Lebiyliler 15 bob

Adamdı haram qılatug'ın na'rseler tuwrısında(1-33).

¹ Jaratqan İye Muwsa menen Xarong'a bılay dedi:

² – İzrail xalqına bılay dep aytın'lar: «Erkektin' jınısıy ag'zasınan irin' ajıralıp shıqsa, ol haram sanaladı.

³ Adamnan ajıralıp shıg'atug'ın irin' haqqında nızam mınaday: irin' aqsa da, qoyıwlasıp irkilip qalsa da, adam haram sanaladı.

⁴ Bunday adamnın' jatqan to'segi ha'm otırg'an ha'r bir na'rsesi haram sanaladı.

⁵ Kim de kim onın' to'segine bir jerin tiygizse, kiyimlerin juwsın, o'zi de juwınsın. Ol keshke deyin haram sanaladı.

⁶ Sol adamnın' otırıp ketken jerine otırg'an adam da kiyimlerin juwıp, o'zi juwınsın ha'm ol keshke deyin haram sanaladı.

⁷ Kim de kim irin' ag'ıp ju'rgen adamg'a bir jerin tiygizse, kiyimlerin juwsın ha'm o'zi de juwınsın. Ol keshke deyin haram sanaladı.

⁸ Eger de irin' ag'ıp ju'rgen adamnın' tu'kirigi pa'k adamg'a shashırap ketse, tu'kirik shashırag'an adam kiyimlerin juwsın, o'zi de juwınsın. Ol keshke deyin haram sanaladı.

⁹ rin'i bar adam mingen ha'r bir attın' eri haram sanaladı.

¹⁰ Usı adam otırg'an ha'r bir na'rsege bir jerin tiygizgen adam keshke deyin haram sanaladı. Bul zatlardı ko'terip ju'rgen ha'r bir adam kiyimlerin juwsın, o'zi de juwınsın. Ol keshke deyin haram sanaladı.

¹¹ İrin'i bar adam qolların juwmay, birewge qolın tiygizse, sol adam kiyimlerin juwsın, o'zi de juwınsın. Ol keshke deyin haram sanaladı.

¹² İrin'i bar adam uslag'an ha'r bir ılay ıdıs sındırıp taslansın, al ag'ash ıdıs bolsa, suw menen juwılsın.

¹³ Eger adamnın' irin'i toqtap, ta'wir bolsa, jeti ku'n o'tiwi tiyis. Sonnan keyin, ol kiyimlerin juwıp, ag'ın suwda juwınsın, sonda ol taza bolıp sanaladı.

¹⁴ Segizinshi ku'ni ol eki qumırı yamasa eki jas kepter alıp, Jaratqan İyenin' aldına, Ushırasıw shatırının' aldına a'kelsin ha'm bulardı ruwxaniyge bersin.

¹⁵ Ruwxaniy olardın' birewin gu'na qurbanlıg'ı, ekinshisin jandırılatug'ın qurbanlıq etip bersin. Usılay etip, ruwxaniy irin'i bar bolg'an adamdı Jaratqan İyenin' aldında pa'klesin.

¹⁶ Eger de bir erkek adamnın' urıg'ı aqsa, pu'tkil denesin suwg'a juwsın ha'm ol keshke deyin haram sanaladı.

¹⁷ U'stine jınısıy tuqımlıq tamg'an ha'r bir kiyim yamasa teri zatlar suw menen juwılsın ha'm olar keshke deyin haram sanaladı.

¹⁸ Erkek bir hayal menen jatıp, erkekten urıq aqsa, ekewi de juwınsın ha'm olar keshke deyin haram sanaladı.

¹⁹ Eger hayaldın' a'dettegidey etek kiri kelip ju'rse, ol jeti ku'n dawamında haram sanaladı. Og'an bir jerin tiygizgen adam da keshke deyin haram sanaladı.

²⁰ Etek kiri kelip ju'rgen waqtında, hayaldın' to'segi de, ol u'stinde otırg'an ha'r bir na'rse de haram sanaladı.

²¹ Kim de kim sol hayaldın' to'segine yamasa ol otırg'an zatqa bir jerin tiygizse, kiyimlerin juwsın, o'zi de suwg'a juwınsın.

²² Ol keshke deyin haram sanaladı.

²³ Hayaldın' to'seginin' yamasa ol otırg'an zattın' u'stinde turg'an bir na'rsege jantasqan ha'r bir adam keshke deyin haram sanaladı.

²⁴ Eger erkek etek kiri kelip ju'rgen hayal menen jatsa, erkek te haram sanaladı. Ol erkek jeti ku'n haram bolıp, onın' jatqan ha'r bir to'segi de haram sanaladı+.

²⁵ Eger hayaldın' etek kirinen tısqarı qan kelse ha'm bul uzaq waqıt dawam etse, yamasa etek kiri a'detten tıs uzayıp ketse, onda ol usı waqıt dawamında da etek kiri waqtındag'ıday haram sanaladı+.

²⁶ Usı waqıt dawamında hayaldın' jatqan to'segi yamasa otırg'an ha'r bir na'rse etegi kelip ju'rgen waqtındag'ı sıyaqlı haram sanaladı.

²⁷ Kim de kim sol na'rselerge jantassa, haram bolıp esaplanadı. Ol kiyimlerin juwsın, o'zi de juwınsın. Ol keshke deyin haram sanaladı.

²⁸ Hayaldın' qanı toqtag'annan son' jeti ku'n o'tiwi tiyis, sonnan keyin ol taza bolıp esaplanadı.

²⁹ Segizinshi ku'ni ol eki qumırı yamasa eki jas kepterdi Ushırasıw shatırının' aldına alıp kelsin ha'm olardı ruwxaniyge bersin+

³⁰ Ruwxaniy olardın' birewin gu'na qurbanlıg'ı, ekinshisin jandırılatug'ın qurbanlıq qılıp usınsın. Usılay etip, ruwxaniy qan ketiwden haramlang'an hayaldı Jaratqan İyenin' aldında pa'klesin.

³¹ İzrail xalqın haramlıqtan usılay saqlan'. Solay etip, aran'ızda jaylasqan Menin' Muxaddes shatırımdı haram qılıp, o'lip qalman'lar+.

³² Jınısıy ag'zasınan irin' yamasa urıg'ı aqqan adam,

³³ etek kiri kelip ju'rgen hayal ha'm usınday jag'daydag'ı hayal menen jatqan erkekke baylanıslı qag'ıydalar usı boladı».