Lebiyliler 14 bob
1 Jaratqan İye Muwsag'a bılay dedi:
2 – Jaman teri keselligi menen awırg'an adamnın' hadal qılınatug'ın ku'ni mına pa'kleniw qag'ıydası qollanılıwı tiyis: awırıw adam ruwxaniyge aparılsın.
3 Ruwxaniy onı tekseriw ushın ordanın' sırtına shıqsın. Eger awırıw adam ta'wir bolg'an bolsa,
4 ruwxaniy onı pa'klew ushın eki hadal tiri qus, kedr ag'ashın, qırmızı jip ha'm mayoran sho'bin* a'keliwdi buyırsın.
5 Ruwxaniydin' buyrıg'ı menen quslardın' birewin taza bulaq suwı quyılg'an ılay ıdıstın' u'stinde shalsın.
6 Keyin ruwxaniy tiri qustı, kedr ag'ashın, qırmızı jipti ha'm mayoran sho'bin soyılg'an qustın' qanı menen aralastırılg'an taza bulaq suwına batırsın
7 ha'm teri keselliginen pa'klenetug'ın adamnın' u'stine jeti ma'rte serpsin. Sonnan keyin, ruwxaniy onı hadal dep ja'riyalap, tiri qustı ashıq dalag'a jibersin.
8 Pa'klenetug'ın adam kiyimlerin juwıp, barlıq shashların qırqıp taslasın ha'm suwg'a juwınsın, sonda ol hadal sanaladı. Keyin ol ordag'a kiriwine boladı, biraq jeti ku'n shatırının' sırtında jasasın.
9 Jetinshi ku'ni ol shashın, saqalın, qasların ha'm denesindegi barlıq ju'nlerin qırıp taslasın. Kiyimlerin juwıp, o'zi de suwg'a juwınıp bolg'annan son', hadal sanaladı.
10 Segizinshi ku'ni ol minsiz eki erkek toqlı, bir jasar minsiz qoy, g'a'lle sadaqası sıpatında za'ytu'n mayı menen aralastırılg'an onnan u'sh efa sapalı un ha'm bir log za'ytu'n mayın alıp kelsin.
11 Pa'klew xızmetin orınlap atırg'an ruwxaniy bulardın' barlıg'ın ha'm pa'klenip atırg'an adamdı Jaratqan İyenin' aldına, Ushırasıw shatırının' aldına alıp kelsin.
12 Keyin ruwxaniy toqlılardın' birewin alıp, onı bir log za'ytu'n mayı menen birge ayıp qurbanlıg'ı etip usınsın. Bulardı Jaratqan İyenin' aldında joqarı ko'terip usınsın.
13 Toqlını gu'na qurbanlıg'ı ha'm jandırılatug'ın qurbanlıq shalınatug'ın muxaddes jerde shalsın. O'ytkeni gu'na qurbanlıg'ı sıyaqlı ayıp qurbanlıg'ı da ruwxaniyge tiyisli. Bul qurbanlıq ju'da' muxaddes bolıp esaplanadı.
14 Ruwxaniy pa'klenetug'ın adamnın' on' qulag'ının' sırg'alıg'ına, on' qolının' ha'm on' ayag'ının' bas barmag'ına ayıp qurbanlıg'ının' qanınan su'rtsin.
15 Sonnan keyin, ol bir log za'ytu'n mayınan azg'antay alıp, o'zinin' shep alaqanına quysın.
16 On' qolının' barmag'ın sol mayg'a batırıp, Jaratqan İyenin' aldında jeti ma'rte serpsin.
17 Pa'klenetug'ın adamnın' on' qulag'ının' sırg'alıg'ına, on' qolının' ha'm on' ayag'ının' bas barmag'ına ayıp qurbanlıg'ınan su'rtilgen qannın' u'stine qolındag'ı maydan su'rtsin.
18 Sonın' menen birge, ruwxaniy alaqanında awısıp qalg'an maydı pa'klenetug'ın adamnın' basına su'rtip, Jaratqan İyenin' aldında onı pa'klesin.
19 Sonnan son', ruwxaniy gu'na qurbanlıg'ın berip, pa'klenetug'ın adamdı haramlıg'ınan pa'klesin. Bunnan keyin jandırılatug'ın qurbanlıqtı soyıp,
20 onı g'a'lle sadaqası menen birge qurbanlıq orında jag'ıp jibersin. Usılay etip, ruwxaniy onı pa'kleydi ha'm sol adam hadal bolıp esaplanadı.
21 Eger de ol adam jarlı bolıp, bulardı alıwg'a shaması kelmese, pa'kleniwi ushın joqarı ko'terip usınatug'ın ayıp qurbanlıg'ı ushın bir erkek toqlı, g'a'lle sadaqası ushın za'ytu'n mayı qosılg'an onnan bir efa sapalı un ha'm bir log za'ytu'n mayın alıp kelsin.
22 Ol birewin gu'na qurbanlıg'ı, ekinshisin jandırılatug'ın qurbanlıq etip beriw ushın shaması kelgeninshe, eki qumırı yamasa eki jas kepter a'kelsin.
23 Ol bulardın' ha'mmesin pa'kleniw ushın segizinshi ku'ni Jaratqan İyenin' aldına, Ushırasıw shatırının' aldına alıp kelip, ruwxaniyge bersin.
24 Ruwxaniy ayıp qurbanlıg'ı ushın berilgen toqlını ha'm bir log za'ytu'n mayın alıp, Jaratqan İyenin' aldında joqarı ko'terip usınsın.
25 Son'ınan ayıp qurbanlıg'ı ushın beriletug'ın toqlını soyıp, onın' qanınan alıp, pa'klenetug'ın adamnın' on' qulag'ının' sırg'alıg'ına, on' qolının' ha'm on' ayag'ının' bas barmag'ına su'rtsin+.
26 Sonnan son', ruwxaniy o'zinin' shep alaqanına azg'antay za'ytu'n mayın quyıp,
27 on' qolının' barmag'ın sol mayg'a batırıp, Jaratqan İyenin' aldında jeti ma'rte serpsin.
28 Ol qolındag'ı maydan pa'klenetug'ın adamnın' on' qulag'ının' sırg'alıg'ına, on' qolının' ha'm on' ayag'ının' bas barmag'ına ayıp qurbanlıg'ının' qanı su'rtilgen jerge su'rtsin.
29 Sonın' menen birge, ruwxaniy Jaratqan İyenin' aldında pa'klenetug'ın adamdı pa'klew ushın, qolında qalg'an maydı onın' basına su'rtsin.
30 1Sonnan keyin, sol adamnın' shaması jetkenine qarap, alg'an qumırılardan yamasa kepterlerden birewin gu'na qurbanlıg'ı, ekinshisin jandırılatug'ın qurbanlıq etip, g'a'lle sadaqası menen birge usınsın.
31 Ruwxaniy usılay etip, sol adamdı Jaratqan İyenin' aldında pa'klesin.
32 Jaman teri keselligi menen awırıp, ta'wir bolg'annan keyin pa'kleniwi ushın jag'dayı to'men adamlar ushın qag'ıydalar usılardan ibarat.
33 Jaratqan İye Muwsa menen Xarong'a bılay dedi:
34 – Sizlerge mu'lik qılıp beretug'ın Qanan jerine kirgenin'izden keyin, elin'izdegi bir u'yge ko'gerip, baz basıw ba'lesin jibersem,
35 u'ydin' iyesi ruwxaniyge barıp: «U'yimde ko'geriwge uqsag'an bir na'rse ko'rdim», – dep xabar bersin.
36 Ruwxaniy ko'geriwdi ko'riwge barmasınan aldın, u'ydegi ha'r bir na'rse haram dep sanalmawı ushın, olardı sırtqa shıg'arıp qoyıwdı buyırsın. Sonnan keyin, ol u'ydi ko'riwge barsın.
37 Ol ko'gergen diywallardı ko'zden o'tkersin. Eger ko'geriwdegi jasıl yamasa qızıl tu'sli daqlar diywalg'a sin'ip baratırg'an bolsa,
38 onda ruwxaniy u'yden shıg'ıp, u'ydi jeti ku'n dawamında jawıp qoysın.
39 Ol jetinshi ku'ni qaytıp barıp, u'ydi ja'ne ko'zden o'tkersin. Eger de ko'geriw diywallarg'a jayılg'an bolsa,
40 ko'gergen taslardı alıp taslap, qalanın' sırtına, haram sanalatug'ın bir jerge aparıp taslawdı buyırsın.
41 U'ydin' ishindegi barlıq sıbawdı tu'sirtip, bulardı da qalanın' sırtındag'ı sol jerge taslatsın.
42 Alıng'an taslardın' ornına basqa taslar qalanıp, u'y jan'adan sıbalsın.
43 Sonnan keyin de u'yde ko'geriw ja'ne payda bolsa,
44 ruwxaniy barıp, u'ydi ko'zden o'tkersin. Ko'geriw jayılsa, ol zıyanlı bolıp, u'y haram sanaladı.
45 Bunday u'y buzıp taslansın. Onın' tasları, ag'ashları, barlıq sıbawları qalanın' sırtındag'ı haram jerge aparıp taslansın.
46 U'y jabılg'an ku'nleri, og'an kirgen ha'r bir adam keshke deyin haram sanaladı.
47 Sol u'yde jatqan yamasa awqat jegen adam kiyimlerin juwsın.
48 Al eger de u'y sıbalg'annan son', ruwxaniy u'yge kirip, ko'zden o'tkergende, sol ko'geriw jayılmag'an bolsa, onda ruwxaniy u'ydi taza dep ja'riyalasın. O'ytkeni ko'geriw joq boldı.
49 Ruwxaniy u'ydi pa'klew ushın eki qus, kedr ag'ashın, qırmızı jip ha'm mayoran sho'bin alsın.
50 Quslardın' birewin taza bulaq suwı quyılg'an ılay ıdıstın' u'stinde soysın.
51 Kedr ag'ashın, mayoran sho'bin, qırmızı jipti ha'm tiri qustı alıp, soyılg'an qustın' qanı menen aralastırılg'an taza bulaq suwına batırsın da, onı jeti ma'rte u'yge serpsin.
52 Usılay etip, ruwxaniy u'ydi pa'klegennen son',
53 tiri qustı qalanın' sırtına, ashıq dalag'a ushırıp jibersin. Solay etip, u'y pa'klenip, taza boladı.
54 Ha'r tu'rli teri keselligi, qotır jara, daq, bo'rtpe yamasa aqtan'laqlar, ja'ne de,
55 kiyim ha'm u'ylerde payda bolatug'ın baz basıw menen ko'geriwge baylanıslı qag'ıydalar usılardan ibarat.
56 Bulardın' qashannan berli haram, qashannan berli hadal bolg'anı usı nızam boyınsha bilinedi.
