Lebiyliler 19 bob

A'dillik ha'm muxaddeslik nızamları(1-37).

¹ Jaratqan İye Muwsag'a bılay dedi:

² – İzrail ja'miyetine bılay dep ayt: «Muxaddes bolın', o'ytkeni Qudayın'ız Jaratqan İye bolg'an Men – muxaddespen.

³ Ha'r birin'iz o'z ata-anan'ızdı hu'rmetlen'. Menin' Shabbatıma* a'mel qılın'. Men – Qudayın'ız Jaratqan İyemen.

⁴ Mennen ju'z burıp, jalg'an qudaylarg'a tabınban' ha'm o'zlerin'izge butlardın' mu'sinlerin sog'ıp alman'. Men – Qudayın'ız Jaratqan İyemen.

⁵ Tatıwlıq qurbanlıg'ın a'kelgenin'izde, onı Men qabıl etetug'ınday etip usının'.

⁶ Qurbanlıqtın' go'shi soyılg'an ku'ni yamasa erten'gi ku'ni jeliniwi tiyis, al u'shinshi ku'nge qalg'an go'sh jandırıp jiberilsin.

⁷ Eger qurbanlıqtın' go'shi u'shinshi ku'ni jelinse, ol haram sanalıp, qurbanlıq qabıl etilmeydi.

⁸ 8Onı jegen ha'r bir adam ayıbının' jazasın aladı, sebebi Jaratqan İyenin' aldında muxaddes bolg'andı ayaq astı qılg'an boladı. Onday adam xalıq arasınan joq qılınadı.

⁹ Atızın'ızdag'ı eginlerdi jıynag'anın'ızda, onın' shetlerin ormay qaldırıp ketin', jerge tu'sken masaqlardı da jıynap alman'.

¹⁰ Ju'zim bag'ın'ızdın' zu'ra'a'tin na'rse qaldırmay jıynap alman'. Jerge tu'sken ju'zimlerdi de terip alman'. Olardı jarlılarg'a ha'm kelgindi adamlarg'a qaldırın'. Men – Qudayın'ız Jaratqan İyemen.

¹¹ Urlıq qılman', hiylekerlik qılman' ha'm bir-birin'izdi aldaman'.

¹² Menin' atım menen o'tirik ant iship, Qudayın'ızdın' atına til tiygizben'. Men – Jaratqan İyemen.

¹³ Basqa bir adamnın' mal-mu'lkin nahaqlıq ha'm zorlıq jolı menen qolg'a kirgizben'. Jallanba jumısshının' is haqısın tan'g'a deyin uslap turman'+.

¹⁴ Geren'ge g'arg'ıs so'z aytpan', soqırdın' aldına su'rnigetug'ın hesh na'rse qoyman'. Qudayın'nan qorq. Men – Jaratqan İyemen.

¹⁵ Hu'kim waqtında nahaqlıq qılıp, jarlılardı jaqlap, eki ju'zlilik qılıp, baylardın' da kewline qarap ha'reket qılman'. Ha'r bir adamdı a'dillik penen hu'kim etin'.

¹⁶ Xalqın'ızdın' arasında mısh-mısh ga'p tarqatıwshı bolman'. Olardın' o'mirine qa'wip tuwdırman'. Men – Jaratqan İyemen.

¹⁷ Ju'regin'izde tuwısqanın'ızg'a qarsı jek ko'riwshilik bolmasın. Tuwısqanın'ızdın' ayıbın ju'zine aytın', sonda onın' gu'nasına sherik bolmaysız.

¹⁸ O'sh alıwshı bolman', o'z xalqın'ızdan bolg'an birewge qarsı kek saqlaman'. Kerisinshe, o'zin'izdi su'ygenin'iz sıyaqlı, janın'ızdag'ı adamdı da su'yin'. Men – Jaratqan İyemen.

¹⁹ Nızam-qag'ıydalarıma a'mel qılın'lar. Haywannın' eki tu'rin bir-biri menen shag'ılıstırman'. Atızın'ızg'a eki tu'rli tuqım ekpen'. U'stin'izge eki tu'rli jipten toqılg'an kiyim kiymen'.

²⁰ Eger de bir adam basqa bir erkekke atastırılıp qoyılg'an shorı qız benen jatsa, ol qızdın' qunı to'lenbegen yamasa ele azat etilmegen bolsa, onda ekewi de jazalansın, biraq o'ltirilmesin. O'ytkeni qız ele azat etilmegen.

²¹ Sol adam Jaratqan İyege, Ushırasıw shatırının' aldına ayıp qurbanlıg'ı ushın bir qoshqar alıp kelsin.

²² Ruwxaniy bul qoshqardı ayıp qurbanlıg'ı ushın berip, sol adamdı Jaratqan İyenin' aldında gu'nasınan tazalasın. Sonda ol adamnın' gu'nası keshiriledi.

²³ Qanan eline kirgennen son', ha'r tu'rli miywe ag'ashın tikkenin'izde, olardın' miywesin u'sh jıl dawamında haram sanap, onnan jemen'ler.

²⁴ l to'rtinshi jılı sol ag'ashlardın' barlıq miywesin shu'kirlik sadaqası etip, Jaratqan İyege bag'ıshlan'lar.

²⁵ Besinshi jılı olardın' miywesin jewin'izge boladı. Usılay qılsan'ız, miywe ag'ashların'ız mol miywesin beredi. Men – Qudayın'ız Jaratqan İyemen.

²⁶ Qanı ag'ızılmag'an go'shten jemen'. Pal ashıwshılıq ha'm boljawshılıq penen shug'ıllanban'.

²⁷ Sheken'izdin' shashların kestermen', saqalların'ızdın' ushların qırıqpan'.

²⁸ Marhumlar ushın aza tutqanın'ızda, denen'izdi tilip jaraqatlaman', terin'izdi testirip, hesh na'rse jazdırman'. Men – Jaratqan İyemen.

²⁹ Qızın'ızdı buzıqlıq qılıwg'a iytermelep, onı biyabıray qılman'. Bolmasa, buzıqshılıq tarap, el uyatsız qılıqqa tolıp ketedi.

³⁰ Menin' Shabbatıma a'mel qılın'lar. Menin' Muxaddes ma'kanımdı hu'rmet qılın'lar. Men – Jaratqan İyemen.

³¹ A'rwaqlardı ha'm ruwxlardı shaqıratug'ınlarg'a barıp, olarg'a xabarlaspan'. Olar sebepli o'zlerin'izdi haramlaman'. Men – Qudayın'ız Jaratqan İyemen.

³² ası u'lkenler aldında ornın'nan turıp, jası ullı adamlarg'a hu'rmet ko'rsetin'. Qudayın'ızdan qorqın'. Men – Jaratqan İyemen.

³³ Elin'izde sizler menen birge jasap atırg'an kelgindilerge jawızlıq qılman'.

³⁴ Olarg'a o'z jerlesin'izdey qatnasta bolın' ha'm onı o'zin'izdi su'ygendey etip su'yin'. O'ytkeni sizler de Mısırda kelgindi boldın'ız. Men – Qudayın'ız Jaratqan İyemen.

³⁵ Bir na'rsenin' uzınlıg'ın, awırlıg'ın ha'm sıyımlılıg'ın o'lshegenin'izde nahaqlıq qılman'.

³⁶ Ta'rezin'iz, awırlıq tasların'ız, efa ha'm hin* o'lshem ıdısların'ız durıs bolsın. Men sizlerdi Mısırdan alıp shıqqan Qudayın'ız Jaratqan İyemen+.

³⁷ Barlıq qag'ıyda ha'm nızamlarıma a'mel qılıp, olardı orınlan'lar. Men – Jaratqan İyemen».