi tu'ktin' ag'armag'anın ko'rse, jara teren' oyılmay, aldıng'ısınan go're bilinbey baratırg'an bolsa, onda ol adamdı jeti ku'n basqalardan bo'leklep qoysın.

²² Eger usı waqıt dawamında jara jayılıp baslag'an bolsa, ruwxaniy ol adamdı haram dep ja'riyalasın. O'ytkeni bul – jaman teri keselligi bolg'anı.

²³ Al eger aqtan'laq sol halında qalıp, jayılmag'an bolsa, bul tek g'ana shıyqannan qalg'an tırtıq bolg'anı. Ruwxaniy ol adamdı hadal dep ja'riyalasın.

²⁴ Eger birew ku'yip qalıp, ku'ygen teride qızg'ısh yamasa aq daq payda bolsa,

²⁵ onda ruwxaniy jaraqattı tekserip shıqsın. Aqtan'laqtın' u'stindegi tu'kler ag'arıp, daq teren' oyılg'an bolsa, demek, bul – ku'ygen terinin' ornında payda bolg'an jaman teri keselligi. Ruwxaniy bunday adamdı haram dep ja'riyalasın.

²⁶ Biraq eger ruwxaniy aqtan'laqtag'ı tu'ktin' ag'armag'anın ko'rse, daq teren' oyılmay, aldıng'ısınan go're bilinbey baratırg'an bolsa, onda ruwxaniy ol adamdı jeti ku'n basqalardan bo'leklep qoysın.

²⁷ Jetinshi ku'ni ruwxaniy onı ja'ne tekserip ko'rsin. Eger daq terige jayılg'an bolsa, onda ol adamdı haram dep ja'riyalasın. O'ytkeni ol jaman teri keselligine shalıng'an.

²⁸ Eger teridegi aqtan'laq sol halında qalıp, terige jayılmag'an ha'm aldıng'ısınan go're bilinbey baratırg'an bolsa, onda bul – ku'yikten payda bolg'an tırtıq. Ruwxaniy ol adamdı hadal dep ja'riyalasın.

²⁹ Bir er adamnın' yamasa hayaldın' basında yamasa iyeginde jara bolsa,

³⁰ ruwxaniy jaranı tekserip shıqsın. Jara teride teren' ornalasqan, u'stindegi tu'kler jin'ishke ha'm sarı bolsa, onda ruwxaniy awırıw adamdı haram dep ja'riyalasın. O'ytkeni bul qotır jara, bas ha'm iyekte payda bolg'an jaman teri keselligi.

³¹ Degen menen, ruwxaniy bunday jaranı teksergende, jaranın' teren' oyılmag'anın, biraq jaranın' u'stinde qara tu'k joq ekenin ko'rse, onda ol awırıw adamdı jeti ku'n basqalardan bo'leklep qoysın.

³² Al jetinshi ku'ni ruwxaniy jaranı ja'ne tekserip ko'rsin. Eger qotır jara terige jayılmag'an, u'stinde sarı tu'k joq bolıp, jara teren' oyılmag'an bolsa,

³³ onda adamnın' qotır bolg'an jerinen basqa ha'mme jerindegi tu'kler qırıp taslansın. Ruwxaniy awırıw adamdı ja'ne jeti ku'n basqalardan bo'leklep qoysın.

³⁴ Jetinshi ku'ni ruwxaniy qotır jaranı tag'ı tekserip ko'rsin. Eger qotır jara terige jayılmag'an ha'm teren' oyılmag'an bolsa, onda ruwxaniy sol adamdı hadal dep ja'riyalasın. Awırıw adam kiyimlerin juwsın, sonda ol hadal dep sanaladı.

³⁵ Biraq awırıw adam hadal dep ja'riyalang'annan son', qotır jara onın' terisine jayılıp baslasa,

³⁶ ruwxaniy onı qaytadan tekserip shıqsın. Eger qotır jayılg'an bolsa, onda sarg'ayg'an tu'kti izlemese de boladı. Ol adam haram bolıp sanaladı.

³⁷ Al eger qotır jara sol halında qalıp, u'stine qara tu'k shıqqan bolsa, onda qotır jazılg'anı. Adam hadal boladı, ruwxaniy onı hadal dep ja'riyalasın.

³⁸ Bir er adamnın' yamasa hayaldın' terisinde aqtan'laqlar payda bolsa,

³⁹ onda ruwxaniy onı tekserip shıqsın. Teridegi aqtan'laqlar aldıng'ısınan go're bilinbey baratırg'an ha'm aqshıl bolsa, bul – bo'rtpe bolg'anı. Adam hadal sanalsın.

⁴⁰ Eger adamnın' to'be shashı yamasa shashının' aldı beti to'gilgen bolsa, onda bul – ka'l bolg'anı.

⁴¹ Adam hadal sanaladı.

⁴² Biraq ka'l bolg'an adamnın' basında qızg'ısh aq jaralar payda bolsa, onda ol adamnın' jaman teri keselligine shalıng'anı.

⁴³ Ruwxaniy onı tekserip ko'rsin. Basının' to'besindegi yamasa aldı betindegi daqlar jaman teri keselligine ta'n jaralar sıyaqlı aqshıl qızıl bolsa,

⁴⁴ onda adam usınday teri keselligine shalıng'an bolıp, ol haram sanaladı. Basındag'ı jara sebepli ruwxaniy onı haram dep ja'riyalasın

⁴⁵ Jaman teri keselligine shalıng'an adamnın' kiyimleri jırtılıp, shashları jayılg'an bolsın. Adam ju'zinin' to'menin jawıp: «Haramman! Haramman!» – dep baqırsın.

⁴⁶ Ol adam keselligi dawamında haram sanalıp, xalıqtan uzaqta, ordanın' sırtında jasasın.

⁴⁷ Eger ju'n yamasa zıg'ır kiyimdi, ha'r qanday ju'n yamasa zıg'ır jipten toqılg'an gezleme,

⁴⁸ teri yamasa teri buyımdı baz basıp ketse

⁴⁹ ha'm bulardag'ı baz basqan daq jasıl yamasa qızıl tu'ske ense, onda olar ruwxaniyge ko'rsetiliwi tiyis.

⁵⁰ Ruwxaniy olardı tekserip ko'rip, zıyanlang'an na'rseni jeti ku'n bo'lek saqlasın.

⁵¹ Jetinshi ku'ni onı ja'ne teksersin. Eger kiyimde, gezlemede yamasa qanday da bir maqset penen qollanılg'an teri buyımda baz basqan jer jayılsa, bul zıyanlı bolg'anı. Zıyanlang'an zat haram sanaladı.

⁵² U'sti baz basqan ha'r bir zat ruwxaniy ta'repinen jag'ıp jiberilsin. O'ytkeni bul zıyanlı na'rse bolg'anlıqtan, jandırıp jiberiliwi kerek.

⁵³ Eger ruwxaniy kiyimdegi, gezlemedegi yamasa qanday da bir teri buyımdag'ı baz basqan jerdin' jayılmag'anın ko'rse,

⁵⁴ baz basqan zattı juwıwdı buyırsın. Ruwxaniy onı ja'ne jeti ku'n bo'lek saqlasın.

⁵⁵ Sonnan keyin, ruwxaniy onı ja'ne teksersin. Eger baz jayılmag'anı menen ren'i burıng'ıday jasıl yamasa qızıl bolsa, ol haram sanaladı. Bul zattın' ishi yamasa sırtı baz basıp ketse, ol jandırıp jiberiliwi tiyis.

⁵⁶ Biraq sol zattın' baz basqan jeri aldıng'ısınan go're bilinbey baslag'an bolsa, ruwxaniy kiyimdegi, teridegi yamasa gezlemedegi baz basqan jerdi kesip taslasın.

⁵⁷ Eger sol zatlarda ja'ne baz basqan jer ko'rinse, ol jayılıp baslag'anı. Onda bunday zattı jag'ıp jiberiwin'iz tiyis.

⁵⁸ Juwılg'an kiyimnen, gezlemeden yamasa teri buyımnan baz basqan jer joq bolıp ketse, onda ol qaytadan juwılsın. Sonnan son', ol hadal sanaladı.

⁵⁹ Baz basqan ju'n yamasa zıg'ır kiyim, gezleme yamasa teri buyım haram yamasa hadal dep ja'riyalanıwı ushın qollanılatug'ın qag'ıydalar usılardan ibarat.