Lebiyliler 20 bob

Gu'nanın' to'lemi(1-27).

¹ Jaratqan İye Muwsag'a bılay dedi:

² – İzrail xalqına bılay dep ayt: «İzraillılardan yamasa aran'ızda jasap atırg'an kelgindi adamlardan birewi balasın Molox qudayına qurbanlıq qılsa, ol so'zsiz o'ltirilsin. Xalıq onı tas boran qılsın.

³ Kim de kim o'z balasın Moloxqa qurbanlıq qılıp, Menin' Muxaddes ma'kanımdı haramlasa ha'm muxaddes atıma til tiygizse, Men og'an qarsı shıg'ıp, onı o'z xalqının' arasınan joq qılaman.

⁴ Eger bir adam balasın Moloxqa qurbanlıq qılsa, bunı eldegi xalıq ko'rmegenge salıp, onı o'ltirmese,

⁵ O'zim sol adamg'a ha'm onın' xojalıg'ına qarsı shıg'aman. Mag'an opasızlıq qılg'an adamnın' o'zin ha'm onın' izinen ju'rip, Moloxqa tabıng'anlardın' ha'mmesin o'z xalqının' arasınan joq qılaman.

⁶ Kim de kim a'rwaqlardı ha'm ruwxlardı shaqıratug'ınlarg'a xabarlasıp, Mag'an opasızlıq qılsa, Men og'an qarsı shıg'ıp, onı o'z xalqının' arasınan joq qılaman.

⁷ O'zlerin'izdi Mag'an bag'ıshlan'lar ha'm muxaddes bolın'lar. Men – Qudayın'ız Jaratqan İyemen.

⁸ Menin' qag'ıydalarıma a'mel qılıp, orınlap ju'rin'ler. Sebebi sizlerdi O'zime ajıratıp alıp, muxaddes qılatug'ın Jaratqan İyemen.

⁹ Anasın yamasa a'kesin g'arg'ag'an ha'r bir adam so'zsiz o'ltirilsin. Anasın yamasa a'kesin g'arg'ag'anı ushın, ol adamnın' qanı o'z moynında qaladı.

¹⁰ Bir adam basqa birewdin' hayalı menen buzıqshılıq qılsa, onda ol adam da, hayal da so'zsiz o'ltirilsin.

¹¹ A'kesinin' hayalı menen jatqan adam a'kesin shermende qılg'an boladı. Ekewi de so'zsiz o'ltirilsin. Olardın' to'gilgen qanı o'z moynında qaladı.

¹² Eger bir adam o'z kelini menen jatsa, ekewi de so'zsiz o'ltirilsin. Sebebi olar buzıqlıq qılg'an boladı ha'm olardın' qanı o'z moynında qaladı.

¹³ Eger bir erkek adam hayal menen jatqanday qılıp, erkek penen jatsa, ekewi de jerkenishli is qılg'an boladı. Olar so'zsiz o'ltirilsin ha'm olardın' qanı o'z moynında qaladı.

¹⁴ Eger bir adam qızına da, onın' anasına da u'ylense, ol uyatsız is qılg'an boladı. Sizlerdin' aran'ızda usınday uyatsız ha'reketler bolmawı ushın, u'shewi de otqa jandırılsın.

¹⁵ Eger bir erkek haywan menen jınısıy qatnas islese, adam da, haywan da so'zsiz o'ltirilsin.

¹⁶ Eger bir hayal jınısıy qatnasta bolıw ushın, bir haywang'a jaqınlassa, hayal da, haywan da so'zsiz o'ltirilsin. Olardın' qanı o'z moynında qaladı.

¹⁷ Bir adam a'kesi yamasa anasınan tuwılg'an qarındasına u'ylenip, jınısıy qatnas qılsa, shermendelik boladı. Olardın' ekewi de xalıqtın' ko'z aldında ashıq tu'rde joq qılınsın. Ol adam o'gey qarındasının' namısına tiygeni ushın, o'z ayıbının' jazasın tartadı.

¹⁸ Etegi kelip ju'rgen hayal menen jatıp, jınısıy qatnasta bolg'an adam onın' etek kirin ashqan boladı, hayal da bug'an sherikles esaplanadı. Ekewi de xalıqtın' arasınan joq qılınsın.

¹⁹ A'ken'nin' a'japa-qarındası yamasa anan'nın' a'japa-sin'lisi menen jınısıy qatnas qılma. O'ytkeni bul jaqın qanlasın'nın' namısı. Ekewin'iz de o'z ayıbın'ızdın' jazasın tartasızlar.

²⁰ A'kesinin' ag'a-inisinin' hayalı menen jatqan adam olardın' namısına tiygen boladı. Ekewi de gu'nalarının' jazasın tartadı ha'm perzent ko'rmey, o'lip ketedi.

²¹ Tuwısqanının' hayalına u'ylengen adam jerkenishli is qılg'an boladı. Ol tuwısqanının' namısına tiygeni ushın, olar perzent ko'rmey o'tedi.

²² Menin' barlıq qag'ıyda ha'm nızamlarıma a'mel qılıp, olardı orınlan'lar. Sonda Men sizlerdin' jasawın'ız ushın alıp baratırg'an jer sizlerden kewli aynıp, qusıp shıg'arıp taslamaydı.

²³ Sizlerdin' aldın'ızdan quwıp shıg'aratug'ın milletlerdin' u'rp-a'detleri boyınsha jasaman'lar. Sebebi olar usı jaman a'detlerdin' ha'mmesin islep kiyatır. Sonlıqtan Men olardan jerkendim.

²⁴ Sonda sizler olardın' jerlerine iyelik etesizler. Su't ha'm pal ag'ıp turg'an sol eldi sizlerge mu'lik etip beremen, degen edim. Sizlerdi basqa milletlerden ajıratıp qoyg'an Qudayın'ız Jaratqan İye – Men bolaman.

²⁵ Sizler hadal ha'm haram sanalg'an haywanlar menen quslardı ajıratıwın'ız kerek. Sizlerge haram dep aytqan haywanlar, quslar ha'm jer bawırlawshılardı jep, o'zlerin'izdi haramlaman'lar.

²⁶ Menin' aldımda muxaddes bolın'lar, o'ytkeni Jaratqan İye bolg'an Men – muxaddespen. Mag'an tiyisli bolıwın'ız ushın, sizlerdi basqa xalıqlardan ajıratıp aldım.

²⁷ A'rwaqlardı ha'm ruwxlardı shaqıratug'ın erkek te, hayal da tas boran qılınıp, so'zsiz o'ltirilsin. Olardın' qanı o'z moynında qaladı».