Lebiyliler 16 bob

Gu'nadan pa'kleniw ku'ni(1-34).

¹ Jaratqan İyenin' aldına jaqınlag'an waqıtta o'lgen Xaronnın' eki ulının' o'liminen son', Jaratqan İye Muwsa menen so'ylesip,

² og'an bılay dedi: – A'jag'an' Xarong'a ayt, ol En' muxaddes bo'lmege, perdenin' artına, Kelisim sandıg'ının' u'stindegi gu'nadan pa'kleytug'ın qaqpaqtın' aldına tek belgilengen waqıtta kirsin. Basqa waqıtta kirse, ol o'lip qaladı. Sebebi Men bult ishinde, qaqpaqtın' u'stinde payda bolaman.

³ Xaron En' muxaddes bo'lmege kiretug'ın waqıtta gu'na qurbanlıg'ı ushın bir bug'a, jandırılatug'ın qurbanlıq ushın bir qoshqar usınsın.

⁴ Ol zıg'ırdan islengen muxaddes uzın ko'ylek, zıg'ır diz kiyim kiysin, zıg'ır belbew baylasın ha'm basına zıg'ır sa'lle orasın. Bular muxaddes kiyimler, sonın' ushın olardı kiymesten aldın juwınıp alsın.

⁵ İzrail ja'miyeti de gu'na qurbanlıg'ı ushın Xarong'a eki teke, jandırılatug'ın qurbanlıq ushın bir qoshqar a'kelsin.

⁶ Xaron o'zin ha'm shan'arag'ın gu'nalardan pa'klew ushın, gu'na qurbanlıg'ı etip bir bug'a usınsın.

⁷ Sonnan keyin, ol eki tekeni Jaratqan İyenin' aldına, Ushırasıw shatırının' aldına alıp kelsin.

⁸ Sol jerde eki teke ushın shek taslanıp, qaysısının' Jaratqan İye ushın, qaysısının' Azazel ushın du'zge aydap jiberiletug'ının anıqlasın.

⁹ Xaron shek boyınsha Jaratqan İyege tiyisli tekeni alıp, gu'na qurbanlıg'ı etip usınsın.

¹⁰ Shek boyınsha Azazelge jiberiletug'ın tekeni tiriley Jaratqan İyenin' aldına a'kelip, xalıqtın' gu'nalarının' o'teliwi ushın du'zge aydap jibersin.

¹¹ Xaron o'zi ha'm shan'arag'ı ushın beriletug'ın bug'anı gu'na qurbanlıg'ı etip usıng'anda,

¹² ol qurbanlıq orınnan shoqlardı alıp, tu'tetki tu'tetiletug'ın ıdısqa toltırıp salsın. Keyin sol ıdıstı ha'm eki qosuwıs maydalap untalg'an xosh iyisli tu'tetkini perdenin' artındag'ı En' muxaddes bo'lmege alıp kirsin.

¹³ Ol jerde, Jaratqan İyenin' aldında tu'tetkini shoqlardın' u'stine qoysın. Onın' tu'tini Kelisim sandıg'ının' u'stindegi qaqpaqtı ko'zge ko'rinbeytug'ın etip qaplaydı. Sonda Xaron o'lmey tiri qaladı.

¹⁴ Sonnan keyin, ol bug'anın' qanınan alıp, barmag'ı menen shıg'ıs ta'repten qaqpaqtın' u'stine bir ma'rte, keyin qaqpaqtın' aldına jeti ma'rte serpsin.

¹⁵ Usıdan keyin ol xalıq ushın gu'na qurbanlıg'ı etip tekeni soysın. Onın' qanın perdenin' ishki jag'ına, En' muxaddes bo'lmege alıp kirsin. Bug'anın' qanın serpkendey etip, tekenin' qanın da sol Kelisim sandıg'ının' qaqpag'ının' u'stine ha'm onın' aldına serpsin.

¹⁶ Usılay etip, En' muxaddes bo'lmeni İzrail xalqının' napa'kliklerinen, jınayatlarınan ha'm barlıq gu'nalarınan tazalasın. En' muxaddes bo'lmenin' aldındag'ı Muxaddes bo'lme ushın da anıq usılay islensin. O'ytkeni shatır napa'k adamlardın' arasında jaylasqan.

¹⁷ Xaron o'zinin', shan'arag'ının' ha'm pu'tkil İzrail ja'miyetinin' atınan pa'klew ra'simin o'tkeriw ushın En' muxaddes bo'lmege kirgende, sırtqa shıg'aman degenshe, Ushırasıw shatırında hesh kim bolmawı tiyis.

¹⁸ Son'ınan Xaron Jaratqan İyenin' aldındag'ı qurbanlıq orıng'a shıg'ıp, qurbanlıq orındı pa'klew ushın, bug'a menen tekenin' qanın qurbanlıq orınnın' shaqlarına su'rtip shıqsın.

¹⁹ Qandı barmag'ı menen qurbanlıq orıng'a jeti ma'rte serpsin. Usılay etip, ol qurbanlıq orındı İzrail xalqının' napa'kliginen tazalap, muxaddes qıladı.

²⁰ Xaron En' muxaddes bo'lmeni, onın' aldındag'ı Muxaddes bo'lmeni ha'm qurbanlıq orındı pa'klegennen son', tiri tekeni alıp kelsin.

²¹ Ol eki qolın tekenin' basına qoyıp, İzrail xalqının' barlıq ayıpların, jınayatların ha'm gu'naların dawıslap ta'n alıp, bulardı tekenin' basına ju'klesin. Sonnan keyin, teke usı is ushın arnawlı adamg'a tapsırılsın ha'm ol tekeni qula du'zge aydap jibersin.

²² Solay etip, teke İzrail xalqının' barlıq ayıpların qula du'zge alıp ketedi.

²³ Sonnan son', Xaron Ushırasıw shatırına kirsin. Ol En' muxaddes bo'lmege kirer aldında kiyip alg'an zıg'ır kiyimlerin sheship, Muxaddes bo'lmede qaldırsın.

²⁴ Ol muxaddes jerde juwınıp, ku'ndelikli ruwxaniylik kiyimlerin kiysin. Sonnan son', o'zi ha'm xalıq ushın beriletug'ın jandırılatug'ın qurbanlıqlardı usınsın. Usılay etip, ol o'zin de, xalıqtı da gu'nadan pa'klesin.

²⁵ Gu'na qurbanlıg'ının' mayın qurbanlıq orında tu'tetip jandırsın.

²⁶ Al gu'na ju'klengen tekeni Azazelge jiberip qaytqan adam kiyimlerin juwsın, o'zi de juwınsın. Sonnan keyin, ol ordag'a kire aladı.

²⁷ Gu'na qurbanlıg'ı etip berilgen ha'm pa'klew ra'simin o'tkeriw ushın qanları En' muxaddes bo'lmege alıp kirilgen bug'a menen teke ordanın' sırtına shıg'arıp taslansın. Olardın' terileri, go'shleri ha'm da'risleri jag'ıp jiberilsin.

²⁸ Bulardı jaqqan adam kiyimlerin juwıp, o'zi de juwıng'annan son', ordag'a kire aladı.

²⁹ Sizler ushın mınaw ma'n'gige qag'ıyda bolsın: jetinshi aydın' onınshı ku'ni oraza tutın'. İzraillı bolsın, aran'ızda jasap atırg'an kelgindi adam bolsın, hesh birin'iz a'dettegi jumısın'ızdı islemen'.

³⁰ O'ytkeni sol ku'ni ruwxaniy Xaron sizlerdi gu'naların'ızdan pa'kleydi. Sonda sizler Jaratqan İyenin' aldında barlıq gu'naların'ızdan tazalanasızlar.

³¹ Sol ku'n sizler ushın tolıq dem alatug'ın Shabbat ku'ni boladı, sol ku'ni oraza tutın'lar. Bul sizler ushın ma'n'gi qag'ıyda bolsın.

³² A'kesinin' ornına bas ruwxaniylikke tayınlanıp, maylang'an ruwxaniy muxaddes zıg'ır kiyimlerin kiyip, pa'klew ra'simin o'tkersin.

³³ Ol En' muxaddes bo'lmeni, Ushırasıw shatırın ha'm qurbanlıq orındı tazalap, ruwxaniylerdin' ha'm pu'tkil ja'miyettin' gu'nalarınan pa'kleydi.

³⁴ İzrail xalqının' ko'p gu'naları sebepli jılına bir ma'rte pa'klew ra'simi o'tkerilsin. Bul sizler ushın ma'n'gi qag'ıyda bolsın. Xaron ha'mmesin Jaratqan İyenin' Muwsag'a buyırg'anınday etip orınladı.