Lebiyliler 17 bob
1 Jaratqan İye Muwsag'a bılay dedi:
2 – Xarong'a, onın' ullarına ha'm pu'tkil İzrail xalqına bılay dep ayt: «Jaratqan İyenin' buyrıg'ı mınaw:
3 Eger İzrail xalqınan birew bir sıyır, bir qoy yamasa eshki soymaqshı bolsa, onı qurbanlıq sıpatında Jaratqan İyege usınıw ushın, Ushırasıw shatırının' aldına alıp keliwi tiyis.
4 Eger maldı yamasa janlıqtı Muxaddes shatırdın' aldına alıp kelmey, basqa jerde soysa, ol qan to'kken bolıp, ayıplı sanalsın. Qan to'kken sol adam xalıqtın' arasınan joq qılınadı.
5 olay etip, izraillılar ashıq dalalarda soyg'an qurbanlıqların endigiden bılay Jaratqan İyenin' aldına alıp kelsin. Olar qurbanlıqların Ushırasıw shatırının' aldına, ruwxaniyge alıp kelsin ha'm tatıwlıq qurbanlıg'ı etip, Jaratqan İyege usınsın.
6 Ruwxaniy qurbanlıqtın' qanın Ushırasıw shatırının' kirer awzının' aldındag'ı Jaratqan İyenin' qurbanlıq ornına serpip jibersin, mayların bolsa, Jaratqan İyege xosh iyisli sıy qılıp, tu'tetip jandırıp jibersin.
7 Bunnan bılay, İzrail xalqının' qurbanlıqları teke ko'rinisindegi jinlerge berilmesin ha'm solay islep, olar Jaratqan İyege opasızlıq qılmasın. Bul qag'ıydag'a a'wladlar dawamında a'mel qılınsın».
8 Olarg'a ja'ne bılay dep ayt: «Eger İzrail xalqınan yamasa arasında jasap atırg'an kelgindilerden birewi jandırılatug'ın qurbanlıq yamasa basqa qurbanlıq berse,
9 biraq onı Jaratqan İyege usınıw ushın Ushırasıw shatırının' aldına alıp kelmese, ol xalıqtın' arasınan joq qılınadı.
10 Eger İzrail xalqınan yamasa arasında jasap atırg'an kelgindilerden birewi go'shti qanı menen jese, Men og'an qarsı shıg'ıp, xalqının' arasınan joq qılaman.
11 O'ytkeni janıwarlardın' janı qanında boladı. Qandı sizlerge qurbanlıq orınnın' u'stinde o'zlerin'izdi gu'nadan pa'klewin'iz ushın berdim. O'zinde o'mir bolg'an bul qan sizlerdi gu'nadan pa'kleydi.
12 Sonın' ushın, İzrail xalqına: „Sizler yamasa aran'ızda jasap atırg'an kelgindi adamlardın' hesh biri go'shti qanı menen jemesin“, – dep ayttım.
13 İzrail xalqınan yamasa arasında jasap atırg'an kelgindi adamlardan birewi jewge bolatug'ın bir haywan yamasa qus awlasa, onın' qanın topıraqqa ag'ızıp ko'mip taslasın+.
14 O'ytkeni janıwarlardın' janı qanında boladı. Sol sebepli Men İzrail xalqına: „Hesh bir janıwardın' go'shin qanı menen jemen'“, – dedim. Onı ishken adam xalıqtın' arasınan joq qılınadı.
15 İzraillı bolsın, aran'ızda jasap atırg'an kelgindi bolsın, haram o'lgen yamasa jabayı haywan bawızlap o'ltirgen haywannın' go'shin jegen ha'r bir adam kiyimlerin juwsın, o'zi de juwınsın. Ol keshke deyin haram sanaladı. Sonnan keyin barıp, ol hadal sanaladı.
16 Eger de ol kiyimlerin juwmasa, o'zi de juwınbasa, ayıplı sanalıp, jazag'a tartıladı».
