Lebiyliler 18 bob

Qadag'an etilgen jınısıy qatnaslar(1-30).

¹ Jaratqan İye Muwsag'a bılay dedi:

² – İzrail xalqına bılay dep ayt: «Qudayın'ız Jaratqan İye – Men bolaman.

³ O'zlerin'iz burın arasında jasag'an Mısır xalqının' ha'm Menin' sizlerdi aparatırg'an Qanan jerinin' u'rp-a'detlerine a'mel qılıp, olar sıyaqlı jasaman'lar+.

⁴ Menin' nızamlarımdı orınlap, qag'ıydalarım boyınsha jasan'lar. Men – Qudayın'ız Jaratqan İyemen.

⁵ Qag'ıyda ha'm nızamlarıma a'mel qılın'. O'ytkeni adam olardı orınlawı arqalı o'mir su'redi. Men – Jaratqan İyemen+.

⁶ Hesh kim jınısıy qatnas jasaw ushın o'z ag'ayinine jaqınlamasın. Men – Jaratqan İyemen.

⁷ Anan' menen jınısıy qatnas qılıp, a'ken'di shermende qılma. Ol anan' bolg'anı ushın, onın' etegin ashpa.

⁸ A'ken'nin' namısına tiymewin' ushın, onın' hesh bir hayalı menen jınısıy qatnas qılma.

⁹ Senin' menen bir u'yde tuwılsın, basqa jerde tuwılsın, anan'nan yamasa a'ken'nen tuwılg'an o'gey qarındasların'nın' hesh biri menen jınısıy qatnas qılma.

¹⁰ Qızın'nan yamasa ulın'nan tuwılg'an aqlıq qızın' menen jınısıy qatnas qılma. O'ytkeni olar senin' tuwg'an qanalasların' boladı.

¹¹ A'ken'nin' basqa hayalınan tuwılg'an qız benen jınısıy qatnas qılma. Sebebi ol a'ken'nen tuwılg'an, senin' qarındasın' boladı.

¹² A'ken'nin' a'japası yamasa qarındası menen jınısıy qatnas qılma. O'ytkeni ol a'ken'nin' jaqın qanalası boladı.

¹³ Anan'nın' a'japası yamasa sin'lisi menen jınısıy qatnas qılma. Sebebi ol anan'nın' jaqın qanalası boladı.

¹⁴ A'ken'nin' ag'asının' yaki inisinin' hayalı menen jatıp, olardı shermende qılma. Sebebi ol senin' jen'gen' boladı.

¹⁵ Kelinin' menen jınısıy qatnas qılma. Ol balan'nın' hayalı. Onın' menen jatpa.

¹⁶ Ag'an'nın' yaki inin'nin' hayalı menen jınısıy qatnas qılma. Bolmasa olardın' namısına tiyesen'.

¹⁷ Bir hayaldın' o'zi menen jınısıy qatnasta bolıp, onın' qızı menen de jınısıy qatnas qılma. Hayaldın' qızınan yamasa ulınan tuwılg'an aqlıq qızı menen jınısıy qatnas qılma. Sebebi olar hayaldın' jaqın qanlasları. Bul uyatsız is+.

¹⁸ Hayalın' tiri waqtında, onın' a'japasın yamasa sin'lisin hayallıqqa alma ha'm onın' menen jınısıy qatnas qılma.

¹⁹ Etegi kelip ju'rgeni ushın haram sanalg'an hayal menen jınısıy qatnas qılma.

²⁰ Basqa birewdin' hayalı menen jınısıy qatnas qılıp, o'zin'di haramlama.

²¹ Balaların'nın' hesh birin Molox qudayına arnap, qurbanlıqqa berme ha'm usılay islep, Qudayın'nın' atına til tiygizbe. Men – Jaratqan İyemen.

²² Hayal menen jatqanday qılıp, erkek penen jatpa. Bul jerkenishli is.

²³ Hesh qanday haywan menen jınısıy qatnas qılıp, o'zin'di haramlama. Hayallar da jınısıy qatnas qılıw ushın hesh qanday haywang'a jaqınlamasın. Bul – buzıqlıq boladı.

²⁴ Usı is-ha'reketlerdin' hesh biri menen o'zlerin'izdi haramlaman'. Men sizlerdin' aldın'ızdan quwıp shıg'arıp atırg'an xalıq usınday isler menen o'zlerin haramlag'an edi.

²⁵ Olar sebepli el de haramlang'an. Olardın' gu'nası sebepli sol jerdi jazaladım. Eldin' o'zi turg'ınlarınan kewli aynıp, olardı qusıp tasladı.

²⁶ Sizler Menin' qag'ıyda ha'm nızamlarıma a'mel qılıp jasan'lar. İzraillı bolsın, aran'ızda jasap atırg'an kelgindi bolsın, hesh bir adam bunday jerkenishli isti islemesin.

²⁷ Sizlerden aldın bul elde jasag'an adamlar usı barlıq jerkenishli islerdi islep, eldi haramladı.

²⁸ Eger sizler de eldi haramlasan'ız, sizlerden aldıng'ı xalıqqa islegenindey, el sizlerdi de qusıp shıg'arıp jiberedi.

²⁹ Kim de kim usı jerkenishli islerdin' birewin islese, xalıqtın' arasınan joq qılınadı.

³⁰ Menin' buyrıqlarımdı orınlan'lar, sizlerden aldın elde jasag'an adamlardın' jerkenishli u'rp-a'detlerine a'mel qılıp, o'zlerin'izdi haramlaman'. Men – Qudayın'ız, Jaratqan İyemen».