Lebiyliler 2 bob

G'a'lle sadaqası(1-16).

¹ «Eger kim de kim Jaratqan İyege arnap g'a'lle sadaqasın bermekshi bolsa, sapalı biyday unınan alıp kelsin. Onın' u'stine za'ytu'n mayın quyıp, xosh iyisli shayır qossın ha'm.

² sadaqanı Xaronnın' ulları bolg'an ruwxaniylerge aparsın. Ruwxaniy za'ytu'n mayı qosılg'an sapalı unnan bir uwısın toltırıp alsın ha'm xosh iyisli shayırdın' barlıg'ın alıp, olardı tolıq sadaqanın' belgisi retinde qurbanlıq orınnın' u'stinde tu'tetip jandırsın. Bul – Jaratqan İyege xosh iyisli sıy boladı.

³ G'a'lle sadaqasının' jandırılmag'an bo'legi Xaron ha'm onın' ullarına tiyisli. Bul bo'lek Jaratqan İyege berilgen sıylardan bolg'anı ushın, ju'da' muxaddes.

⁴ Eger tandırda jabılg'an nandı g'a'lle sadaqası etip bermekshi bolsan'ız, onda sapalı unnan za'ytu'n mayı qosılg'an ashıtqısız sho'rekler yamasa u'stine za'ytu'n mayı jag'ılg'an pa'tirler a'keliwin'iz tiyis.

⁵ Eger tabada pisirilgen nandı sadaqa qılmaqshı bolsan'ız, onda og'an ashıtqı salmay, sapalı ung'a za'ytu'n mayın qosıp iylep, pisirin'.

⁶ Onı usıng'an waqtın'ızda, bo'leklerge bo'liwin'iz ha'm u'stine za'ytu'n mayın quyıwın'ız kerek. Bul – g'a'lle sadaqası.

⁷ Eger sadaqan' qazanda pisirilgen bolsa, onda ol za'ytu'n mayı qosılg'an sapalı unnan tayarlanıwı tiyis.

⁸ Usı taqılette tayarlang'an g'a'lle sadaqasın Jaratqan İyege beriw ushın, ruwxaniyge a'keliwin'iz kerek. Al ruwxaniy onı qurbanlıq orıng'a alıp baradı.

⁹ Keyin ruwxaniy tolıq sadaqanın' belgisi retinde g'a'lle sadaqalarınan bir bo'lek alıp, onı jandırılatug'ın qurbanlıq ha'm Jaratqan İyege xosh iyisli sıy qılıp, qurbanlıq orında tu'tetip jandırsın.

¹⁰ G'a'lle sadaqasının' jandırılmag'an bo'legi Xaron ha'm onın' ullarına tiyisli. Bul bo'lek Jaratqan İyege berilgen sıylardan bolg'anı ushın, ju'da' muxaddes.

¹¹ Jaratqan İyege usınatug'ın g'a'lle sadaqan'ızdın' hesh birine ashıtqı salman'lar. O'ytkeni ashıtqını da, paldı da Jaratqan İyege sıy qılıp, tu'tetip jandırmawın'ız kerek.

¹² Ashıtqı salıng'an nan menen paldı birinshi zu'ra'a'tin'iz sıpatında Jaratqan İyege usınıwın'ızg'a boladı. Biraq olar Jaratqan İyege xosh iyisli sadaqa retinde qurbanlıq orında usınılmawı kerek.

¹³ G'a'lle sadaqan'ızdın' ha'r birine duz qosın'lar. Duz Qudaydın' sizler menen du'zgen kelisimin bildiretug'ın bolg'anlıqtan, sadaqaların'ız duzsız bolmasın.

¹⁴ Eger Jaratqan İyege da'slepki o'nimnen g'a'lle sadaqasın bermekshi bolsan'ız, onda da'slepki shıqqan da'ndi quwırıp, onı tu'yip alıp kelin'.

¹⁵ Bul g'a'lle sadaqası bolg'anı ushın, onın' u'stine za'ytu'n mayın quyıp, xosh iyisli shayır qosın'.

¹⁶ Ruwxaniy biraz tu'yilgen da'n menen za'ytu'n mayınan alıp, olarg'a xosh iyisli shayırdın' ha'mmesin qosıp, tolıq sadaqanın' belgisi retinde qurbanlıq orında tu'tetip jandırsın. Bul – Jaratqan İyege arnalg'an sıy».